Read Komrem JOHN 15 Bible Online

JOHN 15 - Komrem bible

JOHN 15

¹“Kei vomhrui kadiktak eng kae, khana kapa’n arahōn kathlō kha kae.

²Ama’n keia ka-om abâk a’nramak rakip kha atuk mathlâk hei, khana kara kanei abâk seng kha a’nthengna sik leh akara atam chetna sik amanhleng heia kae.

³Nangni chu ke’n mantheina kaleinei jo chei khana amanthengsa jo chei kae.

⁴Keia omṭhak ruh, khana kei nangnia ka-om ṭhak sik eng. Vomhrui bâk inkhat kha abinga kara nei tor mak; athlurpuia akai leh rōk khan a’nrator kae. Kha leh in-angtlinga nangni keia nan-om ṭhak mak inchu kara nei tor mak tin chei.

⁵“Kei vomhrui eng kha kae, khana nangni abâk chei kha kae. Keia aka-om ṭhak hei leh kei anmania aka-om ṭhak eng, khahei kha’n kara katamtak annei sik; ajârchu kei tei loa nangni’n heite tlotor mak tin chei.

⁶Tu achang inum keia aka-om ṭhak mak khachu abâk inkhat kapōa hlonsōt a ka-om khana kachâr ri jo; khang khava bâk-hei kha chom mantûp a hmeishunga anhlon manhlut ri hei khana khan kakâng jo hei.

⁷Nangni keia nan-om ṭhak a, khana kaṭong nangni shunga a-omṭhak a achang inchu, hei-achang inum nangni’n nanta madu nantader kha nanchen sik.

⁸Kara katamtak nannei jâra kapa lûrna kha a’nlâr kae; khang’khan nangni kei sonle akachang chei kae.

⁹Pa’n kei alungset eng kapōa, ke’n nangni kalungset chei; kalungsetna cheia khan omṭhak ruh.

¹⁰Ke’n kapa ṭongpek kajuia alungsetna a khan aka-om ṭhak eng kapōa, nangni’n kaṭong pek chei nanjui inchu, kalungsetna cheia khan aka-om ṭhak chei kae.

¹¹“Nanchunga ka’npâkna kha a-omna sik, khana nangnihei inpâkna kha pui atluk theina sik, hivahi kahri pek dek chei kae.

¹²Ke’n nangni kalungset chei kapōa, nangni khat leh khat inlungset ruh, ti hi kaṭong pek chei kae.

¹³Mi inkhat in aṭhōnhei sik lungsetna kalenpen anei tor khachu, anmani sik ahringkhō aphesōt kha kae.

¹⁴Nangni’n kaṭong pek chei nanjuia achang inchu, nangni kaṭhōn chei kha kae.

¹⁵Ke’n nangni sōk timak jo chei ning. Ajârchu sōk inkhat in akapu tatlo kha manhret mak; khava kanek a nangni kaṭhōnhei kati jo chei kae, ajârchu ke’n kapa hnenga kathei rakip kha nangni kamantheisō pet jo chei.

¹⁶Nangni’n kei nantakadei eng changmak; nangni nanvase leh kara katamtak kasôttak a a’nra sik a, ke’n nangnijôk kakadei cheia kamanṭang chei kae. Khava jâra hei-achang inum kapa hneng karahminga nantader kha Pa khan apek sik chei.

¹⁷Khava jâra hivahi kaṭong pek chei kae: khat leh khat inlungset ruh.

¹⁸“Vânhnōi in nangni anmater chei inchu, hma inkeitak a kei antahōt eng kae, ti hi mandonsōt ruh.

¹⁹Nangni vânhnōi ralei ta nanchang inchu, vânhnōi in atâ kapōtak a alungset sik chei kae. Tâk-kha ke’n nangni hiva vânhnōi raleia inphut kakadei chei kae, khana vânhnōi ralei ta changmak chei, khava jâra vânhnōi in nangni antahōt chei kae.

²⁰“Sōk-hei kha ankapuhei kanek a akalen jôk changmak hei,” tia kalei manthei chei kha mandonsōt ruh. Anmani’n kei antloset enga achang inchu, nangni’m antasukset sik chei kae; anmani’n kaṭong anjuia achang inchu, nangni ṭong um antajui sik kae.

²¹Tâk-kha nangni keita nanchang jâra, anmani’n nanchunga hiva rakip hi anta hongtlo sik kae; ajârchu anmani’n anijōng katirpa kha manhret mak heia kae.

²²Kei kajōng mak a, anhnenga kaleihri mak achang inchu, anmani’n ansetna jâra masetna antachen mak sik kae; tâk tûnchu anmani ansetnahei kha rangei mandamna sik om mak jo.

²³Tu achang inum kei inter mi khan kapa kha’m amater kae.

²⁴Ke’n anmani kâra tûte taleitlo phungmak ṭōnhei kha kaleitlo mak achang inchu, ansetnahei jâra masetna antachen mak sik kae; tâk tûnchu anmani’n kaṭōntlo kha anhmu jo khana kei leh kapa kan-inhnia anhōt jo ung.

²⁵An-Dân a aleika-om: ‘Anmani’n ajâr kasea anhōt eng,’ tia ale’nzet hi hui atlungna sik a hivahei hi akasōk nger sik kae.

²⁶“Pathen chungchânga akadik inlârpa khana Pa hnenga inphut akajōng Rathla Inthōpui kha kajōng sik. Pa hnenga inphut ke’n nanhnenga kajōngtir sik khana ama’n kachungchânga ahri sik.

²⁷Nangni’m a’nphutbia inphut kei leh ahon’thlop me nichang jâra kachungchânga nanta hri sik jo kae.