Read Komrem JOHN 17 Bible Online

JOHN 17 - Komrem bible

JOHN 17

¹Jesu’n hi ahrisō pha, marvânting a-enna ati, “Apa, pha hi jōng katlung jo, Sapa’n nang amanlûr theina sik che, Sapa kha manlûr jo roh.

²Ajârchu nang in ama napek sōt mihei seng kha kumsôt hringna apek theina sik hei, mihring rakip chunga ratha neina kha ama hneng napek jo.

³Khana kumsôt hringna ti hi chu nang, akadik Pathen inkhat rōk, manhret hi leh najōngtir Jesu Christa manhret hi kae.

⁴Nang in tlosōt sik a napek eng ṭōn kha katlo mathluk sō jo; raleichunga nalûrna kamalâr jo.

⁵Apa, ralei insyem mak hma nang leh inṭhōia lûrna nilei neisap kha leh in-anghrep a, tûn nahmai kunga lûrna kha apek jo roh.

⁶“Vânhnōi raleia napek eng mihe’n nang anmanhretna sik che ke’n katlosō jo. Anmani natahei kae, khana kei napek eng kae. Anmani’n naṭong anjui,

⁷khana napek eng heirakip hi nanga inphut akajōng kae ti hi tûn anmanhret jo.

⁸Ajârchu nang in napek eng ṭongpui kha ke’n anmani kapek heia, anrahlâng jo; nang in najōngtir enga nanga inphut kei kajōngna ṭong hi kadik tia anmanhret jo.

⁹“Anmani sik a kader kae. Vânhnōi sik kader changmak, tâk napek eng hei sik a kae, ajârchu anmani nangta hei kae.

¹⁰Kanei rakip hi nangta hei kae; khana nanei rakip kha keita hei kae; khana anmania inphut kalûrna hi a’nlâr kae.

¹¹Khana tûnchu kei nahnenga kahong sik jo eng; raleichunga ka-om hi sôtmak jo ning, tâk anmani chu raleichunga alaka-om hei kae. O A’ntheng Apa! nang leh kei pumkhat nichang kapōa, anmani pumkhat anchangna sik, rahming napek eng, narahming ratha neina vâng anmani hrung hei roh.

¹²Ke’n anmani ka-ompuilai hei napek eng rahming, narahming ratha neina vâng khan anmani kahrunghei. Ke’n kahrungsōt heia, ṭong intheng huitlungna a’nhmang sikpa rōk kha tei loa, inkhatbek inhmang mak hei.

¹³Tûnchu kei nahnenga kahong sik jo eng, khana anmani malung shunga kei inpâkna hi pui katluk a anneitheina sik, ke’n raleichunga hihei hi kahri kae.

¹⁴Ke’n anhnenga ṭongpui hi kapek hei khana vânhnōi in anmani ahōt hei, ajârchu kei vânhnōi ta kachangmak kapōa anmani vânhnōi ta changmak hei.

¹⁵Anmani vânhnōi raleichunga inphut nalosōtna sik heia dermak che eng, tâk Akaṭhamak Inkhatpa inphut nahrung sik hei hi kader che kae.

¹⁶Kei raleichung ta kachangmak kapōa anmani raleichung ta changmak hei.

¹⁷Akadik vâng khan anmani hei hi nahnenga tōksōt hei roh; nang ṭong chu akadik kae.

¹⁸Nang in kei raleichunga najōngtir eng kapōa, ke’n anmani vânhnōi raleichunga katir jo hei.

¹⁹Anmani’m kadiktak a nang hneng an-intōksōt theina sik anmani sik kei kabinga nahnenga a’ntōksōt eng kae.

²⁰“Anmani sik rōk a kader changmak tâk anṭonghri katheia kei kataksenhei sik a’m kadersa kae.

²¹Anmani ankhenga pumkhat anchangna sik a kader che. O, Apa, nanga kei ka-om enga, keia nang na-om kapōa anmani einia pumkhat a an-oma, nang in najōngtir eng hi vânhnōi in anmanhretna sik a kader che.

²²Nang leh kei pumkhat nichang kapōa, anmani pumkhat anchangna sik napek eng lûrna mama kha ke’n anmani kapek jo hei.

²³Anmani pui katluk a pumkhat rōk anchang theina sik, kei najōngtir eng leh kei nalungset eng kapōa anmani nalungset hei kha vânhnōi in anmanhret theina sik kei anmania ka-om eng khana nang keia ka-om che.

²⁴“Apa! lûrna naleipek eng, khava kalûrna kha anmani’n anhmu theina sik nang in napek jo eng hei kha kei omna hmun a kaman om hnōm hei; ajârchu vânhnōi alei insyem mak hma nalei lungset jo eng.

²⁵Nunchen kadik Apa! Vânhnōi ralei in nang manhret mak hei che, tâk ke’nchu kamanhret che, khana anmani’num nang in najōngtir eng hi anmanhret.

²⁶Nang in kei namalung setna eng kha anmani shunga a-omtheina sik, khan chu kei um anmania ka-om theina sik, nang anmanhretna sik che katlo jo khana kalatlo ṭhak sik.”