Read Komrem JOHN 7 Bible Online

JOHN 7 - Komrem bible

JOHN 7

¹Hivasōa Jesu Galilee ram a leikalôn lelea kae; ajârchu Jehudi hlamkakei he’n ama that sik a anjong jâra Judea ramting leise hnōm mak.

²Khava lai khan Jehudihei Rabuk Kût (kumther rehōi) pha hong kahnai jo.

³Khava jâra anai he’n Jesu hnenga, “Naṭōn tlohei kha nasonle he’n anhmu theina sik hiva hmun hi dahlon ina Judea ramting se jo roh.

⁴Ajârchu inphông sik a’ndu mi tûte’n marûk a ṭōn tlophung mak hei. Nang in hiva ṭōnhei hi natlo achang jâra vânhnōi pumpui in manhret hei rasoh!” anti.

⁵(Anaihei kapha’num leitaksen mak hei.)

⁶Jesu’n anhnenga ati, “Kei sik a aphatak kha lajōngmak. Nangni sik a chu ahei tik a apha kachang ṭhak.

⁷Vânhnōi in nangni chu hōtmak hei chei, tâk kei chu anṭōnhlam kadikmak karakôk hei jâra anhōt eng.

⁸Nangni reveina khan se ruh, kei sik a chu aphatak kha lajōngmak, khava jâra kei hongmak ning.”

⁹Anmani khang’khan ahri pek heia, ama chu Galileea ka-om jo.

¹⁰Anaihei reveia ansesō pha, Jesu’m vakasea kae. Achang ravâng inphôngtak a leise mak, marûk a leikase.

¹¹Jehudi hlamkakei he’n reveina hmun a khan an-ena, “Ama khon mo aka-om?” antia inder hei.

¹²Mipui kâra khan Jesu chungchâng kaṭong heia, ṭhahrep in, “Ama mikaṭha kae,” anti. Alak her khat in, “Changmak, ama mikahōn kae,” anti.

¹³Tâk-kha Jehudi vaikarônhei anṭit jâra, tûte’n inphôngtak a Jesu chungchâng ṭong leihri ngammak hei.

¹⁴Revei kha aṭim kapō athleng jo pha Jesu Bek-inna kasea manthei aleiphut jo.

¹⁵Jehudi Sehmang-Pa-chong he’n, “Hiva mipa hin inchûna chu neilo jena, heikhong mo hingtuk hrep manhretna anei?” mandonhla tak a anleiti.

¹⁶Jesu’n amasôn hei, “Ke’n kamanthei chei hi keita changmak, tâk anijōng katirpa a inphut akajōng kae.

¹⁷Tu achang inum Pathen lungdo tlo sik akatup mi khan kaman theina hi Pathena inphut akajōng a-emak leh kabing ratha neina vâng kahri kae ti hi amanhret sik.

¹⁸Mi inkhat abing ratha neina vâng akaṭong khan abing lûrna sik ajong kae. Achang ravâng ajōng katirpa lûrna sik kajōng ama khachu amalung intheng, khana akadik mak heite neimak.

¹⁹Moses’n Dân kha apek chei, changmak mo? Tâk-kha inkhatbek inum Dân kha juimak chei. Heisa mo kei that sik a nantarei eng?”

²⁰Mipuihei khan anmasôn, “Tu’n mo nang that sik a arei che? Nang ṭai narôn kae!”

²¹Jesu’n amasôn hei, “Ke’n ṭōn-inlak inkhat katloa nangni’n nanmandonhla.

²²Moses’n nansahei anvun nantatan sik a ṭong apek chei (akaphut kha Moses changloa nanpu sōnhei taleiphut achang inum), nangni’n Châmhngat kani ning naipang inkhat vun nantan ria kae.

²³Châmhngat kani ning naipang inkhat vuntan hin Moses Dân kha akakōimak achang inchu, ke’n Châmhngat kani ning mi inkhat kaman dam jâra nangni’n kachunga nanhnuk akana mo?

²⁴Avâng pônga mi hmai ena ṭong tanmak ruh, tâk kadiktak a ṭong tan ruh.”

²⁵Jerusalema mi ṭhahrep in anti, “Hlamkakei he’n that sik a antarei mi kha ama hi changmak mo?

²⁶Enruh! Mipui kâra inphôngtak a ama’n ṭong ahria, tûte’n heite hrimak hei; hlamkakei he’n ama hi Messiah achang inchêna antamanhret nâk mo?

²⁷Tâk-kha Messiah kha ajōng pha leh khona inphut akajōng mo, tûte’n manhret mak hei ning; tâk hiva mipa hichu eini’n ajōng inphutna nimanhret.”

