Read Komrem JOHN 13 Bible Online

JOHN 13 - Komrem bible

JOHN 13

¹Hivahi Rakan Kût mak hma kani kha kae. Jesu’n hiva ralei hi adahlona Pa hneng ase sik pha hong kahnai jo ti amanhret jo. Ama’n hiva raleichunga ami kachang hei kha ahei tik a alungset hei, khan chu a’nchaina katlunga anmani amalung kase hei.

²Jesu leh asonlehei khōhlei thlai an-o jo. Simon sapa Judas Iscariot in Jesu kha mikut chunga pek sōtna sik lungthim Seitan in amalunga aleidapek dek jo.

³Pa khan ahnenga pui katluk ratha apek ti hi Jesu’n amanhret; Pathen hnenga inphut ajōng leh Pathen hneng akase nôk sik hi amanhret.

⁴Khava jâra dokhâng chunga inphut kangirsōt a, apōnsi vâng intong kha alosōt a, hnina pōn inkhat akhōna akhit a kae.

⁵Khava pha ama’n thlengkông inkhat a tui asun a asonlehei ke asôp inphut a, akhōna pōn akhit vâng khan anke ahni manhi pek jo hei.

⁶Ama Simon Peter hneng aheiphâk jo pha, Peter in ahnenga “Rōngpu, nang in kei ke nasôp sik a mo?” ati.

⁷Jesu’n amasôn, “Tûn, nang in hiva katlo hi lamanhret mak che, tâk hnung leh nang in nahong manhret sik.”

⁸Peter in ahnenga ati, “Nang in ahei tik a kake sôp hêrmak tin che!” Jesu’n amasôn, “Ke’n nake kasôpmak inchu, nang kasonle changmak jo che ning.”

⁹Simon Peter in amasôn, “Rōngpu, kha achang inchu, kake rōk changloa kakut leh kalu’m asôp pek roh!” ati.

¹⁰Jesu’n, “Tu achang inum a’nsi jo mi kha a’nthengsō jo kae, ake rōk tei loa sôp rangei mak jo. Nangni mi inkhat rōk tei loa nankhenga inthengsō jo chei,” ati.

¹¹(Jesu’n mikut a akapek sōt sikpa kha amanhret dek jo jâra “Inkhat rōk kha tei loa nangni nankhenga inthengsō jo chei,” ati kae.)

¹²Jesu’n anke asôpsō pha apōn a’nlo nôk a dokhâng chunga a’n-ongna hmun a in-ong nôk jo. Khana ama’n ader hei, “Tûna ke’n nanhnenga katlo kha nanmanhret mo?”

¹³“Nangni’n kei Oja leh Rōngpu nanti eng, kei khavakha kachang jâra nantati kha kadik a kae.

¹⁴Nan-Rōngpu leh nan-Oja kachang eng ke’n nanke kasôppek jo chei. Khava jâra nangni’m inkhat leh inkhat ke a’nsôppek sik chei kae.

¹⁵Nangni’n kei tatlo kapōa nanhong tlona sik ke’n manhmu theina inkhat kamannei chei kae.

¹⁶Akadiktak kahri pek chei kae: sōk he’n anrōngpu kanek a lenjôk mak hei, khana tirle he’n ankatirpa kanek a lenhêr mak hei.

¹⁷Tûnchu nangni’n hiva dikna hi nanmanhret jo; nangni’n hivahi ṭōn vânga nantlosōt inchu heituk a akahōi sik chei mo!

¹⁸“Ke’n nangni nankhenga chungchânga kahri changmak; ke’n kakadei jo hei kha kamanhret hei. Tâk-kha ṭong inthenga, ‘Kabu kasâkpui mi kha kakadōia inṭang,” inti kha hui akatlung nger sik kae.

¹⁹Omchen kha ahong sōk pha nangni’n “Kei kha kei eng kae,” tia nantaksen theina sik eng, tûnhin kha asōk mak hma kahri pek dek chei kae.’

²⁰Akadiktak kamanthei chei kae; tu achang inum kei mitir inhlâng mi khan kei um arahlâng eng kae, tu achang inum kei inhlâng mi khan anijōng katirpa kha arahlâng kae.”

²¹Jesu’n hiseng ahrisō pha, amalung inrim joa, inphôngtak a “Akadik kha kahri pek chei kae; nangni kâra inkhat in mikut chunga apek sōt sik eng kae,” ati.

²²Tupen mo atina jo ti hi manhret mak heia inhmakban jo hei, khat leh khat le’n entō hei.

²³Asonlehei kâra Jesu talungsetpa inkhat kha Jesu hneng in-onga leika-om.

²⁴Ama hneng khan Simon Peter in alu akachuk a “Tu mo atina der roh,” atia kae.

²⁵Khava jâra ama’n Jesu ahnaia, ader, “Rōngpu, ama kha tu mo?”

²⁶Jesu’n amasôn, “Ke’n buhlom har kōklei shunga kamachea kapek sik mi kha kae.” Khava jâra ama’n buhlom har inkhat aloa amachea, Simon sapa Judas Iscariot kha aleipek jo.

²⁷Judas khan buhlom kha alosōlim leh Seitan ashunga kahlut jo. Jesu’n ahnenga, “Natlo sik kha inranga tlo jo roh,” ati.

²⁸Jesu’n ahnenga ahri kha tûte’n heimo ahrina ti leimanhret mak hei.

²⁹Sonle ṭhahrep in Judas kha ansêr katinta sêrkōk kachoi achang jâra reveia hmangchâk sik a-emak leh misarahei pek sik heikhat incho se rasoh ati kachang sik tia anmandon.

³⁰Judas in buhlom kha arahlâng leh inrangtak a kasesōt jo. Khavakha jân leikae jo.

³¹Judas in adahlonsō hei kahnunga, Jesu’n, “Tûnchu Mihring Sapa lûrna kha hong-inphông jo; tûn ama inphut Pathen lûrna kha hong-inphông jo.

³²Khana Pathen lûrna kha ama inphut a’nphông achang inchu, Pathen in Mihring Sapa lûrna kha abingkhet chunga amanphông sik jo, inrangtak a khanga atlo sik jo.

³³Kasahei, nangni leh omsôt mak jo min. Nangni’n nanjong sik eng; Jehudi hlamkakeihei hneng kaleihri kapōa, nanhnenga kahri pek chei kae, ‘Kei sena sik hmun a khan nangni setor mak chei ning,’

³⁴Khana tûn ke’n nangni ṭongpek ther kapek chei kae: khat leh khat inlungset ruh. Ajârchu ke’n nangni kalungset chei kapōa, nangni khat leh khat a’nlungset nger sik chei kae.

³⁵Nangni khat leh khat nan-inlungset a achang inchu, nangni kasonle chei kae tia mi rakip in anmanhret sik chei.”

³⁶Simon Peter in ahnenga ader, “Rōngpu, nang khon mo akase sik che?” Jesu’n amasôn, “Kei kasena sik hmun a khan, nang in tûn ajuitor mak che ning, tâk hnung leh chu nang in nahei jui sik eng.”

³⁷Peter in ader, “Rōngpu tûn heisa mo kajuitor mak sik che? Nang sik akathi sik a intluk eng!”

³⁸Jesu’n amasôn, “Kadiktak a nang kei sik a akathi sik a a’ntluk che mo? Akadiktak kahri pek che kae: Ârkhōng akhōng mak hma vōi 3 manhret mak eng nati sik eng kae.”