Read Komrem DÂNRABU INHNINA 9 Bible Online

DÂNRABU INHNINA 9 - Komrem bible

DÂNRABU INHNINA 9

¹“Israelhei, rangei ruh! Tuning nangni Jordan tuidung re kake sik chei khana nangni kanek a akatam leh ratha kanei jât-hei ram so nanhlō sik. Ankhōpui kalenhei, ankur he’n bōirōk katlunga inshâng hei.

²Mihei so inshâng hei khana kahrat hei; anpum kalen khōhri hei kae. Tûte inkhat innum ankadōia ngir tor mak hei ti kha nangni’n nanlei thei joa kae.

³Tâk tûnchu RŌNGPU nan-Pathen in nangni sik a hmei kasûk kapōa nanhma akase kha nanhmu sik. Ama ṭongtep kapōa anmani nanhnongsōt heia inranga nansuk manhmang theina sik a, nangni hmating nannam pha khan, ama’n re atordek sik jo hei.

⁴“RŌNGPU nan-Pathen in nangni sik a anmani ahnong sōt hei sōa, nangni rahōi nansōk jâra khava ram kahlō sik a aheiṭhōi chei kae tia hrimak ruh. Kha changmak, mihei kha anṭhatmak jâra nan-RŌNGPU’n nangni sik a ahnong sōt sik hei kae.

⁵Nangni ṭhatna jâra a-emak leh akadik nantlo ti jâra RŌNGPU’n anram kha amanhlō chei changmak. Anmani anṭhatmak jâra RŌNGPU’n ahnong sōt sik hei kae khana nanpu nanpa Abraham, Isaac khana Jacob hei hneng intepna aleinei kha amathlung hnōm jâra kae.

⁶Nangni rahōi nansōk jâra hiva ram kaṭha hi RŌNGPU’n apek chei changmak ti hi nanta manchên sik kae. Changmak, nangni rahe kase mi chei kae.

⁷“Nêrdiram a nan-RŌNGPU Pathen ahnuk nanta mannat kha mahngi mak ruh. Egypt ram nanhei dahlona inphut hiva hmun nanheitlung ning katlung ama nan-indōipui ṭhak a kae.

⁸Sinai tlânga kapha’m nangni’n RŌNGPU ahnuk nanmannat — nangni suk manhmangna thei katlunga ahnuk leikana.

⁹Nangni leh RŌNGPU intepna amazetna hlungpek 2 kalo sik a tlâng chunga khan leikase eng. Khana khan sûn leh jân ni 40 heite sâk lo inloa leika-om eng.

¹⁰Khava sōa nangni’n tlâng chunga nan-intûp ning hmei kâra inphut ṭong aleihri ṭong kha akut khet a hlungpek inhnia amazet a RŌNGPU’n kei aleipek eng.

¹¹Kadik, khava sûn leh jân ni 40 a’nchai pha RŌNGPU’n khava intepna a’nzet hlungpek 2 kha kei aleipek eng.

¹²“Hivasōa RŌNGPU’n kahnenga ahri, ‘Tûntak hin tlânga inphut ṭumsuk roh, ajârchu nang in Egypt a inphut naheiṭhōi mihei dikmak jo heia ṭhatmak antlo jo. Ke’n anmani tatlo sik a ṭong kapek heia inphut inhesōt hei, lim inkhat anbing sik a ansyem jo.’

¹³“RŌNGPU’n kahnenga ahri nôk, ‘Hiva mihei hi heituk a rahe kasehei mo ti ke’n kamanhret.

¹⁴Kei khâmna sik a eitlo mak jo roh. Tûte’n anmani anmandonsōt makna sik hei manhmang pet sik heia kamandon jo. Khava sōa ke’n nang chu anmani kanek a akatam leh ratha kanei jât inkhat hei pa kamanchang sik che.’

¹⁵“Intepna inzet hlungpek 2 kha kahei choia tlânga inphut heikaṭumsuk eng. Tlânga inphut a hmeimale heikajōng inthla.

¹⁶RŌNGPU nan-Pathen in apek chei ṭongpek kha nangni’n leijui mak jo chei ti hi ke’n kamanhret, khana sehratche lim sum-êng vâng nansyema ama kadōia ṭōnse nanleitlo jo.

¹⁷Khava jâra nanhmai kunga hlungpek hei kha ahar-ahak a kadengkhōi heia kae.

¹⁸Khava sōa vōi khat nôk ke’n RŌNGPU hmaikunga inkun enga sûn leh jân ni 40 heite sâk lo inloa leika-om eng. Ke’n hiva katlona ajârchu nangni’n RŌNGPU kadōia setna nantloa ahnuk nanleimannat pek a kae.

¹⁹RŌNGPU ahnuknat inhnak kha kalei ṭit hêra kae, ajârchu nangnihei suk manramna sik katlunga ahnuk leikana a kae; tâk RŌNGPU’n kaderna hei kha ave nôk a arangei pek eng.

²⁰RŌNGPU’n Aaron chunga’m thatna sik katlunga ahnuk kana a kae, khava jâra Aaron sik um kalei derkop pek a kae.

²¹Ke’n nangni tasyem setna neinâk, sehratche limsyem kha kaloa hmeia kahlon manhlut a kae. Khava sōa, ke’n khavakha ahar-ahak a kavōk khōia, kamandia, khava adi kha kava dunga kamantlen jo.

²²“Nangni’n Tabera, Massah, khana Kibroth, Hattaavah a nanlei omlai um RŌNGPU nan-Pathen kha ahnuk nanleimannat pek a kae.

²³Khana nangni navasea, apek jo chei ram kha nanvalona sik a ṭongpek leh inthoia Kadesh Barnea inphut atirsōt lai chei khan, ama nanleidōia kae; ama taksen mak chei khana aṭong juimak chei.

²⁴Ke’n kamanhretna cheia inphut tuning katlung nangni RŌNGPU nanhei dōi ṭhak a kae.

²⁵“Khava jâra RŌNGPU hmaikunga sûn leh jân ni 40 kakhup enga kae, ajârchu ama’n nangni suk manhmang sik a a’ntluk kha kamanhret a kae.

²⁶Khana ke’n kaleider, “Chunghnung RŌNGPU, Egypt a inphut nahratna leh naratha vâng naheiṭhōisōt hei namihei kha nang in suk manhmang mak hei roh.

²⁷Nasōk Abraham, Isaac khana Jacob mandonsōt hei roh khana hiva mihei êngsetna, ṭhatmakna leh setnahei khôksak pek mak hei roh.

²⁸Achangmak inchu, Egypt mihe’n nale’ntepna ram a khan namihei ṭhōitor mak jo hei che anti sik. Anmani’n anti sik, nang in anmani namater hei jâra nêrdiram a that sik a naṭhōisōt hei kae.

²⁹Hei-achang innum, anmani hei hi nami sik a nakadeisōt hei kha kae, narathahrat leh natorna vâng Egypt a inphut naheiṭhōisōt hei kha kae.’