Read Komrem JOHN 18 Bible Online

JOHN 18 - Komrem bible

JOHN 18

¹Jesu’n hiva derna aneisō pha, asonlehei leh Kidron kavadung rekhat ting kase jo hei. Khava hmun a rahōn inkhat leika-oma Jesu leh asonlehei khan kahlut jo hei.

²Judas, mikut a akapek sōt sikpa, khan khava hmun kha amanhret ajârchu Jesu’n asonlehei leh khana khan ve katamtak ale’ntûp puiri hei.

³Khava jâra Judas in Rome sepei rup khat, thempu kalenhei, Phariseehei tahei tir Bek-inn kahngâk-hei kha khava rahōna khan aheiṭhōi hei; khana re hmangchâk, thaihmei leh hmeiser invonna kahong hei.

⁴Jesu’n achunga ahong kasōk sik rakip amanhret; khava jâra anhmating kasea anhnenga, “Nangni tu mo nantajong?” ati hei.

⁵“Anmani’n anmasôn, “Nazareth Jesu.” Ama’n, “Kei eng kae,” ati. Akapek sōt sikpa Judas kha anmani leh kangirsap a leika-om.

⁶Jesu’n anhnenga, “Kei eng,” ati pha, anmani ankahnungting inle heia raleia inbok jo hei.

⁷Jesu’n anhnenga ader nôk heia, “Nangni tu mo nantajong?” Anmani’n, “Nazareth Jesu,” anti.

⁸Jesu’n, “Ke’n kei eng kae tia kahri pek jo chei, kei nantajong eng achang inchu, hiva hlop hei hi sesōt hei hi rasoh,” atia kae.

⁹(Ama’n hiva ahrina jârchu: “Apa, nang in napek eng hei seng inkhatbek manhmang mak eng,” aleiti kha hui atlungna sik a kae.)

¹⁰Simon Peter in chemjâm inkhat anei kha aradok a Thempu Kalen sōkpa kōr achang tinga atuk mathlâk pek jo. Khava sōkpa rahming kha Malchus kae.

¹¹Jesu’n Peter hneng, “Nachemjâm kha apaia thōn male roh! Kapa tapek jo eng khōdeng theina kōklei kha ke’n ka-inmak sik a namandon mo?” ati.

¹²Khava sōa Rome remihei, anhlam kakeipa, leh Jehudihei ram kahngâk he’n Jesu kha ansura ankhit jo,

¹³khana anmani’n hmapena Annas hneng anleikei. Ama kha khava kum a Thempu Kalen ahong kachang Caiaphas terpu kae.

¹⁴“Mi rakip sik a mi inkhat athi kaṭha jôk,” tia Jehudi vaikarônhei hneng alei inthei kha Caiaphas hi kae.

¹⁵Simon Peter leh sonle ahlop inkhat in Jesu kahnung anleijui. Khava sonle ahlop kha Thempu Kalen khan kaṭhatak a amanhret, khava jâra Thempu Kalen lâmte katlunga Jesu kahnung aleijui,

¹⁶Peter chu kekot vânga leikangir. Sonle ahlop inkhat khan vângting hong inlea kekot kahngâk sōknu hneng avahria, Peter kha avaṭhōi manhlut jo.

¹⁷Kekot a nuhngâknu khan Peter hneng, “Nang hiva mipa sonlehei kâra inkhat changmak che mo?” ati. Peter in amasôn, “Changmak, Kei changmak eng.”

¹⁸Leikadai hêr, khava jâra sōk-hei leh mi kahngâk he’n hmei ansyema akimvea kangir heia antak anleimanlum. Khana Peter anhnenga vakasea ankâra kangira hmei ava-oa kae.

¹⁹Thempu Kalen khan Jesu hneng asonlehei chungchâng leh ami mantheina chungchânga ṭong ader a kae.

²⁰Jesu’n amasôn, “Ke’n ahei tik a mi rakip hneng inphôngtak a ṭong kahri; mi rakip intûpna Bek-inna leh intûpna innheia kamanthei hei. Ke’n heite marûk a hrihêr mak eng.

²¹Khava jâra heisik a mo kei ṭong nander eng? kaṭong hri kathei mihei kha der hei ruh, heimo ke’n kamanthei hei kha anmani’n antamanhret kae.”

