Read Komrem JOHN 20 Bible Online

JOHN 20 - Komrem bible

JOHN 20

¹Pathen kani ning jîngkâr hmatak khōvâr hma, Magdalene Mary thlâna kasea thlânkhur kot a hlung kha ale’nlosōt avahmu.

²Amanu katlâna Simon Peter leh sonle inkhat, Jesu talungsetpa hneng, “Anmani’n Rōngpu kha thlâna inphut anchoi jo. Khon mo antada jo, keini’n manhret mak jo ung!” tia anvamanthei hei.

³Khava pha Peter leh sonle inkhatpa kha kasōk heia thlânting kase jo hei.

⁴Anmani 2 katlân hei, tâk sonle inkhatpa khan Peter kha akhea thlân hmun kha hma leikatlung masa jo.

⁵Ama’n kakhup a a-en pha hruipōn innem kha ahmu, tâk ashung chu hlutmak.

⁶Khava sōa Simon Peter kha hong katlunga thlânkhur shung katlunga leikahlut jo. Ama’n hruipōn innem ankasûnna kha aleihmu,

⁷Khana Jesu lu ankasûnna kamsapōn kha ahlop a a’nzea aleika-om ahmua kae.

⁸Khava sōa thlâna hma aleikatlung sonle inkhatpa kha’m kahlut a khana ahmua ataksen jo.

⁹(Ṭong intheng tahri ti chu ama thina inphut akathōi nger sik kae ti kha anmani’n leimanhret tor mak heia kae.)

¹⁰Khava sōa sonlehei kha inna le’nle jo hei.

¹¹Mary kha thlân vânga kangira leikaṭap, aṭap pum a inkuna thlân shung kha a-en,

¹²marvân ngeva 2, kachek-hlak a a’nret hei, Jesu kalōng anmanjena luthlōnting inkhat, kethlōnting inkhat in-ong ahmu heia kae.

¹³Anmani’n, “Eh nuhmei, heisa mo akaṭap che?” tia ander. Amanu’n amasôn hei, “Ka-Rōngpu anleilosōt jo, khon mo antada jo ke’n manhret mak jo eng.”

¹⁴Amanu’n hi ahrisōa ahe’nhe pha, khava hmun a Jesu leikangir kha ahmu jo; tâk Jesu ti kha leimanhret mak.

¹⁵Jesu’n amanu hneng ader, “Nuhmei, heisa mo akaṭap che? Tu mo najong?” Amanu’n ama kha rahōn kathlōpa kachang sik tia amandona ahnenga, “Apu, nang talosōt achang inchu, khon mo nada amanthei roh, kei se eng sona valo rong,” ati.

¹⁶Jesu’n amanu hneng “Mary!” ati. Amanu khan ahnengting inhea khana Hebrew ṭonga, “Rabboni,” ati. (“Oja,” tina kae.)

¹⁷Jesu’n amanu hneng, “Asit mak roh, ajârchu kei Pa hneng lasemak hi eng. Tâk-kha nang kasōpuihei hneng vase ina vahri pek hei roh, “Kapa khana an-Pa, ka-Pathen khana an Pathen hneng a’nle sik jo eng kae.”

¹⁸Khava jâra Magdalene Mary kasea Rōngpu ale’nhmu puina leh ahnenga aleimanthei ṭonghei kha sonlehei hneng ava manthei jo hei.

¹⁹Khava Pathen kani ninga khōhlei ting khan, sonle he’n Jehudi Sehmang-Pachonghei anṭit hei jâra kot ankama le’ntûp hei. Khava pha Jesu kahonga ankâra hong kangira, “Mōngna’n ompui chei rasoh,” ati hei.

²⁰Ama’n hi ahrisō pha, akut-hei leh amanâk amanhmu hei. Sonlehei khan Rōngpu kha anhmu pha, inpâk hêr jo hei.

²¹Khava sōa Jesu’n anhnenga ahri nôk a, “Mōngna’n ompui chei rasoh, Pa’n kei atir eng kapōa, ke’n nangni katir chei kae,” ati hei.

²²Ama’n hi ahria, anchunga akaphuk amasâ khum heia, “Rathla Intheng kha chen ruh!

²³Nangni’n mihei setna nanrangei mandam he’nchu, anmani’n rangei mandam anchen sik; nangni’n nanrangei mandam mak he’nchu, anmani’n rangei mandam chenmak hei ning,” ati.

²⁴Jesu sonlehei hneng ahong pha 12 hei kâra Thomas (A’npher antatipa) kha leiom mak.

²⁵Khava jâra sonle alak-hei khan ahnenga, “Keini’n Rōngpu kha kanhmu jo!” antipek. Thomas in anhnenga, “Ke’n akut jôtpia a’nhemna bi kahmua kakut vâng kakahmei mak a khana amanâk a khan kakut kathōn mak hma seng, ke’n taksen mak ning,” ati hei.

²⁶Kani vekhat sōa sonlehei kha Thomas inveina innshunga intûp nôk jo heia kae. Kot-hei ankirpet, tâk Jesu ankâra hong kangira anhnenga, “Malung mōngna’n ompui chei rasoh,” ati hei.

²⁷Khava sōa ama’n Thomas hneng, “Hin nakut hong kahmei roh, kakut hei hong-en roh; khan chu nakut heikalâng inna kamanâk hongsit roh, na’nkei-chio kha bâng jo roh khana taksen jo roh!” ati.

²⁸Thomas in “Ka-Rōngpu leh Ka-Pathen!” tia amasôn.

²⁹Jesu’n ahnenga, “Nang in kei nahmu eng pha tōa nataksen mo? Kaka hmumak a akataksenhei heituk-hrep a anmahâm akaṭha jo mo!” atipek.

³⁰Hiva lekha shunga a’nzet inhlutmak ṭōn kalen katamtak Jesu’n asonlehei hmaikunga aleitlo ka-om hei.

³¹Khana nangni’n Jesu hi Messiah, Pathen Sapa kae ti nantaksen theina sik, khana ama nantaksenna vâng khana hringna nanneitheina sik hivahei hi a’nzet hei kae.