Read Komrem DÂNRABU INHNINA 7 Bible Online

DÂNRABU INHNINA 7 - Komrem bible

DÂNRABU INHNINA 7

¹“RŌNGPU nan-Pathen in nan-omna sik ram a aṭhōi sik chei, khana inphut a jât katamtak ahnong sōt sik hei. Ram kajōna nanse pha, nangni kanek a akalen leh ratha kanei jât 7 ahnong sōt sik hei: Hit, Girgash, Amor, Canaan, Periz, Hiv khana Jebush-hei.

²RŌNGPU nan-Pathen in hiva mihei hi nangni ratha neina thōia ada jo heia nantor jo hei pha, ankhenga nanta thatpet sik hei kae. Anmani leh inmatna syem mak ruh khana lungsetna malârmak ruh.

³Anmani inkhatbek ompui mak hei ruh, khana anmani inkhatbek nansahei man ompui mak hei ruh,

⁴ajârchu pathen lak kamukna sik a RŌNGPU a inphut nansahei kha anṭhōisōt sik hei. Khanga asōk inchu, RŌNGPU kha nanchunga ahnuk hongkana sik a kha manhret manloa asuk manhmang sik chei.

⁵Khava jâra anmaichâm vōk mathlek pek hei ruh, anhlung kacho intheng kha vōk mannōi pek hei ruh, Asherah pathennu limhei tuktan hei ruh khana khahei limhei kha ro pek hei ruh.

⁶Hihei hi tlo hei ruh ajârchu nangni RŌNGPU nan-Pathen ta chei kae. Raleichunga mihring hiseng kâra ama’n ami sik a ahlopdet a akadeisōt jo chei kae.

⁷“Jât-hlop mihei nangni’n nankhe hei jâra RŌNGPU’n alungset cheia akadeisōt chei changmak; nangni raleichunga akatlômpen leikachang chei.

⁸Tâk RŌNGPU’n nangni alungset chei khana nanpu-nanpahei hnenga ale’ntepna kha hme asō hnōm. Khava jâra aratha hratna vâng ahuksōt cheia Egypt rengpa sōk changna inphut ahei masōsōt chei kae.

⁹RŌNGPU nan-Pathen hi ama rōk Pathen kae khana taksenthei kae ti hi mandonsōt ruh. Ama inlungset leh aṭongpek kajuihei chunga khang lishing katlunga a’ntepna ajuia alungsetna amalâra kae,

¹⁰tâk ama kahōt hei chunga karâkna pek sik a inkei-chiona neimak ning.

¹¹Khava jâra tûnchu, mantheina chei kha jui ruh; tuning kapek chei dânhei seng hi jui ruh.

¹²“Hiva ṭongpek-hei seng hi taksentak a nanjui inchu, RŌNGPU nan-Pathen khan nangni leh ale’ntepna chunga ahnōm ṭhak sik khana alungsetna inthlengmak kha nanhnenga amalâr ṭhak sik.

¹³Nanpungna sik leh sa katamtak nanneina sik alungset sik cheia kha mahâmṭhat apek sik chei; hmuchi-sachi, vomhrui ju, olive thaitui nanneina sik nanhlei hei kha vâng apek sik hei. Ran leh kemōng katamtak apek cheia vâng apek sik chei. Nanhnenga pek sik a ama’n nanpu-nanpahei hneng ale’ntepna ram shunga khan hiva mahâmṭhat seng hi apek sik cheia kae.

¹⁴Nangni mahâmṭhat katamtak apek chei kapōa raleichunga mihei pek mak ning. Nangni leh nanran inkhatbek akaching om mak ning.

¹⁵Egypt ram a antaratō kapōa nanchunga hrise heite heirônsōt mak ning, RŌNGPU’n natna rakip a inphut ahrung sik chei, tâk hihei hi nankadōihei chunga amathlung sik.

¹⁶RŌNGPU nan-Pathen in nangni ratha neina thōia ada jât rakip suk manhmang hei ruh, anhnenga lungsetna heite malârmak ruh. An-pathen kamuk mak ruh, ajârchu khavakha thitheina tak kachang sik.

¹⁷“Hiva jât-hei hin nangni akatam ankhe chei jâra hnongsōt tor mak hei ni’ung tia nanbinga ṭimak ruh.

¹⁸Anmani ṭitmak hei ruh; RŌNGPU nan-Pathen in Egypt reng leh amihei seng hnenga aleitlo kha mandonsōt ruh.

¹⁹Nangni masōsōtna sik a aratha hratna leh atorna vâng khana nanhmit khet a nantalei hmu jo ṭit ka-om tak hrise, ṭōn-inlak leh det-hlana hei kha mandonsōt ruh. Egypt hei asuk manhmang hei kapōa, tûn nangni taṭit, hiva mi rakip hei hi asuk manhmang sik jo hei.

²⁰Khava kakhea ankâra ṭit-inpirna amasō sik khana akatlânsōt hei leh ale’nthup hei kha asuk manhmang sik hei.

²¹Khava jâra anmani ṭitmak hei ruh. RŌNGPU nan-Pathen khan a-ompui chei; ama chu Pathen kalen leh ṭit nger sik inkhat kha kae.

²²Nangni’n hma nanjōn chenna ama’n ajing ajînga hiva jât-hei hi ahnong sōt sik hei. Vōi khat rōk a suk manhmang tor mak tin chei, ajârchu khanga nantlo’nchu ramshahei hong katam sik heia kha nangni sik hong kakhôk sik.

²³RŌNGPU’n nankadōihei kha nantorna thōia ada sik hei khana suk manhmanga an-om mak hma seng ṭit-inpirna amannei sik hei.

²⁴Anrenghei kha nangni ratha neina thōia ada sik hei, khana mahngia ka-om sik jo hei. Tûte’n nangni kha’m tor mak tin chei; inkhat et nansuk manhmang sik hei.

²⁵Anlimsyem hei kha ro hei ruh. Anchunga sana dangkahei kha madu mak ruh; nansik a inlomak ruh. Nanlo’nchu, khavakha akaṭhamak tak kachang sik, ajârchu RŌNGPU’n limsyem ahōt a kae.

²⁶Hiva limsyem heikhat nan-innshunga heichoi mak ruh, nantlo’nchu anchunga hâksêrna akatlung kapōa nanchunga katlung sik. Hiva limsyemhei hi nantahōt sik hei khana nanta mater sik hei kae, ajârchu anmani hei hi RŌNGPU hâksêrna thōia aka-om hei kae.