²²Jesu’n hi ahri pha, khava hmun a akahngâk inkhat in, “Nang in Thempu Kalen inkhat khanga narakôk ngam mo!” atia akaben.

²³Jesu’n ama amasôn, “Ke’n heikhat kahri ṭhe achang inchu, khavakha heimo kae, hinna mi rakip hneng hin hri roh. Tâk-kha ke’n kahri kha akadik achang inchu, heisa mo navōk eng?”

²⁴Khava sōa Annas khan Caiaphas Thempu Kalen hneng ama kha ankhit pum a atir jo.

²⁵Peter chu khang’khan kangira hmei a-oa laka-om. Khana mihlop ralak he’n ahnenga, “Nang hiva mipa sonlehei kâra inkhat changmak che mo?” anti. Tâk-kha Peter in ahri manhlema, “Changmak, kei changmak eng,” ati.

²⁶Thempu Kalen sōk Peter in akōr atuk mathlâk pekpa innkō mi inkhat hongkaṭong, “Nang rahōn shunga khan amale kahmu chei changmak che mo?” tia ader.

²⁷Avea Peter in, “Changmak eng,” ati, khava laitak ârkhōng hong kakhōng joa kae.

²⁸Jîngkâr hmatak a Jesu kha Caiaphas inna inphut ram vaikarôn Pilate innpuia anṭhōi jo. Jehudi hlamkakei he’n Rakan Kût thlai ansâk theina sik bekdân dungjuia anmani inthenga an-om sik anmadua reng-innpui shunga chu hlutmak hei.

²⁹Khava jâra Pilate in anmani inhmupui sik a vânga hong kasōk a, “Hiva mipa hi heimo nanta maherna?” ati hei.

³⁰Anmani’n anmasôn, “Hiva mi hin tlomanset aneimak inchu, nahnenga heiṭhōi mak ni’ung.”

³¹Pilate in anhnenga, “Nangni’n nanbinga inṭhōi una nandân dungjuia aṭong tan jo ruh,” ati hei. Anmani’n anmasôn, “Keini’n tûte inkhat thatna sik ratha neimak ung.”

³²(Hivahi heikhonga akathi sik mo tia Jesu’n aleihrisōt kha hui atlungna sik a omchen hi akasōk jo kae.)

³³Pilate kha innpuia kahlut nôk a Jesu abek a, “Nang Jehudihei Reng che kha mo?” tia ader.

³⁴Jesu’n amasôn, “Hiva nader eng hi nabing rōk malunga nader eng mo a-emak leh milak he’n kachungchânga anhri jâra mo?” ati.

³⁵Pilate in amasôn, “Kei hi Jehudi inkhat a nalo eng mo? Najât mihei leh thempu kalen he’n nang hi kakut a anta heipek eng kae. Nang in heimo naleitlo jo?” ati.

³⁶Jesu’n ati, “Hiva raleichung hi kei rengram changmak; hiva raleichung hi karengram achang inchu, Jehudihei kut chunga inpek sōt makna sik kakahnung kajui he’n re anta leitlo sik kae. Hiva raleichung hi kei rengram changmak.”

³⁷Khava jâra Pilate in ama ader, “Khan chu nang reng inkhat che mo?” Jesu’n amasôn, “Nang in kei reng inkhat che nati eng. Hiva akadik inkhat akahri sik jâra kei ajōng inte enga raleichunga akajōng eng kae. Akadik a ka-om seng khan kaṭong anrangei.”

³⁸Khana Pilate in, “Akadik kha heimo?” tia ader. Khava sōa Pilate Jehudihei hneng vângting inle nôk a, anhnenga ati, “Ke’n ama maset manchenna sik ajâr heite hmusōt tor mak eng.

³⁹Tâk-kha nanchôndân dungjuia Rakan Kût nit-lai kurkhum shunga a’nkhum mi inkhat et kamasō ṭhakpek richeia kae. Jehudihei Rengpa kha ke’n nangni sik a kamasō sik nanta madu mo?”

⁴⁰Anmani ka-ông heia, “Changmak, ama changmak! Barabbas jôk kanmadu!” tia anmasôn. (Barabbas hi inru mikachom inkhat kae.)