Read Komrem JOHN 19 Bible Online

JOHN 19 - Komrem bible

JOHN 19

¹Khava sōa Pilate in Jesu kha aṭhōia amanvōk jo hei.

²Remihei khan rahling lukhu inkhat anphera alu chunga anmankhu; anmani’n pōn sendup inkhat anmansia,

³khana ahnenga kahong heia, “Jehudihei Rengpa ahringsei sôt rasoh!” anti. Khana anmani’n ankaben.

⁴Mipuihei hneng Pilate vōi khat kasōk inle nôk a, “Enruh, ke’n ama masetna sik ajâr heite kahmu sōt mak kha man enna sik chei nanhnenga hin kaheiṭhōisōt sik kae,” ava ti hei.

⁵Khang’khan Jesu kha rahling lukhu anmankhua, pōn sendup a’nsia vâng heikasōk jo. Pilate in anhnenga, “Enruh! Mipa kha hin ka-om!” ati hei.

⁶Thempu kalenhei leh bek-inn kahrung he’n ama anhmu pha, an-ôna, “Thingrakea hem mankop roh! Thingrakea hem mankop roh!” antia kae. Pilate in anhnenga, “Ke’nchu ama masetna sik ajâr heite hmumak eng, nangni’n inṭhōi una thingrakea hem mankop jo ruh,” ati hei.

⁷Mipui he’n anmasôn male, “Keini’n dân inkhat kannei, khava jâra ama akathi nger sik kae, ajârchu ama abinga Pathen Sapa eng kae ati.”

⁸Hivahi Pilate in athei pha, ama kaṭichet jo.

⁹Ama innpuia kahlut nôk a Jesu hneng, “Nang khona inphut akajōng che mo?” tia ader. Tâk-kha Jesu’n masôn mak jo.

¹⁰Pilate in ahnenga, “Na’n amasôn mak tin che mo? Nang masōna sik leh thingrakea hem mankopna ratha kanei ti hi mandonsōt roh,” ati.

¹¹Jesu’n amasôn, “Nang in kachunga ratha naneina hichu Pathen in apek che jâr rōk a kae. Khava jâra nakut chunga ani heikapek sōt mi kha asetna kalen chet.”

¹²Pilate in kha athei pha, amasō hnōm hranghra; tâk mipui he’n ka-ông male heia, “Nang in ama namasōa achang inchu nang Caesar ṭhōn changmak che! Ajârchu reng inkhat kadōi che kae,” anti.

¹³Pilate in hiva ṭong hi athei pha, ama’n Jesu vânga aṭhōisōt a Hlungpheng inti ṭongtan in-ongna (Hebrew ṭonga, “Gabbatha,” inti) chunga in-ong joa kae.

¹⁴Khava ning kha Rakan Kût mak hma kani sûnṭimvet jo kae. Pilate in mihei hnenga, “Nanrengpa hin ka-om,” ati hei.

¹⁵Anmani’n ka-ông male heia, “That roh, that roh! Ama thingrakea hem mankop roh!” anti. Pilate in ader hei, “Nangni’n nanrengpa Thingrakea kahem mankop sik nanta madu mo?” Thempu kalenhei khan anmasôn, “Caesar rōk kha kanreng kae.”

¹⁶Khava pha Pilate in Jesu kha thingrakea hem mankop sik a ankut chunga apek sōt jo hei. Khava jâra Jesu kha anmani’n anṭhōi jo.

¹⁷Jesu’n athingrake akadoma, kasōk a “Lurōk hmun,” inti, (Hebrew ṭonga, “Golgotha,” inti.) katlung jo.

¹⁸Khava hmun a khan anmani’n ama thingrake chunga anhem mankop jo, khan chu anmani’n mi 2 he’m avei leh achanga anhem mankopsa heia, Jesu kha alaia anda a kae.

¹⁹Pilate in lekha inkhat amazet a thingrake chunga khan antâr, “Nazareth Jesu, Jehudihei Reng.”

²⁰Hivahi Jehudi katamtak in anteia kae, ajârchu Jesu thingrakea anhem mankopna hmun kha khōpui hnengtak kae. Khava ṭong intâr kha Hebrew, Latin, Greek ṭong heia le’nzet a kae.

²¹Thempu Kalen he’n Pilate hneng, “Jehudihei Reng tia mazet mak roh, tâk ama’n, ‘Kei Jehudihei reng eng kae ati,’ tia mazet roh,” anti.

