Read Komrem DÂNRABU INHNINA 31 Bible Online

DÂNRABU INHNINA 31 - Komrem bible

DÂNRABU INHNINA 31

¹Moses’n Israel mipuihei hneng ahri manjôna,

²khan ati, “Tûn kei kum 120 katluk jo eng, nanhlam kakei chang tor mak jo ning. Hiva chunga, Jordan rekemak jo ning tia RŌNGPU’n amanthei jo eng.

³Anram kha nanhlō theina sik a, RŌNGPU nan-Pathen khet nanhma kase sik a kha khana aleika-om jât-hei asuk manhmang sik hei; khana RŌNGPU’n ahri kapōa, Joshua kha nanhlam kakei kachang sik.

⁴RŌNGPU’n Amorhei reng Sihon leh Og ator heia anram asuk manhmang kapōa, khava mihei kha asukmanram sik hei kae.

⁵RŌNGPU’n anmani chunga retorna kha apek sik chei, ke’n kamanthei chei kapōhrep a nantatlo sik hei kae.

⁶Intluk ruh khana inhlamrin ruh. Nan-Pathen RŌNGPU khet khan athlop sik chei. Masō mak chei ning, dahlon mak chei ning.”

⁷Khava sōa Moses’n Joshua abek a ati, “Intluk roh khana inhlamrin roh; anpu anpahei hneng RŌNGPU’n aleitep pek ram kahlō sik mihei kaṭhōi sik kha nang che kae.

⁸RŌNGPU khet in aṭhōi sik che khana a-ompui sik che. Ama’n masō mak che ning, dahlon mak che ning, achang jâra malung mathlak mak roh khana ṭitmak roh.”

⁹Khava jâra Moses’n Pathen Dân kha amazet a RŌNGPU Intepna Thingbôm katinta levi thempuhei hneng leh Israel hlamkakeihei hneng apek hei.

¹⁰Ama’n ṭong apek heia, “Kum 7 achaina kataia, bat hei bângna sik kum ajōng tlung sik jo pha, Rabuk Kût shunga hivahi inhnaktak a teisōt ruh.

¹¹Kamukna hmun inkhat a RŌNGPU nan-Pathen inmuk sik a anhong pha, Israel mipuihei hneng teisōt ruh.

¹²Pase, nuhmei leh sahei, khana nankhōpui shunga ka-om khōhme rakip bek mantûp hei ruh, mi rakip in antheia RŌNGPU nan-Pathen kajana anmanhretna sik khana aman theinahei kha taksentak a anjuina sik.

¹³Hing’hin RŌNGPU nan-Pathen Dân alakathei hêrmak nansōn he’n anthei sik jo. Khan chu Jordan rea nanta hlō sik ram a nan-omlai seng aṭong juije kha anmanhret sik jo.”

¹⁴Khava sōa RŌNGPU’n Moses hneng ati, “Nang akasôt hringmak jo tin che. Joshua kha mansena kanei theina sik a heibek roh, Pōn-inn shunga heiṭhōi roh.” Moses leh Joshua kha Pōn-inn shunga leikahlut hei,

¹⁵Pōn-inn kot hnenga akangir sumtuk chopui inkhat a RŌNGPU kha jōng inlâr jo.

¹⁶RŌNGPU’n Moses hneng ahri, “Nang inranga kathi sik jo che, nathisōa mipuihei hi kei hneng taksenthei changmak hei ning, anmani leh intepna kaleisyem kha anvōkkhōi sik. Kei andahlon sik eng, anvahlutna sik ram a jât-hlop hei pathen anvakamuk sik hei.

¹⁷Khavakha asōk pha, anchunga kahnuk kana sik; kadahlon sik hei, anmani suk manram kachang sik hei. Ṭit ka-om inrimna katamtak anchunga jōng katlung sik, khava sōa chu an-Pathen ke’n ka-ompui mak jâr heia hiva omchen hi akasōk jo kae tia anhong manhret sik jo.

¹⁸Khava pha anmani inthōpui sik ke’n hnōm mak ning, ajârchu anmani’n ṭhatmak antlo jo khana pathen alak ankamuk joa kae.

¹⁹“Tûn, hiva hla hi mazet roh. Ankadōia sâkhi achang ṭhakna sik a Israel mipui hneng manthei hei roh.

²⁰Anpu anpahei hneng kale’ntep kapōa, hiva haona leh thai omna ram a hin kaṭhōi sik hei. Khana khan antamadu thlai rakip anhmu sik, inchûng nenga ka-om sik hei. Tâk anmani inhe sik heia kha pathen alak anvakamuk sik. Andahlon sik eng, kaṭong tepna anvōkkhōi sik,

²¹ṭit ka-om inrimna katamtak anchunga jōng katlung sik. Tâk hiva hla hichu ansakṭhak sik, hivahin ankadōia sâkhi kachang sik. Tûnhin um, pek sik heia kale’ntepna ram a kaṭhōi mak hma hei hin, heimo antamandon kamanhret.”

²²Khava ning bât khan Moses’n hla kha amazet a Israel mipui hnenga amanthei jo hei.

²³Khava sōa RŌNGPU’n Nun sapa Joshua hnenga ṭong ahri, “Inngamna nei roh khana intluk roh. Anhnenga kale’ntepna ram shunga Israel mipuihei kha hlam nakei sik hei kae.”

²⁴Moses khan Pathen Dân kha heite dahlon makna sik a inrintak a lekharabu inkhat a amazet jo.

²⁵Achai pha, RŌNGPU Intepna Bôm katintahei, levi thempuhei hneng ati,

²⁶“Hiva Pathen Dân lekharabu hi inlo ruh, amihei kadōia sâkhi inkhat a a-om ṭhakna sik a RŌNGPU nan-Pathen Intepna Bôm hnenga da ruh.

²⁷Heituk a ṭong inngeimak leh rahe kasehei mo ti hi kamanhret. Kei hringkhō shunga RŌNGPU kadōia anrahe leikase, kathisōa chu kakhe chet a anrahe kase sik.

²⁸Nanphung hlamkakei leh ṭōnpui karôn rakip hiva omchenhei hi kaman theina sik hei, kahmai kunga mantûp hei roh; anmani kadōia, kei sâkhi kachang sik a, marvân leh ralei kabek sik hei.

²⁹Kathisōa chu mipuihei hong ṭhamak hei ning khana kaman theinahei hi lomak hei ning ti hi kamanhret. Akahong sik pha shunga inrimna anhong ratō sik, ajârchu RŌNGPU’n atheikada kha anhong tloa ahnuk anmannat pek sik a kae.”

³⁰Khava sōa Moses’n hla seng kha aleiteisōt khana Israel mi rakip in anleirangei.