Read Komrem DÂNRABU INHNINA 6 Bible Online

DÂNRABU INHNINA 6 - Komrem bible

DÂNRABU INHNINA 6

¹“RŌNGPU nan-Pathen in nangni manthei sik a kahnenga ṭong aleipek eng dân rakip kha hihei hi kae. Nangni’n nanta hlō sik ram a khan nanhlut mak hma hihei hi jui ruh.

²Khava ram a khan pha kasôttak nan-om theina sik a, nangni leh nansōn he’n kapek chei dân rakip hei hi nantajui sik khana RŌNGPU nan-Pathen kha nantakaja sik kae.

³Israel mipuihei, khahei kha rangei ruh khana jui hei ruh! Khan chu nangni sik heirakip kaṭha sik, ratha kaneitak jât hongkachang sik chei khana nipusōnhei Pathen, RŌNGPU intepna kapōa khava ram thai omna leh kara sōkna khan ka-om sik chei.

⁴“Eh Israelhei hivahi rangei ruh! RŌNGPU kha, RŌNGPU rōk kha ni-Pathen kae.

⁵RŌNGPU nan-Pathen kha nanmalung akhenga, nanrathla akhenga, khana nanhratna akheng vânga lungset ruh.

⁶Tuning ke’n kapek chei ṭongpek-hei hi mahngi hêrmak hei ruh.

⁷Hihei hi nansahei manthei hei ruh. Nan-inna nan-omlai, vânga nan-omlai, châm nan-inhngat lai khana ṭōn nantlo lai ave-avea tei malet hei ruh.

⁸Mandon ṭhakna sik heia nanbân chunga khit hei ruh khana nanmachea khit hei ruh.

⁹Nan-inn kot khâr kacho heia leh nankekot heia mazet hei ruh.

¹⁰“RŌNGPU nan-Pathen in nanpu nanpa Abraham, Isaac khana Jacob hneng ale’ntep kapōa, nangni’n nantasyem mak akalen leh akakhang khōpui leh inṭhōia ram kha apek sik cheia kae.

¹¹Innshung heia nangni tadamak neinâk kaṭha kasip sik hei, khana nanta khōrmak tuikhurhei, nanta lingmak vomhrui leh olive thei rahōn ka-om sik hei. Khava ram a khan RŌNGPU nan-Pathen in aheiṭhōi chei pha nantasâk hnōm rakip nansâk sik jo.

¹²Nansōk changna Egypt ram a inphut nanhei kaṭhōisōt RŌNGPU kha mahngi makna sik a intluk ruh.

¹³RŌNGPU nan-Pathen kha kaja ruh, ama rōk kha kamuk ruh, khana ama rahming rōk a intepna nei ruh.

¹⁴Pathen ralak kamuk mak ruh, nanhneng vena ka-om mihei pathenhei kamuk mak ruh.

¹⁵Pathen ralak-hei nankamuk inchu, RŌNGPU hnuknat hmei kapōa nankadōia kajōng sik a kha asuk manhmang pet sik chei, ajârchu nankâra ka-om RŌNGPU nan-Pathen khan, ama kadōi inkhatbek madimmak heia kae.

¹⁶“Massah hmun a nantatlo kapōa, RŌNGPU nan-Pathen kha enmansin mak ruh.

¹⁷Ama’n apek chei dân rakip jui ngerna sik intluk ruh.

¹⁸RŌNGPU tahri akaṭha leh akadik kha tlo ruh, khan chu nangni sik heirakip kaṭha sik. RŌNGPU’n nanpu-nanpahei hneng a’ntepna ram kaṭha kha nanchen thei sik a kae,

¹⁹khana ama’n ṭong ale’ntep kapōa nan-inrepuihei kha nanhnongsōt tor sik hei.

²⁰“Hnunga nansa he’n ander sik chei, ‘Heijâra mo dânhei seng hi juina sik a RŌNGPU ni-Pathen in apek me?

²¹Khava pha anhnenga hripek hei ruh, ‘Keini Egypt rengpa sōk leikachang ung, khana RŌNGPU’n aratha hratna vâng alei huksōt ung.

²²Ama’n ṭōn-inlak atlo hei khana Egypt hei hneng, anrenghei hneng leh anṭōnpui karôn rakip hei hneng ṭit ka-om tak ṭōn atlo hei kha kanhmit khet a kanleihmu.

²³Hiva hmun a hin keini heiṭhōina sik a khana ama’n nipusōnhei hneng tlopek sik a ale’ntepna, hiva ram hi keini pekna sik a, Egypt a inphut aleimasō ung.

²⁴Khava sōa RŌNGPU ni-Pathen khan hiva dânhei seng hi juina sik leh ama kajana sik a ṭong aleipek ung. Eini’n khanga nitlo’nchu nijât chunga a-ensui ṭhak sik me khana amanhao ṭhak sik me.

²⁵Pathen ṭongpek senghei hi nijui inchu, nichunga amalung katlâi sik.’