Read Komrem DÂNRABU INHNINA 5 Bible Online

DÂNRABU INHNINA 5 - Komrem bible

DÂNRABU INHNINA 5

¹Moses’n Israel mi rakip abek mantûp heia anhnenga aleihri, “Israel mihei, tuning ke’n kapek sik chei dân rakip hei hi rangei ruh. Inchu ruh khana nanjui theina sik a intluk ruh.

²RŌNGPU ni-Pathen in Sinai Tlânga intepna inkhat aleinei,

³nipahei rōk leh changmak, tâk tuninga alaka-om eini nikhenga le’m kae.

⁴Khava tlâng chunga khan RŌNGPU’n nanhnenga hmei kâra inphut hmaichanga ṭong aleihri.

⁵Khava lai khan ama’n nanhnenga heimo ahri kha mantheina sik cheia kei RŌNGPU leh nankâra leikangir enga kae, ajârchu nangni’n hmei kha nanlei ṭit a tlâng chunga khan leike mak cheia kae. “RŌNGPU’n aleiti,

⁶‘Sōk nanlei changna Egypt ram a inphut nankahuksōt, kei hi RŌNGPU nan-Pathen eng kha kae.

⁷“‘Kei tei loa pathen lak kamuk mak ruh.

⁸“‘Marvâna a-emak leh raleia a-emak leh ralei thōia tui shunga heikhat lim nanbing sik a syem mak ruh.

⁹Lim heikhat hmaikunga inkun mak ruh khana kamuk mak ruh, ajârchu kei RŌNGPU nan-Pathen eng kae khana anikadōi inkhatbek thōk hnâm tor mak eng. Ani kahōt hei chunga leh ansōn khang 3 leh manlihei chunga karâkna kahei masōk a kae.

¹⁰Tâk kei inlungset leh kadân kajuihei chunga chu khang alishing lishing hnenga kalungsetna kamalâra kae.

¹¹“‘Ṭhatmak mantlukna a kei rahming phâkmak ruh, ajârchu kei RŌNGPU nan-Pathen in karahming môksek a akaphâk hei kha karâkna kapek sik hei.

¹²“‘Kei RŌNGPU nan-Pathen in ṭong kapek chei kapōa Châmhngat kani ning kha nit ruh khana inthenga hmang ruh.

¹³Nanṭōn tlona sik a ni 6 nannei, heirakip nantlo sōna sik kanikhō nannei,

¹⁴tâk ni 7 changna khachu kei hnenga a’ntōksōt Châmhngat kani ning kae. Khava ning ṭōn heite nanta tlomak sik kae — nangni, nansa, nansōk, nanran, nanram shunga ka-om khōhmehei anchanga. Nangni tatlo kapōa nansōk he’m a’nhnga sik hei kae.

¹⁵Nangni Egypt a sōk leikachang chei khana RŌNGPU nan-Pathen ke’n karathahrat leh katorna vâng kaheiṭhōisōt chei kha mandonsōt ruh; Khava jâra Châmhngat kani hi serna sik a ṭong kapek chei kae.

¹⁶“‘RŌNGPU nan-Pathen ke’n ṭong kapek chei kapōa, nannu nanpa kaja hei ruh, kha achang inchu heirakip nangni sik a akaṭha kachang sik khana ke’n kapek chei ram shunga pha kasôttak ka-om sik chei.

¹⁷“‘Mi that mak ruh.

¹⁸“‘Jông mak ruh.

¹⁹“‘Inru mak ruh.

²⁰“‘Tu inkhat dik loa themmô pek mak ruh.

²¹“‘Mihlop nuhmei madu mak ruh; a-inn, aram, asōk, aran, ashakōrtung, khana anei heikhat kha madu mak ruh.’

²²“Nangni tlâng chunga nanlei intûp pha, RŌNGPU’n nankhenga hnenga aleipek chei kha hiva ṭongpek-hei hi kae. Ama’n hmei leh sumtuk insâtak kâra inphut rasa inhnaktak a aṭonglai khan hiva ṭongpek hi aleipek chei kae, aralak om mak. Khava sōa hlungpek 2 chunga amazet a apek enga kae.

²³“Tlâng akhenga hmei asuk lai inthim kâra inphut rasa kha nanlei thei, nanhlam kakeihei leh nanphung lukaching hei kha kahnenga heikahong hei

²⁴khana anleiti, “Hmei kâra inphut ṭong aleihri kha kanthei pha RŌNGPU ni-Pathen in alûrna leh alenna kha aleimanhmu ung.

²⁵Tâk heisa mo avea thina kha nithōk nôk sik? Khava ṭit ka-om tak hmei khan athat sik me. RŌNGPU ni-Pathen ṭonghri avea nithei nôk inchu kathi nger sik jo me.

²⁶Mihring tu inkhat in hmei kâra inphut akahring Pathen ṭonghri atheisōa kahringa aka-om nâk jo mo?

²⁷Moses, inle roh, RŌNGPU ni-Pathen in ahri rakip kha varangei roh. Khava sō leh hei inle ina, heimo ahri seng kha keini hneng amanthei roh. Keini’n kanrangei sik a kha kanjui sik.’

²⁸“RŌNGPU’n hivahi athei pha, kahnenga aleiti, ‘Hiva mihei ṭonghri ke’n kathei jo, khana anmani kadik-hei.

²⁹Hiva kapōa ahei tik a anmandon ṭhak inchu nu! Anmani leh ansōnhei sik ahei tik a akaṭha achangna sik a ankaja ṭhak enga kaṭong pek rakip anjui inchu anmani leh ansōn anpârhei sik a kaṭha sik.

³⁰Se ina anpōn innheia ani’nlena sik hripek hei roh.

³¹Tâk Moses nang chu, kahnenga hin om roh, kadân leh kaṭong pek rakip nang kapek sik che. Khahei kha ke’n kapek sik hei ram shunga anvajuina sik, mipui manthei hei roh.’

³²“Israel mipuihei, RŌNGPU nan-Pathen ṭong pek chei rakip kha tlo ngerna sik intluk ruh. Adân inkhatbek juimak tlomak ruh.

³³Nansik a heirakip aṭhatna sik leh nanta hlō sik ram shunga nan-om ṭhak theina sik a, khahei rakip kha jui ruh.