²²Pilate in amasôn heia, “Ke’n kamazet jo kha inzet jo,” ati.

²³Remi he’n Jesu kha anhem mankop sō pha, anmani’n apōn kha an-inloa ahar 4 a ansem, harkhat et sepeihei khan anchen. Khana anmani’n azakkō kha’m an-inlo, khachu apum a a’nkhông inthlung, ahar-har vâng a’nṭhuikop hêrmak inkhat kae.

²⁴Khava jâra sepeihei kha inkhat leh inkhat inbe heia, “Hiva hichu keihler mak rih, tu mo akachen sik tlâ sânna nei rih,” anti. Hivahi ṭong inthenga, “Anmani’n kapōn insem hei, anmani’n kazakkō kha vâng-enna annei,” inti kha huitlungna sik a kae. Hiva omchen hi sepeihei khan anleitlo joa kae.

²⁵Jesu thingrake hneng inhnaia kangir mihei kha anu leh, anu nainu, Cleopas nuhmei Mary, khana Magdalene Mary hei kae.

²⁶Jesu’n anu leh sonle alungsetpa kha khana ankangir ahmu hei pha, anu hneng, “Ama kha nasapa kae!” ati.

²⁷Khava sōa ama’n sonle hneng khan, “Amanu kha nanu kae,” ati. Khava pha inphut a sonle khan amanu kha a-inna ka-om sik a aṭhōi jo.

²⁸Tûnchu heirakip pui katluk a inchai jo ti Jesu’n amanhret jo; khana ṭong inthenga a’nzet kha hui atlung theina sik, ama’n, “Katui kahre,” atia kae.

²⁹Khava hmun a khan ju kasep kasip thlengkam inkhat leika-om; anmani’n patjôn anmachea sungtlōn inkhat bâk a anjep a ahner katlunga ankadom manshâng pek a kae.

³⁰Jesu’n khava ju kha amajôp a, “Inchai jo,” ati. Khava sōa alu amankun a kathi jo.

³¹Khava sōa mi antathat hei kha anke vōk mathlekna sik, thingrake hei chunga inphut ankalōng lo mathlâkna sik, Jehudi hlamkakei he’n Pilate hneng anhongder. Ajârchu khava ning kha Misyem ning kae khana akahong Châmhngat kani ning kha ahlop mônga kani intheng achang jâra Thingrake chunga an-inkhei thang sik kha leimadu mak hei.

³²Khava jâra sepeihei kase heia Jesu leh antamakhei sap mi 2 hei ke kha anvavōk mathlek pek heia kae.

³³Tâk-kha anmani Jesu hneng anhong pha, Jesu aleikathi cher jo kha anhmua ama kechu vōk mathlek mak jo hei.

³⁴Kha achang ravâng remi inkhat in akasei vâng amanâk akadôt a, sôt loa thisen leh tui jōng kalōnga kae.

³⁵(Nangni’num nantaksenna sik khava omchen kahmupa khan hihei hi ahri kae. Ahri hei hi kadik, khana ama’n akadik ahri kae ti hi amanhret.)

³⁶Ṭong intheng taleihri, “Aru inkhat rōk tlek mak ning,” inti kha hui atlungna sik a omchen kha akasōk kae.

³⁷Khan chu ṭong intheng hlop inkhat in, “Anmani’n antakadôtpa kha mihe’n anta-en sik kae,” tia ahri.

³⁸Hivasōa, Arimathea khōpuia Joseph in Jesu taksa kalōng kha alo theina sik Pilate hneng avader a kae. (Hiva Joseph hi Jehudihei ṭit jâra marûk a Jesu kahnung kajui inkhat leikae.) Pilate in Jesu kalōng kha Joseph in a’nlothei sik atipek jâra kasea akalōng kha avalo jo.

³⁹Hma inkeia jânthōia Jesu inhmupui Nicodemus kha Joseph leh inṭhōia kasea bero leh aloe inti marim katui inchôm kilograme 30 kapō achoia kae.

⁴⁰Anmani 2 he’n Jesu kalōng kha anloa Jehudihei akathi invûmna ngai dungjuia hruipōn innem vâng marim katui kha leh ankatōma kae.

⁴¹Jesu anthatna hmun a khan rahōn inkhat leika-om, rahōn shunga khan tûte la’n vûmnalo thlânther inkhat leika-om.

⁴²Khava kani kha Châmhngat kani ning mak hma achang jo jâra khan chu thlân kha ahnai jâra anmani’n Jesu kalōng kha khana khan anleihre jo.