Read Komrem DÂNRABU INHNINA 4 Bible Online

DÂNRABU INHNINA 4 - Komrem bible

DÂNRABU INHNINA 4

¹Khava sōa Moses’n Israel mipuihei hneng aleiti, “Ke’n kamanthei chei dân rakip hi jui ruh, khan chu RŌNGPU, nanpu-nanpahei Pathen tapek chei ram kha nanhlōa ka-om thei sik chei.

²Kaṭong pek cheia hin heikhat besa losōt tlomak ruh. Ke’n kapek chei RŌNGPU nan-Pathen ṭongpek kha jui ruh.

³Peor Tlânga RŌNGPU’n heimo aleitlo nangni khet in nanleihmu jo. Khana khan Baal inmuk rakip ama’n asukmanram hei,

⁴tâk nangni RŌNGPU nan-Pathen kajui rakip chu tuning katlung lakahring chei.

⁵“RŌNGPU ka-Pathen in tlosōt sik a ahri pek eng dân rakip kha kamanthei jo chei. Nangni’n re nanvatloa nanta hlō sik ram a khan hihei hi jui ruh.

⁶Taksentak a jui hei ruh, hivahin nangni heituk a akasing chei mo ti kha jât-hlop hei hneng inlâr sik. Hiva dânhei hi anthei pha, anmani’n anti sik, ‘Heituk a singna leh manhretna mo hiva jât kalen he’n antanei hi!’

⁷“Jât inkhatbek in, heituk anlen inum, RŌNGPU ni-Pathen in nihnenga atlo kapōa, an-pathen anrangei pha anhnenga aka-om ṭhak sik pathen kha neimak hei. Inthōpuina sik nibek kataia amasôn mea kae.

⁸Ke’n tuning kamanthei chei dânhei kapō hi jât-hlop inkhatbek in, heituk anlen inum neimak hei.

⁹Insing thei ruh! Nanhmit khet a nantahmu jo hei kha nanhring lai seng mahngi makna sik a tlo ruh. Nansa leh nantu hei manthei hei ruh.

¹⁰Sinai Tlânga RŌNGPU nan-Pathen omna nanngirlai ama’n kahnenga aleihri, ‘Mipuihei mantûp hei roh. Anhring lai seng kaṭong juina hi an inchuna sik leh khava kapōhrep a tlona sik a ansahei anmantheina sik kaṭong hri sik hi antarangei sik a kamadu heia kae.

¹¹“Hmeikhu kadup sûmtuk leh marvân katlunga hmei kasûk in amakhu jo tlâng kunga heikhonga mo akase cheia avakangir chei kha nansahei manthei hei ruh.

¹²Heikhonga mo RŌNGPU’n hmei kâra inphut ṭong ahei hri, heikhonga mo aṭong hri chu nantheia ahme chu heikhat bek hmulo chei ti kha manthei hei ruh.

¹³Nangni leh intepna aleisyem kha nitna sik a nanta tlo-nger sik dân kha aleimanthei chei, hlungpek 2 chunga amazet Ṭongpek Sôm kha nantajui nger sik kae.

¹⁴Re tloa nanta hlō sik ram shunga nantajui sik dân rakip hei kha nanhnenga mantheina sik a RŌNGPU’n aleihri pek jo eng.

¹⁵“Sinai Tlânga RŌNGPU’n hmei kâra inphut nanhnenga ṭong aleihri lai, nangni’n heikhat bek um leihmu mak chei. Nanbinga ṭhatthei chenna sik a,

¹⁶lim inkhat syema setna tlomakna sik a intluk ruh — nuhmei a-emak leh pase,

¹⁷sha a-emak leh va,

¹⁸abok a kalôn a-emak leh nga achanga.

¹⁹bōirōk a nantahmu hei kamukna leh razenna sik a intluk mak ruh — kani, thla, ârsihei. RŌNGPU nan-Pathen in milak rakip hei takamuk sik a hihei hi apek hei kae.

²⁰Tâk nangni chu khava hmeipun kasuk, Egypt ram a inphut ahuksōt mipui chei kha kae. Tuninga nan-e kapōa, ama mi kachang sik a aheiṭhōisōt chei kae.

²¹Nangni jâra RŌNGPU nan-Pathen in kachunga ahnuk leikana khana ama’n apek chei ram hlutna Jordan Tuidung kha karakan makna sik a kalûrtak a aleiphôngsōt a kae.

²²Hiva ram a hin kei chu kathi sik jo eng, tâk nangni chu re kake sik cheia kha khava ram kaṭha kha nanva hlō sik joa kae.

²³Nangni leh RŌNGPU nan-Pathen in intepna asyem kha mahngi makna sik a intluk ruh. Lim heikhat syemmakna sik a aṭongpek kha jui ruh,

²⁴ajârchu RŌNGPU nan-Pathen kha hmeimale kasuk kapō kae; a’nrepui inkhatbek thōk hnâm mak a kae.

²⁵“Ram a khan pha kasôttak nan omsōa tu leh sa nanneisō hei kapha lim inkhat syema setna tlomak ruh. Hivahi RŌNGPU hmit-hmua akaṭhamak kae, khava khan ahnuk amannat sik a kae.

