Read Komrem JOHN 12 Bible Online

JOHN 12 - Komrem bible

JOHN 12

¹Rakan Kût revei mak hma ni 6 omlai, ama’n akathia inphut amanhring Lazarus omna khō Bethany a Jesu leikasea kae.

²Khana khan khōhlei thlai asâk sik a anmani’n anmantluk pek a, Martha’n razenna kha ale’nthōpui hei; Jesu thlaithleng ka-ô puihei kâra Lazarus le’nveisa a kae.

³Mary in nard thai intheng vâng insyem marim katui mankatamtak litre her khat ahei choia Jesu kechunga akanoa asam vâng ake kha ahni pek a kae. Innshung kha amarim katui khan inhnamsō hêr jo.

⁴Tâk-kha Jesu sonlehei kâra inkhat mikut a akapek sōt sikpa Judas Iscariot khan ati,

⁵“Hiva thai marim katui hi dangka 300 a anjōra misarahei hneng heisa mo antapek mak?”

⁶Ama’n hi ahri hi misarahei lum aloheia changmak, tâk inru inkhat achang jâra kae. Ama’n sêrkōk achoia arachama aleihmang ria kae.

⁷Tâk-kha Jesu’n, “Amanu abinga dahlon ruh! Anei kha ka’nvûm ninga sik inda rasoh.

⁸Ajârchu misarahei kha nanta-ompui ṭhak sik hei kae, tâk kei chu a-ompui ṭhak mak tin chei,” ati.

⁹Mipui katamtak in Jesu Bethany a ka-om ti ṭong anthei jâra anmani kase jo hei, anmani anvase kha Jesu omjâr rōk a changloa Jesu’n thina inphut amanhring Lazarus kha’m anva-en hnōma akase hei kae.

¹⁰Khava jâra thempu kalenhei khan Lazarus kha’m thatsa sik a anmantluk jo,

¹¹ajârchu Jehudi katamtak in Lazarus jâra anhlam kakeihei kha andahlon jo heia Jesu kha antaksen joa kae.

¹²Abân kania khan, Jesu Jerusa-lema kajōng ti ṭong mipui katamtak Rakan Kût sik akahong hei khan anthei jo.

¹³Khava jâra anmani’n kahno bō anchoia intōpui sik a kase heia, “Hosanna! Pathen manpâk rih! Rōngpu rahminga akajōng! Israel Rengpa kha amahâm kaṭha!” tia an-ôna kae.

¹⁴Jesu’n shakōrtung inkhat ahmua achunga kachōng jo, ti chu ṭong intheng in ahri kapōa

¹⁵“Zion khōpui, ṭimak roh! Tûn nanrengpa kha shakōrtung inkhat chunga kachōnga, nahnengting kajōnga kae,”

¹⁶Khava phatak a khan chu Asonle he’n hivahi leimanhret mak hei; tâk Jesu kalûra mathōisōt achang pha khan chu ṭong intheng in achungchânga aleihri dungjuia anmani’n khanga anta leitlo kae tia anmandonsōt jo.

¹⁷Jesu’n thlânna inphut abeksōt a thina inphut amathōlai Jesu hnenga aka-om mipuihei khan omchen kasōk kha anvahri manthang joa kae.

¹⁸Khava jâra mipuihei khan ama anvaratō, ajârchu khava ṭōn inlak-hei kha ama tatlo hei tia anleithei jo.

¹⁹Khava pha Phariseehei inkhat leh inkhat inbektō heia, “Enruh, eini’n heite tlotor mak jo me! Vânhnōi in ama kahnung anjui jo!” anti.

²⁰Revei shunga Jerusalema Pathen inmuk sik a Greek mi ṭhahrep um leikase hei.

²¹Philip (Galilee ram a Bethsaida inphut akahong) hneng anmani kahong heia, “Oja, keini’n Jesu kanhmu hnōm,” anhongti.

²²Philip kasea Andreu hneng amanthei, an-inhnia inṭhōi heia Jesu hneng anvamanthei.

²³Jesu’n amasôn hei, “Mihring Sapa khan lûrna kalentak arahlângna sik pha tûn jōng katlung jo.

²⁴Akadik kha kahri pek chei kae; Gehu hmu sangkhat kha raleichunga atlâk a athimak inchu sangkhat rōk kha khanga ka-om. Khavakha athia achang inchu, kara katamtak amanpunga kae.

²⁵Tu achang inum anhringkhō inner hei khan inhmang sik hei; tu achang inum anhringkhō hiva raleichunga innermak mihei khan kumsôt hringna anhmu sik.

²⁶Tu achang inum kei inzen hnōm mi khan kakahnung ajui nger sik kae, khava jâra kasōkpa kha kei omna hmun a khan aka-om sik kae. Kapa’n kei inzen mi kha akaja sik kae.

