Read Komrem JOHN 10 Bible Online

JOHN 10 - Komrem bible

JOHN 10

¹Jesu’n ati, “Akadiktak kahri pek chei kae: tu achang inum kemōng rōng kot a hlut loa, hlam hlop inkhat a akakea akahlut mi kha inru leh mikachom kae.

²Kot a kahlut mi kha kemōnghei kakhempa kha kae.

³Kekot kahngâkpa khan ama sik kot kha amahlâng pek; ama’n akemōnghei kha anrahminga abek hei pha arasa kha akemōnghei khan anmanhret, khana ama’n aṭhōisōt hei.

⁴Ama’n aheiṭhōisōt hei pha, anhma akeia akemōng he’n akahnung anjui, ajârchu anmani’n arasa anmanhret.

⁵Kemōnghei khan mihlop inkhat kahnung juimak hei ning; jui kanek a, arasa anthei phungmak jâra, ama inphut katlânsōt sik hei.”

⁶Jesu’n anmani hneng hiva tekâk hi ahri pek hei, tâk anmani’n heimo ahri pek hei ti leimanhret mak hei.

⁷Khava jâra Jesu’n ahri nôk a, “Akadiktak kahri pek chei kae: kei kemōng kot eng kha kae.

⁸Kei hma akahong alak-hei seng kha inru leh mikachom hei kae; kemōnghei khan anmani leidon mak hei ning.

⁹Kei kot eng kha kae. Tu achang inum keia kahlut mi kha hukmanhring kachang sik; khana kahlut kasōk sik heia kha kahar dôngna hmun anhmu sik.

¹⁰Inru khachu marûk sik, that sik, khana suk manhmang sik rōk a akajōng kae. Kei chu nangni’n hringna nanneitheina sik, khana khava nantanei kha hringna pui katluk achangna sik akajōng eng kae.

¹¹“Kemōnghei sik akathi ngam, kemōng kakhem kaṭha kha kei eng kae.

¹²Kemōng kakhem khet kachangmak khana kemōng kapu kachangmak nikhō ratha hlō a’npek mi khan, kahne ahong ahmu pha, kemōnghei kha adahlona atlânde jo hei; khava jâra kahne khan ahnong kachek heia atlen jo hei.

¹³Kanikhō ratha hlōa a’npek achang jâra kemōnghei sik khôk sakna neimak khana atlânde jo heia kae.

¹⁴Kei kemōng kakhem kaṭha eng kha kae. Ke’n Pa kamanhret a, Pa’n kei amanhret eng kapōa, ke’n kakemōnghei kamanhret hei khana kakemōng he’n kei ani manhret. Khana kei anmani sik a kathi ngam eng.

¹⁶Hiva kemōng rōng shunga teilo kemōnglak um kalanei hei; anmani’m kavaṭhōi manhlutsa nger sik hei; anmani’n karasa anmanhret sik a kha kahong sik hei, kemōng kakhem inkhat thōia kemōng rup inkhat kachang sik hei.

¹⁷“Pa khan kei alungset eng, ajârchu ke’n kahringkhō kha avea kachen male thei nôkna sik khavakha katōksōt hnōma kae.

¹⁸Kahringna hi keia inphut tûte’n losōt mak. Ke’n kalungdotak a katōksōt kae. Ke’n khavakha tōksōtna leh lo male torna ratha kanei. Hiva tlotorna sik a kapa khan ṭong apek jo eng.”

¹⁹Hiva ṭong jâra hin mihei kâra loi hnia insemṭhenna annei nôk jo.

²⁰Anmani akatam lang in, “Ama ṭai karôn a’nvet kae! Heisa mo aṭong nanta rangei!” anti.

²¹Tâk-kha alak he’n, “Ṭai karôn mi’n hing’hin ṭongtor mak ning! Ṭai khan hmitkacho heikhonga mo amanvâr tor sik?” anti.

²²Khavakha phebi laitak kae, khana Jerusalema Bek-inn Tōksōtna Revei kha anleinit.

²³Bek-inna Solomon sumpuk a Jesu kalônna leika-om,

²⁴khava pha mihei ahnenga hong intûp heia, “Heituk kasôt mo kanmalung namankei chio sik? Nang Messiah che mo, inthengtak a amanthei roh?” anti.

²⁵Jesu’n amasôn hei, “Ke’n kahri pek dek jo chei, tâk nangni’n ataksen mak chei. Ke’n kapa ratha neina vâng ṭōn katlohei khan kei kahlanga ṭong ahri jo;

²⁶tâk nangni’n taksen mak chei, ajârchu nangni kakemōng changmak chei.

²⁷Kakemōng he’n karasa anmanhret, ke’n anmani kamanhret hei, khana anmani’n anijui.

²⁸Ke’n anmani kumsôt hringna kapek hei, khana anmani thihêr mak hei ning. Anmani kha keia inphut tûte’n akasut tor mak hei ning.

²⁹Kapa’n apek eng kha heirakip kanek a kalen chet; khana Pa hrungna heia inphut anmani tûte’n kasut tor mak hei ning.

³⁰Pa kha leh kei inkhat rōk ung kae.”

³¹Khava sōa ama denghlonna sik a mipui he’n hlung anleihrut nôk a kae.

³²Jesu’n anhnenga, “Ke’n tlo sik a Pa tapek eng ṭōn kaṭha hingja nanhmai kunga katlo jo; khava jâr pena mo denghlon sik a nantarei eng?” ati hei.

³³Anmani’n anmasôn, “Keini’n nang ṭōn kaṭha natlo jâra denghlon sik che kantati changmak; tâk nang in Pathen nahmu masi jâra kae! Nang mihring inkhat-hrep che’n, Pathen nabinga inchangsak che!”

³⁴Jesu’n amasôn hei, “Nan-Dân a Pathen tahri, hing’hin inzet: ‘Nangni Pathen chei kae.’

³⁵Ṭong intheng tahri khachu ahei tik a kadik ṭhak ti eini’n nimanhret; khana aṭong intheng karônhei kha Pathen in pathenhei atia kae.

³⁶Pa khan kei akadei enga raleichunga ajōngtir eng kae. Ke’n Pathen Sapa eng kae kati jâra Pathen hnōi nase heikhong mo nantati eng?

³⁷Kapa’n amantlo hnōm eng ṭōn kha katlomak inchu, ataksen mak ruh.

³⁸Ke’n aṭōn kha katloa nantaksen mak enga achang inum, Pa kha keia ka-om, kei hi Pa a ka-om eng ti hi nanmanhret thangna sik kaṭōntlo bek khachu taksen ruh.”

³⁹Vōi khat tlit nôk anmani’n sur sik a anrei nôk, tâk ankut a inphut Jesu indûksōt jo.

⁴⁰John in hma tuimanhlut atlona Jordan rekhat ting Jesu avea inlea vaka-om jo.

⁴¹Mi katamtak ahnenga kahong heia, “John in ṭōn-inlak akalen chu leitlo mak, tâk hiva mipa chungchânga atahri rakip chu kadiksōa kae,” anti.

⁴²Khana ka-om mi katamtak in ama antaksen jo.