Read Komrem JOHN 5 Bible Online

JOHN 5 - Komrem bible

JOHN 5

¹Hivasōa Jesu rehōi inkhat sik a Jerusalema leikase.

²Jerusalema Kemōng Kot inti hnenga khan tuikhur inkhat leh aṭumna kechōn, kethonna 5 leika-om hei; khavakha Hebrew ṭonga, “Bethzatha,” inti.

³Khava tuikhur ṭumna chōnke heia khan, hmitkacho, ke katlek, lang kathi, mikana katamtak leikaje hei; tui inhling kha anhngâk a leika-om hei.

⁴Ajârchu Rōngpu ngeva inkhat kâklalak leh tuikhura khan jōng kaṭuma tui kha akachok manhling ria kae. Tui inhlinglai hmapena akaṭum mi kha heikhong khova nat achang inum kadam ri.

⁵Khana khan, kum 38 akana mi inkhat leika-om.

⁶Jesu’n mipa kha ahmu pha, pha kasôttak a akana jo kae ti amanhret jo; ahnenga, “Nang akadam hnōm che mo?” ati.

⁷Mi kanapa khan amasôn, “Apu, tui hi ahon’chok inhling pha tuishung hlutna sik ani’nthōpui tûte neimak eng; kei vahlut rong tia ka’ntluklai mihlop inkhat in hma aleikeide ri jo enga kae.”

⁸Jesu’n ahnenga, “Thōi ina nakapher inhrut roh, khana ke choi roh,” ati.

⁹Khava laitak mipa kha kadam jo; ama’n akapher a’nhrut a ke achoi jo. Khava kani kha Châmhngat kani ning leikae.

¹⁰Khava jâra Jehudi he’n mipa hneng khan, “Tuning Châmhngat kani ning kae khana nang in najena kapher na’ndom hi Dân kadōi che kae,” anti.

¹¹Ama’n amasôn hei, “Kei ani’ndam pa khan, ‘Najena kapher inhrut inna lôn roh!’ ati eng kae.”

¹²Anmani’n ander, “Nakapher inhrut ina lôn roh, anikati mi kha tu mo?”

¹³Tâk-kha akana akadampa khan Jesu kha tu mo ti leimanhret mak, ajârchu khava hmun a khan mi antam jâra Jesu kha leikasesōt joa kae.

¹⁴Khava sōa Jesu’n ama kha Bek-inna ahmua ahnenga, “Enroh, kadam jo che, akaṭhamak chet kha nachunga atlung makna sik set nôk mak jo roh,” ati.

¹⁵Khava sōa mipa kha Jehudihei hnenga kasea a’ndampa kha Jesu kae tia ava manthei jo hei.

¹⁶Hiva mi amandam hi Châmhngat kani ning achang jâra Jehudi he’n Jesu chunga suk manrimna anleiphut jo.

¹⁷Jesu’n anmani amasôn hei, “Kapa’n ṭōn atlo ṭhak achang jâra ke’num katlo sik kasōk.”

¹⁸Hi ahria hin Jehudi he’n ama alerchet a anthat hnōma kae; ajârchu ama’n Châmhngat kani dân rōk kha asukkhōi changloa Pathen kha apa amanchanga, Pathen leh ama in-anga ahri jâra kae.

¹⁹Khava jâra Jesu’n anmani amasôn hei, “Akadiktak kahri pek chei kae, Sapa khan abing rachama heite tlotor mak; apa tatlo ahmu hei rōk kha atlo kae. Apa tatlo kha, Sapa kha’num atlo kae.

²⁰Ajârchu Pa khan Sapa kha alungset khana ama’n atlo rakip kha amanhmu. Ama’n hiva kakhea ṭōn kalen chet tlo sik a amanhmu sik, khana nangni nankhenga nanta det-hla et sik kae.

²¹Ajârchu Pa khan akathi kha akahringa akei mathōi nôk, khava kapōa Sapa kha’num apek hnōm hei hneng hringna kha apek hei.

²²Pa khan tûte ṭong tanmak. ṭong tanna sik ratha katluk a asapa hnenga apek jo.

²³Khava jâra mi rakip in Pa antakaja kapōa Sapa kha antakaja sik kae. Tu achang inum Sapa injamak mi khan, ajōng katir a-Pa kha akaja mak kae.

