Read Komrem JOHN 8 Bible Online

JOHN 8 - Komrem bible

JOHN 8

¹Khava sōa mi rakip an-ina inle jo hei, tâk Jesu chu Olive Tlânga leikasea kae.

²Abân kani hmatak a Jesu Bek-inna inle nôk a kae. Mipui ankhenga ahnenga hong intûp jo hei, khana ama in-onga anmani manthei aphut jo hei.

³Dân kathemhei leh Pharisee he’n nuhmei inkhat mi leh ajông laitak antasur anjōng ṭhōia ankhenga hmaikunga anman ngir jo.

⁴Anmani’n Jesu hneng, “Oja, hiva nuhmeinu hi ajông laitak antasur kae.

⁵Nidân dungjuia hinghiva nuhmei hi hlung vâng denghlon sik Moses’n ṭong apek. Tûn, nang in heimo nati?” anti.

⁶Anmani’n ama anmaset theina sik, hivahi enmansinna inkhat a antahri kae. Tâk-kha Jesu kakhup a akutpâr vâng ralei aleimazet a kae.

⁷Anmani’n khanga anngir pum a ṭong anderlai khan, Jesu kha kangir intluna, anhnenga, “Nankâra setna kanei hêrmak mi khan hmapena amanu deng rasoh,” ati hei.

⁸Khava sōa ama kakhup nôk a raleia amazet a kae.

⁹Anmani’n kha anthei pha, upa pena inphut inkha-khat a kasesōt heia, ankhenga andahlon jo. Jesu leh khana alakangir ṭhak nuhmeinu rōk kha anleidahlon jo hei.

¹⁰Ama hong kangirsōt a nuhmeinu hneng, “Eh nuhmei, khō jo heihmen? Maset nakapek sik tûte om mak jo hei mo?” ati.

¹¹Nuhmeinu khan amasôna, “Apu, tûte om mak jo hei,” ati. Jesu’n, “Kaṭha jo, khan chu ke’num masetmak che eng. Kasethei sik jo che, tâk set nôk mak jo roh,” ati.

¹²Jesu’n Phariseehei hneng ṭong ahri nôk: “Kei vânhnōi vâr eng kae. Tu achang inum kei kahnung kajui khan hringna vâr kha anei sik, khana khō inthim thōia lônmak ning.”

¹³Pharisee he’n ahnenga, “Nang in nanbibinga sâkhi intlo che; nasâkhi dikmak,” anti.

¹⁴Jesu’n amasôn hei, “Changmak, ke’n kabibinga sâkhi katlo achang inum, akadik kahri kae, ajârchu kei kajōng inphutna leh kasena ke’n kamanhret. Nangni’n kajōng inphutna leh kasena manhret mak chei.

¹⁵Nangni’n mihring taksa dungjuia ṭong nantan; ke’nchu tûte chunga ṭong tanmak eng.

¹⁶Tâk-kha ke’n ṭong katan inchu kaṭong tan akadik sik kae, ajârchu kabinga ṭongkatan changmak; anijōng katir Pa kha leh kantatan kae.

¹⁷Nan-Dân a hinga inzet, ti chu sâkhi 2 an-intōk inchu, antahri kha akadik kae.

¹⁸Ke’n kabibinga sâkhi intlo eng, khana anijōng katirpa kha’num kachunga sâkhi atloa kae.”

¹⁹Anmani’n, ander, “Napa kha khon mo aka-om?” Jesu’n amasôn hei, “Nangni’nchu ke’m khana kapa’m amanhret mak chei, Nangni’n kei nanmanhret eng inchu kapa kha’m nantamanhret sik kae.”

²⁰Jesu’n hihei seng ahri hi Bek-inn shunga sêr tōk manbukna den shunga ahri kae; apha alatluk mak jâra tûte’n ama leisur mak hei.

²¹Jesu’n anhnenga avea, “Kei akasesōt sik jo eng kae; kei nanjong sik eng, tâk nansetna khan nangni kathi sik chei. Kei sena hmun a khan setor mak tin chei,” ati.

²²Khava jâra Jehudi vaikarôn he’n, “Ama’n, asena hmun a eini setor mak tin chei ati. Hivahi abinga a’nthat hlon sik atina mo kae?” anti.

²³Jesu’n amasôn hei, “Nangni chu hiva raleichung ta chei kae, tâk kei chu chunga inphut akajōng eng kae. Nangni chu hiva raleichunga inphut chei kae, tâk kei chu hiva raleichunga inphut changmak eng.

²⁴Khava jâra nangni nansetna khan kathi sik chei tia kahri pek chei kae, ‘Kei hi kei eng kae,’ tia nantaksen mak enga achang inchu, nangni nansetna heia khan akathi sik chei kae.”

²⁵Anmani’n ander, “Nang tu che mo?” Jesu’n amasôn hei, “A’nphutbia inphut kalei manthei jo chei kae.

²⁶Nanchungchâng ṭonghri sik ka-tamtak kanei khana maset sik chei katamtak ka-om, achang inum anijōng katir ama kha akadik kae, khana ke’n ama inphut a kathei kha vânhnōi kamanthei kae.”

²⁷Jesu’n Pa chungchâng ahri kha anmani’n leimanhret theimak hei.

²⁸Khava jâra Jesu’n anhnenga ati, “Nangni’n Mihring Sapa kha nanmakhei manshâng pha leh, ‘Kei hi kei eng kae,’ tia nanmanhret sik eng, khava sōa ke’n kabing ratha neina heite tlomak eng, tâk Pa’n hri sik a amanthei eng rōk kha kahri kae ti hi nanhong manhret sik jo.

²⁹Khana anijōng katirpa khan a’nṭhōipui eng, kabinga amasō mak, ajârchu ke’n amalung tlaina aheitik a katlo ṭhak a kae.”

