Read Komrem JOHN 14 Bible Online

JOHN 14 - Komrem bible

JOHN 14

¹Jesu’n ahnenga ati, “Nanmalung manrim mak ruh: Pathen taksen ruh, khana ke’m ataksen ruh.

²Kapa inna omna sik den katamtak ka-om, khana kei nangni sik omna hmun intluk akase sik eng kae. Kha achangmak inchu ke’n nanhnenga hivahi kaleihri mak sik kae.

³Khana kavasea nangni sik hmun kavamantluk sō leh jōng inle sik eng khana ka-omna hmun a khan nan-omna sik kahnenga kaṭhōi sik jo chei.

⁴Kasen a hmun jōnna sik hlam kha nangni’n nanmanhret.”

⁵Thomas in ahnenga, “Rōngpu, keini’n nasena sik hmun kha manhret mak ung; khava hmun jōnna sik hlam kha heikhong mo kanta manhret sik?” ati.

⁶Jesu’n amasôn, “Kei hlam leh akadik khana hringna eng kha kae; keia tei loa tûte Pa hneng semak.

⁷Tûn nangni’n kei nanmanhret jo eng, kapa kha’m nantamanhret sik kae, khana tuna inphut chu nangni’n ama nanmanhret jo khana nanhmu jo.”

⁸Philip in ahnenga, “Rōngpu, Pa kha amanhmu roh; khavakha kantamadu pen kha kae,” ati.

⁹Jesu’n amasôn, “Hingtuk pha kasôt nankhenga ka-ompui jo chei; kha’num nantala manhret mak eng mo, Philip? Tu achang inum kei kahmu jo mi khan Pa kha ahmu jo kae. Kha achang inchu heisa mo, ‘Pa kha amanhmu roh,’ nalati?

¹⁰Kei Pa a ka-om eng, khana Pa kha keia ka-om ti hi nalataksen mak mo? Ke’n nanhnenga kahri hei hi, keia inphut ajōng kasōk changmak hei. Keia ka-om Pa khan aṭōn kha a’ntlo kae.

¹¹Kei Pa a ka-om eng, khana Pa kha keia ka-om ti hi ataksen ruh. Kha a-emak leh kaṭōn tlohei jâra hin taksen ruh.

¹²Akadiktak kahri pek chei kae; tu achang inum kei anikataksen mi khan kaṭōn tlohei hi atlo sik; kadik, anmani’n hiva kanek a ṭōn kalen antlo sik a kae; ajârchu kei Pa hnenga kase sik jo eng.

¹³Sapa inphut Pa lûrna kha anhmu theina sik, karahminga nantader rakip kha ke’n katlo pek sik chei.

¹⁴Karahminga hei-achang inum nander eng inchu, khavakha ke’n katlo pek sik chei.

¹⁵“Nangni’n kei nanilungset a achang inchu, kaṭong pek chei jui ruh.

¹⁶Ke’n Pa hneng nangni inthōpui ahlop inkhat akadiktak Rathla kha nanka-ompui ṭhak sik a ajōng pekna sik chei kader sik.

¹⁷Ama kha Pathen chungchânga akadik kaphôngsōt Rathla kha kae. Ama kha vânhnōi in chentor mak, ajârchu hmu um hmutor mak khana manhret um manhret tor mak a kae. Tâk-kha ama’n nangni a-ompui cheia nanshunga a-om jâra, nanmanhret a kae.

¹⁸“Kei kasesōt pha, nangni nanbinga dahlon thangmak chei ning; nanhnenga kajōng nôk sik eng.

¹⁹Pha bongkhat shunga vânhnōi in kei ahmu mak jo ning, tâk nangni’nchu nanhmu sik eng; ajârchu kei kahring jâra nangni’m akahring sik chei kae.

²⁰Khava kani kha ajōng tlung pha leh kei kapa a ka-omje, nangni keia nan-omje, khana nangnia kei ka-omje kha nangni’n nanmanhret sik jo.

²¹“Tu achang inum kaṭong pek hei inhlânga akajui mi kha kei inlungset hei kae. Kei ani inlungset mi kha kapa’n amalungset sik kae; ke’num ama kalungset sik khana ama hneng kei khet inlâr sik eng.”

²²Judas (Judas Iscariot kachangmak) khan ader, “Rōngpu, heikhong mo vânhnōia changloa kanhnenga nabingkhet a a’nlârthei sik che?”

²³Jesu’n amasôn, “Tu achang inum kei inlungset mi khan kaṭong hri ajuia kae. Kapa’n amalungset sik, khana kapa leh kei ahnenga kajōng sik unga kha ama leh ka-omsap sik ung.

²⁴Tu achang inum kei ani’nlungset mak mi khan kaṭong mantheina hi juimak. Khana nangni’n nantathei jo mantheina hi kei ṭong changmak, tâk anijōng katir kapa hnenga inphut akajōng kae.

²⁵“Kei nangni leh nila-omlai hivahi kahri pek jo chei kae.

²⁶Pa khan Inthōpui, Rathla Intheng kei rahminga ajōngtir sik khana heirakip amanthei sik chei khana kaleihri pek chei rakip mandonsōtna apek sik chei.

²⁷“Ke’n kadahlon pek chei khachu mōngna hi kae, kapek chei hi kei khet mōngna kha kae. Vânhnōi tapek chei kapōa kapek chei changmak. Nanmalung mandong mak ruh, ṭi’m ṭimak ruh.

²⁸Hinga kaleihri pek chei, ‘Ke’n kadahlon sik chei, tâk nanhnenga kajōng nôk sik eng,’ kati kha nantheia kae. Nangni’n nanilungset a achang inchu, ke’n Pa hnenga kase sik hi a’npâk jôk sik chei kae; ajârchu kei kanek a Pa kha akalen jôk kae.

²⁹Hivahei hi ahong sōk pha nantaksenna sik, tûnhin heirakip asōk mak hma kamanthei dek chei kae.

³⁰Ke’n nanhnenga kasôttak a ṭong hri tor mak jo ning, ajârchu hiva raleichung vaikarônpa kha kajōng joa kae. Ama’n kei chunga ratha neimak,

³¹achang ravâng ke’n Pa kha kamalungset ti hi vânhnōi in antamanhret nger sik kasōk; hiva jâra Pa ṭongpek eng heirakip kha ke’n katlo kae. “Hong ruh, eini hinna inphut se jo rih.