Read Komrem DÂNRABU INHNINA 8 Bible Online

DÂNRABU INHNINA 8 - Komrem bible

DÂNRABU INHNINA 8

¹“Nanhringna sik, nanpungna sik, RŌNGPU’n nanpu-nanpahei hnenga ale’ntepna ram kha nanhlōna sik, tuning nangni kapek chei dân seng hi taksentak a jui ruh.

²Heikhonga mo hiva kum 40 nêrdiram a hlam hro kaseitak RŌNGPU nan-Pathen in aheikei chei kha mandonsōt ruh, heimo tlo sik nanta madu khana aṭongpek nantajui nâk sik mo ti manhretna sik, nangni enmansinna intak kha ajōng tira kae.

³Vonṭâm amande chei, khana nanpu nanpa he’n anta leisâk phung hêrmak thlai sâk sik a manna apek chei. Ama’n mihring hringna hi thlaisâk rōk a in-ngai sik changmak, tâk RŌNGPU tahri rakip chunga in-ngai sik kae ti mantheina sik a hivahi aleitlo kae.

⁴Hiva kum 40 shunga hin nanpōn inhler mak hei, khan chu nanke inthling mak hei.

⁵Mipa inkhat in asahei amanse hei kapōa, RŌNGPU nan-Pathen khan nandikna sik a karâkna apek chei kha mandon ruh.

⁶Kha achang jâra, RŌNGPU ṭong pek chei kapōa nangni’n tlo jo ruh: adânhei dungjuia om-una aṭong jui ruh.

⁷RŌNGPU nan-Pathen in ram thai omna aheiṭhōi jo chei — tuipûtna leh tuidung lōngna, ralei thōia tuiridung hmebunga leh phaicham heia hongpûtna khan;

⁸gehu leh bunîm, vomhrui thei, theichang, kapothei, olive khana khōihning sōkna ram a khan.

⁹Khana khan vonṭâm demak tin chei khana heite vâtmak tin chei. Ahlunghei kâra thir ka-om hei; ahmebung heia khan sum-êng kasōk kha nanlōk thei sik.

¹⁰Nantasâk hnōm rakip nannei sik, khana ram kahōi apek chei jâra khan RŌNGPU nan-Pathen kha nanmanpâk sik.

¹¹“RŌNGPU nan-Pathen kha mahngi hêrmakna sik tlo ruh; tuninga kapek chei adânhei hi juiloa om mak ruh.

¹²Nantasâk hnōm rakip nannei pha, khana omna sik inn kaṭha nansak hei pha

¹³khana nanse leh kemōnghei, sana dangka, nannei heirakip ahong pung pha,

¹⁴nan-inlensak makna sik khana nansōk changna Egypt a inphut nankahuksōt RŌNGPU nan-Pathen kha mahngi makna sik intluk ruh.

¹⁵tûr kanei mari khaiphâr leh âipui omna nêrdiram kalen leh ṭit ka-om shunga ama’n aleiṭhōisōt chei. Khava ram kachâr tui om makna khan hlungpuia inphut nangni sik tui amanlōng pek chei.

¹⁶Nêrdiram a khan nangni tasâk sik nanpu nanpa he’n antasâk phung hêrmak manna apek chei. Hnunga atorna, akaṭha mahâmṭhat pekna sik cheia, nangni enmansinna sik a nanchunga de intak ajōng tira kae.

¹⁷Khan chu, nanbinga nanhratna leh nantorna vânga neina, haona nantatlosōt kae tia nantamandon hêrmak sik kae.

¹⁸Nangni haona sik rathahrat nankapek khachu RŌNGPU nan-Pathen kae ti hi mandon ruh. Ama’n hivahi atlopek chei ajârchu nanpu-nanpahei leh ale’ntepna kha tuning katlung ajuia kae.

¹⁹RŌNGPU nan-Pathen kha mahngi hêrmak ruh, pathen lak kamukna sik leh razenna sik a inhesōt hêrmak ruh. Khanga nantlo’nchu, nangni suk manhmang nger sik chei kae tia tuning ṭong hi kapek chei kae.

²⁰RŌNGPU kha aṭong nanjuimak inchu, nantajōn sik ram a jât-hei asuk manhmang sik hei kapōa, nangni asuk manhmang sik cheia kae.