Read Komrem JOHN 1 Bible Online

JOHN 1 - Komrem bible

JOHN 1

¹A’nphutbia ṭong kha leika-om jo; ṭong kha Pathen leh leika-omsap hei; ṭong kha Pathen leikae.

²Ṭong kha anphutbia Pathen leh leika-omsap hei.

³Ama a inphut heirakip Pathen in asyem; asyem rakip ama inṭangna tei loa heite inkhatbek le’nsyem mak.

⁴Ṭong kha hringna heisōkna kae. Khana hiva hringna hin mihring hneng vâr ahei rôn.

⁵Vâr khan khō inthim asat manvâr, khō inthim khan vâr kha tor mak.

⁶Pathen in aṭong karôn mi inkhat arahming John inti ajōngtir,

⁷ṭong kha mi rakip in antheina sik leh antaksenna sik, vâr chungchânga akahrile sik a ajōngtir kae.

⁸Ama chu vâr kha changmak, vâr chungchânga akahri inthang sik a akajōng kha kae.

⁹Raleichunga akajōng mi rakip kasat invâr ama kha vâr kadik khet kha kae.

¹⁰Ṭong kha raleichunga leika-om, Pathen in ama inṭangna vâng vânhnōi asyem, tâk vânhnōi in ama leimanhret mak.

¹¹Ama aram mihei hneng kajōng, tâk ami he’n ama leirahlâng mak hei.

¹²Achang inum, mi ṭhahrep in, ama anlei rahlânga antaksen; khava jâra Pathen sa anchangna sik ratha apek hei.

¹³Anmani khachu ngai dungjuia mihring pa inkhat in amatet heia Pathen sa ahong kachang emak hei; Pathen khet kha anpa leikae.

¹⁴Ṭong kha mihring jōng kachanga maritna leh dikna kasip phet a nikâra ka-om. Alûrna kha kanleihmu, Apa Sapa inkhat rōk achangna aleichen lûrna kha kae.

¹⁵John in ama chungchânga aleihri. Ama kapenga, “‘Ama chu kei kahnunga kajōng, tâk ama kha kei kanek a kalen jôk, ajârchu kei intet mak hma ama chu aleika-omsa kae,’ tia kaleihri kha ama hi kae.”

¹⁶Ama, maritna kasip phet achangna inphut mahâmṭhatna inkhat bânna inkhat eini nikhenga apek me.

¹⁷Pathen in Mosea inphut Dân kha ajongpek me, tâk Jesu Christa a inphut lungset maritna leh akadik kha ajongpek me.

¹⁸Tûte’n Pathen lahmu phung hêrmak. Pathen leh thakhat akae, khana Pa ângshunga aka-om, Sapa inkhat rōk khan Pathen manhretna amannei me.

¹⁹Jerusalema ka-om Jehudi vaikarôn he’n, “Nang tu che mo?” tia ṭong akader sik a Thempuhei leh Levihei anleitir hei.

²⁰John in masôn makna sik a leitlo mak, tâk inthengtak a leh inphôngtak a amasôn hei, “Kei Messiah kha changmak eng.”

²¹“Khan chu nang tu che mo? Elijah che mo?” tia ander. John in amasôn hei, “Kei changmak eng.” Anmani’n ander nôk, “Sânkathem kha che mo?” Ama’n, “Changmak eng,” tia amasôn hei.

²²“Achang inne nang tu che mo?” anti. Ani heikatir hei hneng keini’n kanva masônna sik hei. Nang nabinga tu mo a’nti che?”

²³John in Isaiah sânkathem ṭong kha ahrisōt a: “Rōngpu sena sik hlam mantlun ruh! tia nêrdiram thōia mi inkhat in a-ôn,’ inti kha kei eng kae,” ati.

²⁴Phariseehei tahei tir ṭongkarônhei khan,

²⁵kha achang inchu John hneng, “Nang kadeisōt Messiah kha’m nachangmak a, Elijah kha’m nachangmak a, Sânkathem kha’m nachangmak inchu, heisa mo tui manhlutna ṭōn natlo?” tia ander.

²⁶John in amasôn hei, “Ke’nchu tuia tuimanhlut katlo; achang ravâng nangni’n nantamanhret mak nankâra akangir inkhat ka-om.

²⁷Ama kei kahnunga kajōng; kei chu akekōk hrui kasōt bek sik um karahōi changmak.”

²⁸Hiseng hi John tui manhlutna Jordan tuidung pang nisō rekhat Bethany a akasōk omchen kae.

