Read Komrem ṬŌNTLOHEI 1 Bible Online

ṬŌNTLOHEI 1 - Komrem bible

ṬŌNTLOHEI 1

¹Marit ka-om Theophilus: Kalekha hma-inkei shunga khan Jesu’n aṭōntlo aleiphut a inphut marvâna ṭhōisōt a a-om mak kârsenga aṭōn leitlo leh ami leimantheina hei chungchânga kaleimazet jo.

²Ama ṭhōitoua a-om mak hma asonle kachang sik a akadei mihei kha Rathla Intheng rathahrat vâng mansena aleinei heia kae.

³Ajârchu aleithisō kahnung ni 40 shunga ama hi kahringsōt ti hi hlamrin hla a-om hêrmakna sik phat katamtak a anhnenga le’nlâr. Anmani’n anleihmu khana Pathen Rengram chungchânga aleihri pek hei.

⁴Khana anmani anhe’n khôm pha, hiva ṭongpek hi aleipek hei: “Jerusalem hi dahlon mak ruh, tâk kapa ṭong leitep kaleihri pek chei kutchoi kha hngâk ruh.

⁵John in tui manhlutna aleitlo, tâk nangni chu kanikhō ṭhahrep shunga Rathla Inthenga manhlutna akachang sik jo chei kae.”

⁶Sonlehei kha Jesu leh an-inhmutō pha, “Rengram hi tûnhin Israel hneng napek male sik mo, Rōngpu” tia anleider?

⁷Jesu’n anhnenga, “Apha leh achâng hei hichu Kapa’n aratha neina vâng atep kae, khahei kha heitik sik mo ti hi nangni tamanhret sik rangei mak” tia aleihri pek hei.

⁸Tâk-kha Rathla Intheng kha nanchunga ajōng pha leh, ratha hratna kasip a nannei sik, khana nangni Jerusalem, Judea leh Samaria ram pumpuia khan chu raleichung achaina katlunga kasâkhi akachang sik chei kae,” ati.

⁹Hivahi ahrisō pha, khanga ama anlei enlai khan marvânting ṭhōitoua ka-om jo, khana anhmit hmua inphut sumtuk in aleimanhle jo.

¹⁰Khang’khan aketouna thangvân chung kha anmani’n anlei enlai, sōkphutrōia pōn bang invon pase 2 anhnenga hongkangir hei

¹¹khana anleihri, “Eh Galilee mihei, heisik a mo khangkhana akangir cheia thangvânlang nanta-entou? Nangnia inphut marvâna a’nṭhōitou, hiva Jesu hi, marvâna ase nantahmu kapōa ajōng inle nôk sik kae.” anti.

¹²Khava pha sonlehei kha khōpuia inphut kilometre inkhat kapōlim inkâra ka-om Olive Tlânga inphut Jerusalemting inle jo hei.

¹³Anmani khōpui shung kahlut heia, an-omna innden chunga kake jo hei: anmani khachu Peter, John, James leh Andrew, Philip leh Thomas, Bartholomew leh Matthew, Alphaeus sapa James, Aram inlungset Simon, James sapa Judas hei kae.

¹⁴Anmani kha nupuihei leh, Jesu nu Mary khana asōpui pasehei leh arup-rup a derna kanei sik le’nkhôm ṭhak ri hei.

¹⁵Kanikhō ṭhahrep sōa, akataksen ankhenga 120 kapō intûpna leika-om, khana ṭong kahri sik a Peter leikangirsōt.

¹⁶“Kasōpui akataksenhei, Jesu kasur mihei hlam heikaṭhōi Judah chungchânga amak hma Rathla Intheng in David beia aleimanhrisōt ṭong intheng kha hui akatlung nger sik kae.

¹⁷Judah kha eini kâra inkhat kae, ajârchu eini ṭōn shunga hin ama’m chen kanei sik a kadeisōtsa jo inkhat kae,” ati. (

¹⁸Aṭōnse tlona inphut alamsōt sêr vâng khan Judas in hleihmun inkhat aleirachôk, khava hmun a khan le’nkhei hlona ajōng tlâkna aphumpui kapōk khōia akari rakip leikasōksōt pet a kae.

¹⁹Khava ṭong kha Jerusalema ka-om mi rakip in anleithei, khava jâra khava hleihmun kha anṭonga Akeldama anti, “Thisen Hlei” tina kae.)

²⁰“Ajârchu Hlarabu a hing’hin inzet: ‘A-inn kha inn karam chang rasoh; Akahlō sik tûte om mak rasoh.’ Hing’hinum inzet: ‘Aṭōn hmun hi tu mo inkhat in thleng rasoh.’

²¹“Khava jâra, Rōngpu Jesu ṭhōisōt nôkna sâkhi kachang sik tu mo inkhat nikâra a’nvei nger sik kae. Ama kha Rōngpu Jesu leh nilônlena rakip a, John in atui manhlutna ṭong ahri lena inphut, Jesu’n nikâra inphut marvâna ṭhōitou achang ning katlunga nikâra le’nvei mi akachang nger sik kae.”

²³Khava jâra anmani’n mi 2 anleimantluk hei: Barsabbas tia a’nbek, Joseph intipa (Justus ti’m inhret) leh Matthias.

²⁴Khava sōa anmani’n, “Rōngpu nang in mi rakip mandonna namanhretsō, khava jâra anmani kâra inkhat,

²⁵achen sik hmun kajōna aleikase jo Judas kathlenga, sonle inkhat ṭōnhlam inzen sik kha amalârpek roh” tia anleider.

²⁶Khava sōa anmani’n rahming 2 kâra inkhat kadeisōtna sik a vâng-enna anneia, Matthias rahming kha anlei kadeisōt jo. Khana ama kha sonle 11 hei rup kâra anmanveisa jo.