Read Komrem DÂNRABU INHNINA 33 Bible Online

DÂNRABU INHNINA 33 - Komrem bible

DÂNRABU INHNINA 33

¹Pathen mi, Moses’n athimak hma Israel mipuihei hneng aleiphông vângṭhat hei kha hihei hi kae.

²Sinai Tlânga inphut RŌNGPU kha kajōng; Edom chunga kani kapōa heikasōk khana Paran Tlânga inphut amihei chunga jōng kavâr. Ngeva 10,000 hei leh jōng inṭhōi hei, achangting hmeihrui amatu.

³RŌNGPU’n amihei alungset hei ama tahei kha ahrung hei. Khava jâra akekunga inkun me khana aṭongpek nijui.

⁴Eini’n jât karōi kaṭhapen nimanbuk Moses’n apek me Dân kha nijuia kae.

⁵Anphung hei leh anhlam kakeihei anlei intûp pha khan RŌNGPU’n ami Israelhei reng leikachang.

⁶Moses’n Reuben phung chungchânga aleihri: “Reuben hi inram chermak rasoh, Anmihei antlôm ravâng.”

⁷Judah phung chungchânga ahri: “RŌNGPU, inthōpui derna anṭap rasa theipek hei roh; Phung inkhat hei leh manchun nôk hei roh. RŌNGPU, anmani sik a re tuk roh, Khana an-inrepuihei dōina inthōpui hei roh.”

⁸Levi phung chungchânga aleihri: “RŌNGPU, nang lungdo kha Urim leh Thummim vânga malârsōt roh Levihei, taksenthei nasōk heia inphut; Massa a enmansinna naneihei Khana Meriba tuia khan andikna namanchên.

⁹Annu anpa, ansōpui leh ansahei chunga kanek a, Anhnōmna che kha kalentak a anmalâr. Naṭongpek anjui Khana nang intepna kha anjui mathlung.

¹⁰Nadân juina sik a namihei anmanthei sik hei; Nang maichâma inthoina antōk sik.

¹¹RŌNGPU, anphung hei hrat chet-chetna sik a inthōpui hei roh; Antlona rakip a tlaipek hei roh. An-inrepuihei suk rabun hei roh; Avea thōi nôk mak jo hei rasoh.”

¹²Benjamin phung chungchânga aleihri: “Hivahi RŌNGPU’n alungset leh ahrung phung kae; Ama’n sûn nilun ahrung hei, Khana ama ankâra ka-om.”

¹³Joshep phung chungchânga aleihri: “RŌNGPU’n anram kha khōsûr leh Ralei thōia tuipûtna vângṭhat kha pek rasoh.

¹⁴Anram kha kanisat a thei hminna vângṭhat kha chen rasoh, Aphatina kara kaṭhapen kha sip rasoh.

¹⁵Tenlaia anhmebung hei, madu ka-om theikara khan katōm rasoh.

¹⁶Anram kha akaṭha rakip in sip rasoh, Thingbur kakânga inphut ṭong leikahri RŌNGPU ṭhatna khan mahâmṭhat pek hei rasoh. Hiva mahâmṭhat hei hi Joseph phung chunga tlung rasoh, Ajârchu ama hi asōpuihei kâra hlamkakei leikachang.

¹⁷Joseph in sehratche ratha anei, Ram sehratche raki anei. Araki hei kha Manasseh lishing lishing hei kae Khana Ephraim lishing sôm sômhei kae. Raki hei vâng khan jât-hlop hei asuk hei Ralei inchaina katlunga akathor hei.”

¹⁸Zebulun leh Issachar phunghei chungchânga aleihri: “Zebulun hi tuipui inveina tlona khang sōt rasoh, Khana Issachar nei leh hao hi inna hongkhang chet rasoh.

¹⁹Antlâng chunga khōhmehei anbek hei Khana khan akadiktak inthoina kha antlosōt. Tuipuia inphut nei leh haona Khana tuipanga nêrdi kâra inphut nei anchen.”

²⁰Gad phung chungchânga aleihri: “Anramri inlensōtpa, Pathen kha choi ka-ân ruh. Mibân leh luvun kakeihler hrep sik a Shabakkai kapōa Gad in ahngâk a ka-om.

²¹Aram kaṭhapen kha an-inlo; Hlamkakei chen kha anhnenga inpek hei. Israel hlamkakeihei anlei intûp pha khan RŌNGPU ṭongpek leh dân kha anjuia kae.”

²²Dan phung chungchânga aleihri: “Dan hi shabakkai tere inkhat kae; Bashana inphut jōng inthok a kae.”

²³Naphtali chungchânga ahri: “Naphtali chu RŌNGPU lungsetna’n katluk a vâng apek; Anram kha Galilee Dîra inphut thlang katlung kae.”

²⁴Asher phung chungchânga aleihri: “Phung alak kanek a Asher mahâmṭhat inpek chet. Asōpuihei talungset pen kha chang rasoh, Aram kha olive thing pung rasoh.

²⁵Akhōpuihei kha thir kekot vâng inhrung rasoh, Ahei tik a kangamtak a om rasoh.”

²⁶Israel mipuihei, nan-Pathen kapō pathen lak om mak, bōirōk arakana kalûrtak a kajōng, nankabôm sik a sûmtuk ajōng petan a kae.

²⁷Pathen kha heitik a nankahrung kae; bângtik neiloa khan amatu ṭhak chei. Nangni’n hmalang nanjōn pha nankadōihei kha ahnong sōt hei, khana suk manram hei ruh tia amanthei chei.

²⁸Khava jâra Jacob sōnhei kamōnga ka-om hei, bōirōk a radaitui in ralei tui apekna hmun a hmuchi leh vomhrui ju siptakna ram a inngama ka-om hei.

²⁹Eh Israel, heituk a akahōi che mo! RŌNGPU’n ahuksōt jât nang kapō tûte inkhat om mak. Nang hrungna sik leh torna nakapek sik a, RŌNGPU khet kha nang pho leh chemjâm kae. Nakadōi he’n lungsetna kangek sik a kahong sik hei, khana nang in nachōn rachi sik hei.