²⁹Abân kania John in Jesu ahnenga akahong kha ahmua ati, “Vânhnōi setna karôn Pathen Kemōngte kha hin ka-om.

³⁰Ke’n, ‘Kei kahnunga akajōng mi inkhat kha kei kanek a kalen jôk, ajârchu ka’ntet mak hma ama chu aleika-omsa jo kae,’ kalei ti kha ama hi kae.

³¹Ke’n ama tu achang sik leimanhret mak eng, tâk Israel mihe’n ama anmanhretna sik tui inhlut katlo sik a kei akajōng eng kae.”

³²John in sâkhi apek kha hi kae: “Ke’n Rathla kha vaṭhu kapōa marvâna inphut ama chunga ajōng kachu kha kahmu.

³³Khava katlunga ke’n leimanhret mak eng, tâk tuia tuimanhlut katlo sik a anijōng katir Pathen in, kahnenga, ‘Nang in Rathla kha mi inkhat chunga ajōng kaṭum nahmu sik; Rathla Inthenga tui manhlutna akatlo sik kha ama kae,’ atipek eng.

³⁴Khavakha ke’n ama chunga kahmu jo, khana ama hi Pathen Sapa kha kae, tia kamanthei chei kae.”

³⁵Abân kania John in asonle 2 leh khava hmun a leikangir nôk hei,

³⁶Jesu ahnengting akahong kha aleihmu. “Pathen Kemōngte so, son ka-om!” atia kae.

³⁷Sonle 2 hei khan ahri kha antheia Jesu kahnung anjui jo.

³⁸Jesu inhea anmani’n akahnung anta heijui kha ahmua, ader hei, “Nangni’n heimo nantajong?” Anmani’n anmasôn, “Rabbi, nang khon mo aka-om che?” anti. (Rabbi hi Oja, tina kae.)

³⁹Ama’n amasôn hei, “Hong una hong-en ruh!” (Pung 4 radon khōhlei ting jo kae.) Khava jâra anmani kase heia a-omna hmun anhmu jo, khava ning khan ama leh ka-omsap jo hei.

⁴⁰Ankâra inkhat chu Simon Peter naipa, Andrew kae.

⁴¹Inrangtak a, a-upa Simon ahmua ahri pek “Messiah kha kanhmu jo.” (Messiah ti hi Christa tina kae.)

⁴²Ama’n Simon kha Jesu hneng aheiṭhōi. Jesu’n ama a-enna, “Nang rahming hi John sapa Simon che kae, tâk Cephas a’nti sik jo che kae,” ati. (Hivahi Peter tina leh in-angtling hlungpui inkhat tina kae.)

⁴³Abân kania Jesu Galileea se sik a inrei. Ama’n Philip ahmua ahnenga, “Ajui roh,” ati.

⁴⁴(Philip kha Peter leh Andrew omna Bethsaida khōpuia mi kae.)

⁴⁵Philip in Nathanael ahmua ahnenga, “Ama chungchânga Moses’n Dânrabu a amazet leh sânkathemhei talei mazet mipa kha keini’n kanhmu jo; ama kha Nazareth a Jesu, Joseph sapa kha kae,” ati.

⁴⁶Nathanael in ahnenga, “Nazareth a akaṭha heikhat akasōk tor a mo?” ati. Philip in ahnenga, “Hong inna va-en roh,” ati.

⁴⁷Jesu’n Nathanael ahnenga akahong kha ahmu pha, ama chungchâng ṭong ahri: “Enruh, Israel inchêntak inkhat so! Achunga ṭhena heite om mak.”

⁴⁸Nathanael in ahnenga ader: “Heikhong mo namanhret eng?” Jesu’n amasôn, “Philip in abek mak hma che, theichangkung thōia na-omlai khan kahmu che.”

⁴⁹Nathanael in ahnenga amasôn, “Rabbi, nang Pathen Sapa che kae. Israelhei Rengpa che kae.”

⁵⁰Jesu’n, “Theichangkung thōia na-omlai kahmu che kati jâr hrep a nang in nataksen eng mo? Nang in hiva kanek a akalelen ṭōnhei nalahmu sik kae,” ati.

⁵¹Khana ama’n anhnenga ati, “Kadiktak a kahri pek chei kae, marvân inhlânga, Pathen ngevahei khan Mihring Sapa chunga ajōng kaṭum leh akake hei nantahmu sik kae.”