²⁷“Tûnchu kei kamalung inrim jo, heimo kahri sik? Hinga mo kati sik? ‘Apa, hiva pha hi kei chunga ajōng mathlung pek mak roh,’ tia. Tâk-kha hiva khōdeng theina pha akathōk sik jâr pena kei akajōng eng kae.

²⁸Apa, narahming jōng manlûr roh!” Khava pha marvâna inphut rasa inkhat in, “Ke’n kamanlûr jo, khana ke’n khang’khan kamanlûr nôk sik,” ajōng tia kae.

²⁹Mipui khava hmun a akangir hei khan rasa kha antheia ṭhahrep he’n, “Khō inri kae,” anti. Alak her khat in, “Marvân ngeva inkhat in a’nbekpui,” anti.

³⁰Tâk Jesu’n anhnenga ati, “Hiva rasa hi kei sik a ajōng kaṭong changmak, tâk nangni sik a kae.

³¹Tûn pha hi raleichung ṭong tanna sik pha jo kae; tûn hiva raleichung vaikarônpa kha nam mathlâk sik jo kae.

³²Kei raleichunga inphut kake pha leh, ke’n mi rakip kahnengting kakei manke sik hei.”

³³(Hi ahria hin, ama khōdeng katheia akathi sik kha ahrina kae.)

³⁴Mipui he’n anmasôn, “Nidân inchu Messiah kha ahei tik a akahring sik a ahri pek me. Kha achang inchu heikhong mo Mihring Sapa kha makheihlona aka-om nger sik kae nati tor? Khava mihring Sapa kha tu mo?”

³⁵Jesu’n amasôn hei, “Vâr kha nankâra pha bongkhat rōkte ka-om sik. Nanchunga khō inthim kha ajōng makna sik nangni’n vâr nanneilai hin nanhlam hro kha manjôn ruh; ajârchu khō inthima ka-om mi khan khonting ajōna akase manhret mak.

³⁶Nangni’n vâr kha nanneilai vâr kha taksen ruh, kha achang inchu nangni vâr mi kachang sik chei.” Jesu’n hi ahrisō kahnunga anhnenga inphut kasesōt a abinga inthup jo.

³⁷Ama’n anhmit hmu khet a ṭōn-inlak rakip hiseng atlosōt ravâng anmani’n leitaksen mak hei,

³⁸Isaiah sânkathem in aleihri kha huitlungna sik a kae: “Rōngpu kanṭong hri tu’n mo ataksen? Rōngpu khan aratha hratna tuhei hneng mo amalâr?”

³⁹Hiva jâra hin anmani’n taksen tor mak hei, ajârchu Isaia’num hing’hin aleihri:

⁴⁰“Anhmit in ahmu makna sik leh anmalung in amanhret makna sik, Pathen in anhmit amancho pek hei, anmalung akhârsi pek hei, khana ke’n anmani kamandamna sik hei kahnenga ho’nle mak hei ning, Pathen in ati.”

⁴¹Isaiah’n Jesu lûrna kha ahmu jâra hivahi Jesu chungchânga ahri kae.

⁴²Kha achang ravâng, ratha kanei Jehudi katamtak in Jesu antaksena kae; tâk Pharisee he’n anmani kha intûpna inna inphut anhnongsōt makna sik hei inphôngtak a achungchâng ṭong leihrisōt mak hei.

⁴³Anmani’n Pathen hnōm pekna kanek a mihring hnōm pekna jôk anmadua kae.

⁴⁴Jesu’n rasa inhnaktak a, “Tu achang inum kei anikataksen mi khan kei rōk ataksen eng changmak, tâk anijōng katirpa kha’m ataksen jo kae.

⁴⁵Tu achang inum kei ani kahmu mi khan, anijōng katirpa kha’m ahmu jo kae.

⁴⁶Kei anikataksen mi rakip inthim kâra a-om makna sik, kei raleichunga vâr inkhat a akajōng eng kae.

⁴⁷Tu mo inkhat in kaṭong atheia akajuimak mi kha ke’n aṭong tanmak ning. Kei raleichung ṭong katan sik akajōng changmak eng, akahuk inhring sik akajōng eng kae.

⁴⁸Khava kei inhlângmak leh kaṭong hri kajuimak mihei khan, anṭong katan sik inkhat annei. Ke’n kahrisōt ṭong hin a’nchai ning anṭong atan sik kae

⁴⁹Hivahi akadik kae, ajârchu ke’n kabing ratha neina kahri changmak; tâk anijōng katirpa kapa khan kahri sik kasōk hei kha amanthei eng kae.

⁵⁰Khana ama ṭongpek khan kumsôt hringna ajōng rôn ti ke’n kamanhret. Khava jâra ke’n kahri hei hi Pa khan hri sik a amanthei eng kha kae.”