²⁴“Akadiktak kahri pek chei kae; tu achang inum kaṭong hri katheia anijōng katirpa kataksen mi khan kumsôt hringna anei jo. Anmani ṭong intanmak jo ning, tâk thina anrakansōt a hringna antaneisa jo kae.

²⁵Akadiktak kahri pek chei kae; akathi khan Pathen Sapa rasa anthei pha, akathei hei khan anhonghringsōtna sik pha kha jōng katlung jo, ajōng katlungsa jo kae.

²⁶Pa khan abinga hringna kung akachang kapōa asapa kha’m hringna kung achangna sik ama’n asyem jo.

²⁷Khana ama’n Sapa kha ṭong tanna ratha kha apek jo, ajârchu ama kha Mihring Sapa kae.

²⁸Hivahi mandonhla mak ruh; akathi rakip in thlânkhura inphut a ama rasa antheina sik,

²⁹thlânkhura inphut anhong sōkna sik, pha kha jōng katlung jo: ṭōn kaṭha katlohei kha kathōi sik hei khana kahring sik hei, ṭhatmak katlohei kha’m kathōi sik hei khana themmôna inpek sik hei.

³⁰“Ke’n kabing rōk rachama heite tlotor mak eng; Pathen tamanthei eng dungjuia ke’n ṭong katan. Khava jâra kaṭong tan kadik, ajârchu ke’n kamadu kha tlo sik reimak eng, tâk anijōng katirpa tamadu rōk kha katloa kae.

³¹“Ke’n kabinga sik sâkhi katlo’nchu, kaṭong hri kha kadik khet tia inlo theimak.

³²Tâk-kha mihlop inkhat in kei chunga sâkhi akatlo ka-om, khana ama’n kei sik a sâkhi atlo kha kadik tia ke’n kamanhret a kae.

³³Nanṭong karôn nantatir hei kha John hnenga kae, khana John in kadik a ṭong aleihri pek jo hei.

³⁴Hivahi mi inkhat sâkhia nei nger rong katina chu changmak, nangni hukmanhring nanchangna sik jâr pena kahri kae.

³⁵John in thaihmei inkhat kapōa leikavâr, khana nangni’n ama vâr kha pha bongkhat rōk nanhōi puia kae.

³⁶Tâk-kha John sâkhi tlo kanek a akalen chet kachungchânga sâkhi inkhat ke’n kanei; Kapa khan katlo sik ṭōn apek eng, kaṭōn tlohei khan kei kahlânga ṭong anhria, kapa tahei tirna eng kha’m amalâra kae.

³⁷Khan chu anijōng katir Pa’num kei kahlânga ṭong ahria kae. Nangni’n ama rasa lathei phungmak chei, ahme um lahmu phungmak chei;

³⁸khava jâra aṭong nanshunga om mak, ajârchu ama’n ajōng tirpa kha nangni’n taksen mak cheia kae.

³⁹Nangni’n Ṭong intheng rabu shunga kumsôt hringna kanhmu sik tia nanteia nanjong. Khana hiva Ṭong intheng hei hin kachungchânga antahri kae!

⁴⁰Achang ravâng hringna nanchenna sik kahnenga honghnōm mak chei.

⁴¹“Ke’n mihring tamanpâk sik jongmak eng.

⁴²Tâk-kha ke’n nangni heikhong khova mi chei mo kamanhret chei; nanmalung shunga Pathen lungsetna neimak chei ti ke’n kamanhret.

⁴³Kapa ratha neina leh inṭhōia kei kajōng eng; tâk nangni’n kei arahlâng mak chei; mi inkhat ama bing ratha neina leh inṭhōia ajōng inchu, nangni’n ama nanlei rahlâng sik.

⁴⁴Nangni inkhat leh inkhat a inphut inchoi inshâng sik nanmadu, tâk Pathen inkhat rōk a inphut choimanshângna chen sik khachu madu mak chei; khava jâra nangni’n heikhong mo nanta taksen tor sik?

⁴⁵Kha achang inum ke’n nangni kapa hnenga kamaset sik chei tia mandon mak ruh. Maset nankapek sik kha nan inhōrnapa Moses kha kae.

⁴⁶Kadiktak a nangni’n Moses kha nantaksen inchu, kei nantalei taksen sik jo eng kae; ajârchu ama’n kei chungchâng ṭong amazet kae.

⁴⁷Tâk-kha nangni’n ama tamazet kha taksenlo cheia, heikhong hmen kei ṭonghei nanta taksen tor sik?”