Read Komrem JOHN 16 Bible Online

JOHN 16 - Komrem bible

JOHN 16

¹“Nangni nantaksenna kha nanmasō makna sik hivahi kahri pek chei kae.

²Anmani’n nangni intûpna inna inphut anhnongsōt sik chei. Khana nangni kathat mi khan aṭōntlo kha Pathen karazen kae tia anmandonna pha alakahong sik kae.

³Anmani’n ke’m khana kapa’m anmanhret mak jâra, nanchunga hiva ṭōnhei hi anta hongtlo sik kae.

⁴Anmani’n hiva ṭōnhei hi nanchunga anhongtlo pha leh, kaleihri hei kha nanmandonsōtna sik a, hivahi kamanthei dek chei kae. “Nangni leh aka-omsap me nichang jâra, a’nphutbia hivahi leihripek mak chei eng.

⁵Tâk-kha tûnchu anijōng katirpa hnenga akase sik jo eng kae; achang ravâng tûte’n, ‘Khon mo akase sik che?’ tia adermak chei.

⁶Khana tûnchu kamanthei jo chei, khana nanmalung châmna kasip jo.

⁷Tâk-kha akadiktak kahri pek chei kae; kei sesōt sik hi nangni sik a akaṭha jôk kae, ajârchu kei kasemak a achang inchu, Inthōpui kha nanhnenga jongmak ning. Tâk-kha kei kase joa achang inchu, ama kha kajōngtir pek sik che kae.

⁸Khana ama ajōng pha leh vânhnōi ralei mipuihei hin setna leh dikna khana Pathen ṭong tan sik chungchânga anloṭhena kha amalâr manchên pek sik hei.

⁹Anmani’n setna chungchânga anṭhe, ajârchu anmani’n kei ataksen mak hei;

¹⁰anmani akadik chungchânga anṭhe, ajârchu kei kapa hneng kase sik eng, nangni’n ahmu nôk mak jo chei ning.

¹¹Anmani ṭongtan chungchânga anṭhe, ajârchu hiva raleichung vaikarônpa kha aṭong a’ntansōsa jo kae.

¹²“Ke’n hripek sik chei katamtak kanei; tâk tûn nangni ladetor mak tin chei.

¹³Achang ravâng Pathen chungchânga akadik inlârpa Rathla kha ajōng pha, ama’n akadik rakip a hlam akei sik jo chei. Ama’n abing ratha neina ṭong hrimak ning, tâk aṭong thei kha ahri sik khana ajōng katlung sik kha amanthei sik chei.

¹⁴Ama’n kei amanlûr sik eng, ajârchu kei tahri leh mantheina chei kha ama’n alo sik kae.

¹⁵Kapa tanei rakip kha keita kae, khava jâra ke’n kahri kae, ke’n kapek kha Rathla khan a’nloa nanhnenga amanthei sik chei.

¹⁶“Pha bongkhat nangni’n kei ahmu nôk mak jo chei ning; khana khava sōa pha bongkhat sō leh nanhmu sik eng,” ati.

¹⁷Asonlehei kâra ṭhahrep anbinga inder heia, “Hivahi heitina mo? Pha bongkhat eini’n ama nihmu mak sik khana pha bongkhat sō leh eini’n ama nihmu nôk sik, tia amanthei me; khan chu ama’n ahri nôk a, ‘Hivahi kapa hneng kei kase sik jâra kae,’ ati.

¹⁸Hiva ‘pha bongkhat’ hi heitina mo? Ama’n heimo ahrina eini’n manhret mak me!”

¹⁹Anmani’n ahnenga antader hnōm kha Jesu’n amanhret a anhnenga, “Ke’n kahrisōt, ‘Pha bongkhat nangni’n ahmu mak chei ning, khava sōa pha bongkhat sō leh nangni’n nanhmu sik eng,’ tina chungchânga nangni nanbinga a’nder chei mo?

²⁰Akadik kha kahri pek chei kae: nangni ka-ônga kaṭap sik chei; tâk vânhnōi chu a’npâk sik hei kae; nangni chu inrim sik chei, tâk nan-inrimna kha inpâkna ahong kachang sik kae.

²¹Nuhmei inkhat in nai anei sik ting amalung inrim, ajârchu a’nrengna pha kha jōng katlung jo; tâk nai kha aneisō pha anat ade manrim seng kha amahngi jo, ajârchu amanu’n raleichunga nai inkhat anei jo jâra inpâk joa kae.

²²Khang’khan nangni’m kati sik cheia kae: tûn nangni inrim chei, tâk ke’n nangni ka’nhmupui nôk sik chei, khana nanmalung shunga inpâkna kasip sik, nangnia inphut tûte’n antalosōt tor mak sik jo inpâkna kae.

²³“Khava kani kha ajōng tlung pha, nangni’n kei hneng heite adermak jo chei ning. Akadik kha kahri pek chei kae: Pa hnenga karahminga nantader rakip kha ama’n apek sik chei.

²⁴Tûn katlunga hin nangni’n kei rahminga heite lader mak hi chei; nan-inpâkna pui atluk theina sik, der ruh, khana nantahmu sik kae.

²⁵“Ke’n hihei hi tekâk vâng kamanthei jo chei. Tâk-kha Pa chungchâng ṭong kha inthengtak a tekâk loa kahri pekna sik chei pha kha alajōng katlung sik kae.

²⁶Khava kani ajōng tlung pha leh nangni’n karahminga nantader sik jo kae; khana ke’n nangni kahlanga kaderpek sik chei kati changmak.

²⁷Ajârchu Pa ama khet khan nangni alungset chei. Ama’n alungset chei ajârchu nangni’n kei nanlungset eng khana Pa hnenga inphut kei akajōng eng hi nantaksena kae.

²⁸Kei Pa inphut kajōng enga raleichunga jōng katlung jo eng; khana tûn ke’n raleichung hi kadahlona Pa hnengting kase bei sik jo eng.”

²⁹Khava pha asonle he’n ahnenga, “Enroh, tûnchu tekâk loa inthengtak a nahri jo.

³⁰Tûnchu nang in heirakip namanhret ti keini’n kanmanhret jo che; tu inkhat in ṭong ader sik che rangei mak jo. Hivahin nang Pathena inphut akajōng che kae tia taksenna kannei jo che,” anti.

³¹Jesu’n amasôn hei, “Tûnchu nanta taksen jo mo?

³²Nangni nankhenga inchek sik cheia kha nan-inn et a kase sik chei, khana kei kabing rōk a nandahlon sik eng, apha kha hong katlung jo, hinahin hong katlungdek jo. Tâk-kha kadik khet a chu kei kabing rōk a changmak eng ajârchu Pa khan a-ompui eng.

³³Nangni kei leh ni’nchuna inphut lung mōngna nanneitheina sik hivahi kahri pek chei kae. Vânhnōi in nangni khōdeng anmanthei sik che. Tâk nanmalung manngam ruh! Ke’n raleichung hi kator jo kae!”