²⁸Jesu’n Bek-inna amanthei lai hei khan rasa inhnaktak a ahri, “Nangni’n kei khona inphut akajōng eng inchêntak a nantamanhret mo? Kei kabing rachama akajōng eng changmak. Hei-achang inum anijōng katirpa kha akadik kae. Nangni’n manhret mak chei,

²⁹tâk ke’nchu kamanhret, ajârchu ahnenga inphut akajōng eng kae khana ama tajōngtir eng kae.”

³⁰Khava pha anmani’n sur sik a anrei, tâk tûte’n achunga ankut bânngam mak hei, ajârchu apha kha latluk mak hia kae.

³¹Tâk-kha mipui kâra akatamtak in ama antaksena, “Christa ajōng pha leh, hiva mipa tatlo kanek a ṭōn kalen atlo tor sik nâk mo?” antia kae.

³²Pharisee he’n mipuihei kâra hiva Jesu chungchâng ṭong inhri hi anthei jâra anmani leh thempu kalen he’n Jesu kasur sik a mi antir jo hei.

³³Jesu’n ati, “Pha bongkhat rōk ke’n nangni ka’nṭhōipui sik jo chei kae, khava sō leh chu anijōng katirpa hneng akase sik jo eng kae.

³⁴Nangni’n kei nanjong sik eng, tâk ahmu mak jo tin chei; ajârchu ka-omna hmun a khan nangni hongtor mak chei ning.”

³⁵Jehudi hlamkakei he’n anmani kâra anhri, “Khon mo akasea eini’n ama nihmu mak sik hi? Jehudihei omna Greek khōpuia akasea Jehudihei ava manthei sik hei mo?

³⁶Nangni’n kei nanjong sik eng, tâk ahmu mak tin chei, khana ka-omna khan nangni hongtor mak tin chei ati hi, heimo atina?”

³⁷Revei inchai ning alûrpen ning kani khan Jesu kangirsōt a rasa inhnaktak a ahri, “Tui kahre tu achang inum kahnenga akahong sik kae,

³⁸khana anikataksen tu achang inum anta-in sik kae. Ṭong intheng in ahri kapōa, ‘Tu achang inum kei kataksen mi kha amalung shunga inphut hringna tuidung kalōng sik a kae.’”

³⁹Jesu’n hiva ahri hi ama kataksen he’n hnunga Rathla antachen sik kha atina kae. Khava pha khan chu Rathla kha la’npek mak hi ajârchu ama kha kalûrtak a keimanke lachang mak a kae.

⁴⁰Mipui kâra mi ṭhahrep in hiva ṭonghei hi anthei pha, “Hiva mipa hi inchêntak a Sânkathem kae!” anti.

⁴¹Her khat in, “Ama kadeisōt Messiah kae!” anti. Tâk-kha her khat in, “Galileea inphut Messiah kha hongmak ning!” anti.

⁴²Ṭong Inthenga chu Messiah kha David phung hruia inphut, khana David leiomna khōpui Bethlehema a’nte sik a ahri,” anti.

⁴³Khava jâra khang’khan mipui kâra insemṭhenna ka-om jo.

⁴⁴Mi ṭhahrep in Jesu ansur hnōm, tâk tûte’n achunga ankut kabânmak heia kae.

⁴⁵Mikahrunghei kha thempu kalenhei leh Phariseehei hneng he’nle jo hei khana anmani’n ander hei, “Heisa mo ama nantaheiṭhōi mak?”

⁴⁶Mikahrunghei khan anmasôn hei, “Ama ṭonghri kapōa tûte’n ṭong lahri phungmak hei.”

⁴⁷Pharisee he’n anmasôn hei, “Nangni kapha’m amanvet jo chei mo?

⁴⁸Nihlam kakeihei leh Phariseehei inkhatbek in ama antataksen nanmanhret jo mo?

⁴⁹Hiva mipuihei hin Moses Dân kha manhret mak hei, khava jâra anmani Pathen hâksêrna antachen jo kae!”

⁵⁰Phariseehei kâra Nicodemus inti, hma khan Jesu inhmupuia aleikase jo inkhat leika-om. Ama’n alak-hei hneng,

⁵¹“Nidân dungjuia mi inkhat ṭōntlo nijongsōt mak hma leh aṭong hri nithei mak hma eini’n maset theibât mak min,” ati hei.

⁵²Anmani’n anmasôn, “Kaṭha jo, nang um Galileea inphut mi che mo? Ṭong intheng kha tei roh, Galileea inphut sânkathem sōk phungmak ti namanhret sik.”