Read Komrem JOHN 21 Bible Online

JOHN 21 - Komrem bible

JOHN 21

¹Hivasōa hin, Jesu abinga Tiberius dîra asonlehei hneng inlâr nôk a kae. Hing’hin omchen kha leikasōk.

²Simon Peter, Thomas (A’npher intipa), Nathanael (Galilee ram a Cana mi,) Zebedi sahei, khana sonle alak 2 hei seng hi le’nkhôm hei.

³Simon Peter in alak-hei hneng khan, “Kei nga kasur kase sik eng,” ati. Anmani’n, “Keini’m kahong sik ung,” anti. Khava jâra anmani rakō-nga kachōng heia kasōk jo hei, tâk khava ning jân kathang anmani’n heite leisur mak hei.

⁴Kani ahong sōk pha, tuipanga khan Jesu leikangir, tâk anmani’n Jesu ti kha leimanhret mak heia kae.

⁵Khava pha ama’n anhnenga, “Retherhei nangni heite lasurmak chei mo?” ati hei. Anmani’n, “Heite surmak ung,” tia anmasôn.

⁶Ama’n anhnenga, “Rakōng pang changting khan nanlen vor ruh, nangni’n ajing nansur sik,” ati hei. Khava jâra anmani’n anlen anvora keimale tor mak jo hei, ajâr chunga katamtak ankhum joa kae.

⁷Jesu talungset sonle khan Peter hneng, “Ama hi Rōngpu kae!” ati. Peter in ama Rōngpu kae ti ṭong athei pha, ama’n azakkō kalen kha a’nneia (ajârchu Peter kha apōn ader aleisōt pet a leika-om,) tui shunga inchôm jo.

⁸Alak sonlehei khan nga kasiptak len kha ankei sona tuipangting rakōnga intôr jo hei. Anmani tuipanga inphut hlarei mak jo hei, metre 100 kapō rōk le’nkâr hei.

⁹Tuipang anheikesōt pha, buhlom leh nga kha hmeira-ê chunga aka-om kha anleihmu.

¹⁰Jesu’n anhnenga, “Tûna nantasur nga kha ajing hin heichoi ruh,” ati hei.

¹¹Simon Peter kasea len kha tuipanga akeisōt a, nga kalen akhenga 153 hei kae; nga khangtuk hrep atam ravâng len kha le’nhler mak.

¹²Jesu’n anhnenga, “Hong una hongsâk ruh,” ati hei. Sonle tûte’n, “Nang tu che mo?” tia der ngammak hei; ajârchu ama Rōngpu achang kha anmani’n anmanhret a kae.

¹³Khava jâra Jesu kasea, buhlom kha aloa, apek jo hei; khana nga kha’m aloa apek jo hei.

¹⁴Khana hivahi Jesu’n thia inphut athōisōt sōa asonlehei hneng a’nlârna vōi 3 tlukna kha kae.

¹⁵Anmani’n ansâksō pha, Jesu’n Simon Peter hneng, “John sapa Simon, hihei lungsetna eng kanek a nang in nalungset chet eng mo?” ati. Ama’n amasôn, “Ôk, Rōngpu, kamalungset che nang in namanhret.” Jesu’n ahnenga, “Kakemōngtehei hrung hei roh,” ati.

¹⁶Vōi 2 tlukna Jesu’n ahnenga, “John sapa Simon, kei nalungset eng mo?” ati. Ama’n amasôn, “Ôk, Rōngpu, ke’n kamalungset che nang in namanhret.” Jesu’n ahnenga, “Kakemōnghei hrung hei roh,” ati.

¹⁷Vōi 3 tlukna Jesu’n ahnenga, “John sapa Simon, kei nalungset eng mo?” ati. Peter kha amalung kadông jo ajârchu vōi 3, “Kei nalungset eng mo?” tia ader a kae. Khava jâra ama’n Jesu hneng, “Rōngpu, nang in heirakip namanhret; kei lungsetna che kha nang in namanhret a kae,” ati. Jesu’n ahnenga, “Kakemōnghei hrung hei roh!

¹⁸Akadik kha kahri pek che kae; naipang nachanglai nang intluk chea namadu-duna hmun a leikase che; tâk-kha upa nahong chang jo pha, nakut nakeisōt a mihlop inkhat in akhit sik che, nase hnōmmakna hmun a aṭhōi sik che,” ati.

¹⁹(Hi ahrina hin Peter kha athi sik omchen khana Pathen amanlûr sik kha Jesu’n akhinga ahrina kae.) Khava sōa Jesu’n ahnenga, “Ajui roh!” atia kae.

²⁰Peter kha hong inhea, Jesu’n alungsetpa, khōhlei thlai sâkna Jesu hneng ale’nhngapa khana, “Rōngpu, mikut a nakapek sōt sik kha tu mo?” tia akader sonle ahlop-pa kha akahnungting aleihmua kae.

²¹Peter in ama kha ahmu pha, Jesu hneng, “Rōngpu, hiva mipa hi-e heihmen akachang sik?” tia ader.

²²Jesu’n amasôna, “Kajōng mak kârseng ama aleikahring sik a kamadu’n chu, khavakha nang hnenga heimo akhôkna ka-om? Kei ajui roh!” ati.

²³Khava jâra Jesu kahnung kajuihei kâra hiva sonlepa hi akathimak sik a anhri manthang jo. Tâk-kha Jesu’n chu ama thimak ning atina changmak; ama tati khachu, “Kajōng mak kârseng ama aleikahring sik a kamadu’n chu, khavakha nang hnenga heimo akhôkna ka-om?” ati kae.

²⁴Hihei seng akahri leh a’nzet inhlut kachang sonle kha ama hi kae; ama tahri hei kha kadik tia kanmanhret.

²⁵Jesu’n ṭōn katamtak aleitlosōt ka-om. Khavahei seng kha inkha-khat a a’nzet inhlut a achang inchu, mazet sik lekhahei kha raleichung hin kenmak ning tia kamandon.