Read Komrem JOHN 2 Bible Online

JOHN 2 - Komrem bible

JOHN 2

¹Ni 2 sō leh Galilee ram a Cana khōa hmōiṭhōina inkhat leika-om. Khana khan Jesu nu leika-om,

²khana Jesu leh asonle he’m khava hmōiṭhōina khan anleibek hei.

³Anmani’n ju annei mak jo pha, Jesu nu khan Jesu hneng, “Anmani ju neimak jo hei,” ati.

⁴Jesu’n amasôn, “Heimo tlo sik kha amanthei mak roh. Kapha latluk mak.”

⁵Jesu nu khan sōk-hei hneng, “Ama tamanthei chei kha tlo ruh,” ati hei.

⁶Jehudihei bek ngaia insuk inthengna ka-om, khava sik a anta leihmang hlungbe litre 100 sasâm kaken karuk leika-om.

⁷Jesu’n sōk-hei hneng, “Hiva behei hi tui mansip ruh,” ati hei. Anmani’n tuibehei kha kasip a ansun jo hei.

⁸Khava pha Jesu’n anhnenga, “Tûn tui kha ajing lōksōt una revei rōi kavorpa hneng choi ruh,” ati hei.

⁹Anmani’n anchoia, rōi kavorpa khan tui kha amantem pha, ju leikachang jo. Ama’n khava ju kha khona inphut mo leimanhret mak a kae. (Tâk-kha tui kalōk sōk-hei khan chu anmanhret a kae.)

¹⁰Khava jâra ama’n hmōipa kha abek a, ahnenga ati, “Mi rakip in hma inkeia ju katui pen ansem phung, khana mihe’n an-in manchim pha leh ju kasep ansem ri. Tâk-kha nang chu tûn katlung ju katui nalada hi.”

¹¹Hiva ṭōn-inlak hma inkeipen hi Jesu’n Galilee ram a Cana khōa atlosōt a kae; khana khan alûrna aphônga, asonle he’n antaksen jo.

¹²Hivasōa Jesu sernu leh anaihei, khana asonlehei Capernauma kase heia, khava hmun a khan kani ṭhahrep vaka-om jo hei.

¹³Jehudihei Rakan Kût sik pha kha ahnaitek jo jâra Jesu Jerusalema leikase.

¹⁴Ama’n Bek-inna sehrat, kemōng, pherva kajōrhei leh sêr kathlenghei andokhâng hnenga an-inong kha ahmu hei.

¹⁵Ama’n hrui akahrea sung vōkna sik asyema, Bek-inna inphut sehrat leh kemōnghei kha ahnong sōt a sêr kathlenghei dokhânghei kha amaletpek hei khana ansêr kha akathek pek hei.

¹⁶Khana pherva kajōrhei hneng ama’n ṭong apek heia, “Hina inphut hivahei hi choisōt hei ruh! Kapa inn hi neinâk jōrna manchang mak ruh,” ati hei.

¹⁷Asonle he’n ṭong intheng tahri, “Na-inn kha karangeia kamalunga hmei kakâng ka-ang,” ati kha anleimandonsōt a kae.

¹⁸Khava pha Jehudi vaikarônhei khan ahnenga anhongder, “Nang in hinga tlotheina ratha nanei ti malârna heiṭōn inlak mo namanhmutor sik ung?”

¹⁹Jesu’n amasôn hei, “Hiva Pathen inn hi ṭhet ruh khana ke’n ni 3 a kasak nôk sik.”

²⁰“Hiva Bek-inn hi asakna kum 46 kahlut, nang in ni 3 shunga nasak nôk sik mo?” tia ander.

²¹Tâk-kha Jesu’n Bek-inn tia ahrina hi ataksa kalōng kha atina kae.

²²Ama thina inphut athōisōtsō pha, asonle he’n hiva aleihri hi anmandonsōt joa kae; khana anmani’n ṭong intheng kha leh ama’n aleihri ṭong kha antaksen jo.

²³Rakan Kût reveilai Jesu Jerusalema a-om shunga ṭōn-inlak katamtak atlosōt anhmu jâra mi katamtak in antaksen jo.

²⁴Achang ravâng Jesu’n chu anmani leitaksen tor mak hei, ajârchu amanhretpet heia kae.

²⁵Jesu’n anmalung shunga heimo aka-om ti amanhretsō, achang jâra tûte’n ama hneng mihei chungchânga manthei sik rangei mak a kae.