²⁶Ke’n marvân leh ralei sâkhi sik a kabek hei khachu, nangni’n kaṭong nanjuimak inchu ram a inphut inranga a’nhmang sik chei kae. Nanta hlō sik Jordan rekhat a ram a khan nangni akasôt om mak tin chei.

²⁷Jât-hei kâra RŌNGPU’n amanchek chai sik chei, khana khan nangni, ṭhahrep chu kahring sik chei.

²⁸Khana khan mihring kut vânga ansyem pathen, thing leh hlung pathenhei kha nanrazen sik hei, hmit kahmu mak leh kōr katheimak, akasâk theimak leh marim katheimak pathenhei kha.

²⁹Khana khan RŌNGPU nan-Pathen kha nanjong sik, nanmalung pumpuia nanjong inchu, ama kha nanhmu sik.

³⁰Nangni’n inrengna nanratō pha khana khan heirakip nanhnenga asōk pha, khava sōa rōk RŌNGPU hneng hong inle sik chei khana aṭong nanhei jui sik.

³¹Ama chu maritna kasip Pathen kae. Ama’n masō mak chei ning khana suk manhmang mak chei ning, khana nanpu-nanpahei leh ṭong anlei intepna kha ama’n mahngi mak ning.

³²“Nangni nan-intet mak hma, tenlaia Pathen in raleichunga mihring asyemlaia akathlengsa pha kha jongsōt ruh. Raleichung pumpuia jong ruh. Hiva kapō ṭōn kalen heikhat hmalai khan aleikasōk jo mo? Hiva kapō hi tu inkhat in athei phung jo mo?

³³Nangnihei kapōa, hmei kâra inphut pathen in ṭong ahrisōa alakahring mipui tu inkhat aka-om hei mo?

³⁴Egypt ram a RŌNGPU nan-Pathen in atlo kapōa, mipui inkhat kha jât-hlop inkhat heia inphut akalosōt sik leh ami khet manchangna sik a akase hnōm kha tu pathen inmo atlo jo? Nanhmai kung khet a ama ratha hratna leh atorna aleihmang jo; ama’n hrise leh re alei mansōk, mêrchîkna leh det-hla ka-om, khana ṭit ka-om tak alei mansōk hei.

³⁵Ama rōk kha Pathen kae, alak heite om mak ti kha nanhnenga manhmuna sik a RŌNGPU’n hihei hi nanhnenga amalâr kae.

³⁶Nangnihei manse theina sik a marvâna karesō kha amanthei jo chei, hiva raleichunga hin ama hmei intheng kha amanhmu jo chei, khana inphut nanhnenga ṭong ahong hri jo.

³⁷Ajârchu ama’n nanpu-nanpahei kha alungset hei, ama’n akadeisōt chei, ama ratha hratna khan Egypt a inphut ama khet in ajōng ṭhōisōt chei.

³⁸Tûn katlunga nanram kachang jo anmani ram a khan nangni heiṭhōi manhlutna sik leh pekna sik cheia nangni hmating nanlei injôk pha, nangni kanek a akatam leh ratha kanei jât-hei kha aleihnongsōt hei.

³⁹Khava jâra tuning mandonsōt ruh khana mahngi hêrmak ruh: RŌNGPU kha marvân leh ralei Pathen kae. Pathen alak heite om mak.

⁴⁰Tuninga kapek chei adân rakip kha jui ruh, khan chu nangni leh nansōnhei sik a heirakip kaṭha sik. Ahei tik a nanchen sik a RŌNGPU nan-Pathen in apek jo chei ram shunga ka-om ṭhak sik jo chei.”

⁴¹Khava sōa Jordan Tuidung nisōting khan Moses’n khōpui 3 aṭhen a ada hei

⁴²khana khan mi inkhat in ama inrepui changlo inkhat manhret theiloa athat jo’nchu ama kha katlân inhlut thei sik khana inhukthei sik a kae. Khava khōpuihei kâra inkhat a katlân inhlut thei sik khana that yamak jo ninga kae.

⁴³Reuben phunghei sik a nêrdi tlângphaia Bezer khōpui; Gad phunghei sik a Gilead ramṭhen shunga Ramoth; khana Manasseh phunghei sik a Bashan ramṭhen shunga Golan kha leika-om hei.

⁴⁴Moses’n Pathen dân leh mantheina hei kha Israel mipui hneng aleipek hei.

⁴⁵Hivahi Egypt a inphut anheisōk kahnunga khana Bethpeor khōpui leh hmai inhnget, Jordan Tuidung nisōtinga phaichama anleiom lai ama’n hiva dânhei hi aleipek hei kae. Hivahi Heshbon khōpuia vai leikarôn Amorhei reng Sihon ramṭhen shunga kae. Egypt a inphut anheisōk a khan Moses leh Israel mihe’n ama kha hmaimôk anleipek a kae.

⁴⁶

⁴⁷Anmani’n aram leh Jordan nisōtinga ka-om Amorhei renglak, Bashana Reng Og ram kha anhlō pek hei.

⁴⁸Hiva ram hi Arnon Tuidung panga Aroer khōpuia inphut sak tinga Sirion Tlâng, Hermon Tlâng tium inhret, sorna hlamdung katlung kae.

⁴⁹Hivahi Jordan Tuidung nisōtinga ramtlâk akhenga khana thlang tinga Tuipui Kathi katlung khana nisōtinga Pisga Tlângkung katlung ahōmsa a kae.