³⁰Jesu’n hihei hi ahrina aleikathei mi katamtak in anleitaksen jo.

³¹Khava jâra Jesu’n ama kataksenhei hneng ahri, “Nangni’n kaṭong hri nanjuia achang inchu, nangni kasonle kadiktak chei kha kae;

³²akadik kha nanmanhret sik, khana akadik khan nangni amasō sik chei.”

³³Anmani’n anmasôn, “Keini Abraham sōn ung kae, tûte sōk changmak ung, nang in, ‘Ning leh hnōma masō kachang sik chei,’ nati hi heimo natina?”

³⁴Jesu’n anhnenga ati, “Akadiktak kahri pek chei kae; tu achang inum setna katlo mi kha setna sōk kae.

³⁵Sōk inkhat kha ahei tik a a-innshung mi changṭhak mak; tâk sapa inkhat khachu ahei tik a-innshung mi kachang ṭhak.

³⁶Sapa khan amasō chei inchu, inchêntak a amasō sik jo chei kae.

³⁷Ke’n nangni Abraham sōn chei ti kamanhret. Kha’num kei hi that sik a nanrei eng ajârchu nangni’n kaṭong lomak chei ning.

³⁸Ke’n ka-Pa tamanhmu eng kha kahri, tâk nangni’nchu nanpa tamanthei chei kha nantlo.”

³⁹Anmani’n anmasôn, “Keini pachu Abraham kae.” Jesu’n amasôn hei, “Takkhet a nangni Abraham sōn kha nanchang inchu, ama’n aleitlo ṭōnhei kha leh in-anghrep a nantatlo sik kae.

⁴⁰Ke’n kahei tlo rakip vâng hei hin kapa hnenga inphut kathei akadik kha kaman theina jo chei kae, kha’num nangni’nchu that sik a nanrei eng. Hinghiva hi Abraham in heite leitlo mak!

⁴¹Nangni’n nanpa taleitlo kha nantatlo kae.” Anmani’n anmasôn, “Pa inkhat rōk kannei, khachu Pathen khet kha kae, keini asa kadiktak ung kae.”

⁴²Jesu’n anhnenga ahri, “Takkhet a Pathen kha nanpa achang inchu, kei nanlungset sik eng, ajârchu kei Pathen hnenga inphut a kajōng enga tûnhin ka-om eng. Kei kabing rachama akajōng eng changmak, tâk ama’n ajōngtir eng kae.

⁴³Kaṭong hri heisa mo nantamanhret theimak? Ajârchu nangni’n kaṭong hri rangei tor mak chei.

⁴⁴Nangni chu nanpa Rathla Kadikmak sa chei kae, khana nanpa kachang lungdo kha nantajui kae. Ama chu anphutbia inphut mikathat kae, ṭongdik langa khan omphung mak ajârchu ashunga ṭongdik kha om mak. Maleisei ahri kha ama ngaihrep ahri kae ajârchu ama chu malei kasei khana malei kaseihei pa kha kae.

⁴⁵Tâk-kha ke’n akadik kha kahri pek jo chei, khava jâra nangni’n ataksen mak chei.

⁴⁶Kei mikase kae tia masetna anikapek sik nankâra tu mo aka-om chei? Ke’n akadik kha kahria achang inchu, heisa mo nanta taksen mak eng?

⁴⁷Pathena inphut akajōng ama khan Pathen ṭong kha arangei. Nangni Pathena inphut changmak chei leh chu rangei mak chei.”

⁴⁸Anmani’n Jesu hneng, “Nang Samaria mi che khana ṭai karôn che kae, kanta ti hi dikmak ung mo?” anhongti.

⁴⁹Jesu’n amasôn hei, “Ke’n ṭai neimak eng. Ke’n ka-Pa kakaja, tâk nangni’n kei akaja mak chei.

⁵⁰Ke’n kabing lûrna sik jongmak eng. Tâk-kha anijōng kapek inkhat ka-om, ama kha kei langa ṭong anikatanpek kha kae.

⁵¹Akadik kha kahri pek chei kae. Tu achang inum kei mantheina kajui mi kha thihêr mak ning.”

⁵²Anmani’n ahnenga anti, “Nang ṭai karôn che kae ti hi tûn keini’n inchêna kanmanhret jo che. Abraham kathi jo, Sânkathemhei kathi jo hei, kha’num nang in, ‘Tu achang inum kei ṭong kajui mi kha ahei tik a thimak ning,’ natia kae.

⁵³Kanpa Abraham kathi jo; Abraham kanek a kalen eng natina changmak mo? Sânkathem he’m kathi jo hei. Nang tu eng mo a’nti che?”

⁵⁴Jesu’n amasôn hei, “Kei kabinga a’nlûrsak kachang inchu, kabing inlûrsakna kha heite emak. Nan-Pathen kae nantati kapa amatak khan amanlûr eng kae.

⁵⁵Nangni’n ama lamanhret hêrmak chei, tâk ke’nchu kamanhret. Ke’n ama manhret mak eng kati’nchu, nangni kapōa malei kasei kachang sik eng. Tâk-kha ke’n ama kamanhret khana aṭong kajui.

⁵⁶Nanpa Abraham in kajōngna sik pha ahmu sik kha le’npâk; khana ahmua le’npâk jo.”

⁵⁷Anmani’n ahnenga, “Nang kum 50 hmen latluklo chea, Abraham nalei hmua mo?” anti.

⁵⁸Jesu’n amasôn hei, “Akadiktak kahri pek chei kae: “Abraham intet mak hma aleika-omsa jo eng kae.”

⁵⁹Khava sōa anmani’n adengna sik hlunghei anleihrut; tâk Jesu abinga inthup a Bek-inn adahlon jo.