Read Komrem JOHN 3 Bible Online

JOHN 3 - Komrem bible

JOHN 3

¹Jehudihei hlamkakei, Phariseehei kâra rup inkhat, arahming Nicodemus inti mi inkhat leika-om.

²Ama jân khat Jesu hneng kahonga, “Rabbi, nang Pathena inphut akajōng Oja che ti keini’n kanmanhret; ajârchu Pathen inthōpui tei loa tûte’n natlo ṭōn inlak-hei hi tlotor mak,” ati.

³Jesu’n amasôn, “Kadiktak a kahri pek che kae; tu achang inum avea a’nte thermak inchu Pathen Rengram kha hmutor mak ning.”

⁴Nicodemus in ader, “Heikhong mo mi inkhat upa achang sō kahnunga a’ntether nôk sik? Anu shunga akahlut nôk a a’ntether thei sik mo!”

⁵Jesu’n amasôn, “Kadiktak a kahri pek che kae, tui leh Rathla a a’ntemak tûte inkhatbek Pathen Rengram hlut tor mak ning.

⁶Mi inkhat hi taksa chu nu leh pa tamatet kae; tâk rathlating chu Rathla tamatet kae.

⁷Nangni nankhenga a’ntether nger sik chei kae kati jâra mandonhla mak roh.

⁸Thli so ahrâng hnō-hnōmna ting kahrâng, nang in arasa nathei, tâk nang in khontinga ahe’nphut a khonting ajōn manhret mak che. Khava kapōa Rathla a a’nte rakip kha khanga katia kae.”

⁹Nicodemus in ader, “Heikhong mo hi akachang tor sik?”

¹⁰Jesu’n amasôn, “Nang Israelhei Oja kalen inkhat kachang chea hivahi namanhret tor mak mo?

¹¹Kadiktak a kahri pek che kae. Keini’n kanta manhret kha kanmanthei chei, kantahmu kha kanhri pek chei, tâk nangni inkhatbek in kanṭong hri lohnōm mak chei.

¹²Ke’n hiva vânhnōi chungchânga kahri hi nantaksen mak inchu, marvân chunga ṭong kahri pha heikhong mo nanta taksen tor sik?

¹³Marvâna inphut ajōng kaṭum Mihring Sapa tei loa tûte marvâna akake la-om mak.”

¹⁴Moses’n ram thōia sum-êng mari kha sungtlōn inkhat chunga aleimakhei manshâng kapōa mihring Sapa kha’m antamakhei sik kae,

¹⁵akataksen rakip in kumsôt hringna aneina sik a kae.

¹⁶Ajârchu Pathen in vânhnōi ralei hi hingtuk hrep alungset jâra Asapa inkhat rōk kha apek jo, tu achang inum ama kataksen kha thimak ning, tâk kumleikōa hringna anei sik kae.

¹⁷Ajârchu Pathen in ralei ṭong katan sik a asapa ajōngtir changmak; tâk akahuk inhring sik a ajōngtir kae.

¹⁸Tu achang inum Sapa kataksen rakip chu aṭong intanmak ning, tu achang inum akataksenmak rakip kha ṭongtansa jo hei kae, ajârchu ama’n Pathen Sapa inkhat rōk kha leitaksen mak jo.

¹⁹Ṭongtan ṭōn kha hi kae: ti chu vâr kha raleichunga kajōng jo, tâk mihe’n ṭhatmak ṭōn kha antlo jâra, vâr kanek a a’nthim jôk kha anmadu.

²⁰Ṭōn kaṭhamak katlo rakip in vâr kha anhōt, khana anṭōn kaṭhamak tlohei kha inlâr sik tia vâra honghnōm mak hei.

²¹Achang ravâng akadik katlo mi kha tu achang inum Pathen ṭong juina ṭōn atlo kae ti a’nlârsōt theina sik vâra khan kahong hei.

²²Hivasōa Jesu kha asonlehei leh Judea ramṭhenting kase jo hei. Khava hmun a khan ama’n pha ṭhahrep a-ompui heia, tui amanhlut jo hei.

²³John inum Salim hnenga Aenon khōa tui atam jâra tui manhlutna aleitloa kae. Ahnenga mi kahong hei khana tui amanhlut heia kae.

²⁴(Hivahi John kurkhum a anleikhum mak laia kae.)

²⁵John sonle ṭhahrep leh Jehudi inkhat beklanga insi intheng chungchânga inkhena anleiphut.

²⁶Khava jâra anmani John hneng kase heia, “Rabbi, Jordan nisō rea nale’nṭhōi puipa, ama chungchânga naleihripa kha namandonsōt mo? Kaṭha, tûnhin tuimanhlut atloa ka-om, khana mi rakip ahnenga kase heia kae,” anti.

²⁷John in amasôn hei, “Marvâna inphut a Pathen tajōng pek mak mi khan heite chentor mak.

²⁸Ke’n nanhnenga, ‘Kei chu kadeisōt Messiah kha changmak eng, tâk ahma a akase sik a ajōngtir eng kha kae,’ tia kaleihrina sâkhi kha nangni chei kae.

²⁹Hmōinu kha hmōipa ta kae; tâk khava hnenga akangir hmōipa ṭhōnpa khan hmōipa rasa kha athei pha, inpâk a kae. Hing’hin kei inpâkna kha pui akatluk jo kae.

³⁰Ama chu akakhang chet-chet sik kae, kei chu akatlasuk chet-chet sik eng kae.”

³¹Marvâna inphut akajōng ama kha heirakip chunga akalenpen kae. Raleichung mi kha ralei ta kae, khana raleichung sik a ṭong kha ama’n ahri, marvân chunga akajōng ama kha heirakip chungpen kae.

³²Ama’n ahmu leh athei ṭong kha ahri, tâk tûte’n aṭong lopek mak hei.

³³Tu achang inum ama ṭong inhlâng mi khan, Pathen hi akadik kae ti amanchên jo.

³⁴Pathen tahei tir mi khan Pathen ṭong kha ahri; ajârchu Pathen in ama chunga arathla kha pui katluk a apek.

³⁵Pa khan asapa kha alungset, khana aratha neina thōia heirakip apek jo.

³⁶Tu achang inum Sapa kataksen mi khan kumsôt hringna anei jo; tu achang inum Sapa kataksen mak mi khan hringna hmuhêr mak ning, tâk Pathen karâkna thōia ka-om ṭhak sik.