Read Komrem ṬŌNTLOHEI 10 Bible Online

ṬŌNTLOHEI 10 - Komrem bible

ṬŌNTLOHEI 10

¹Caesarea hmun a khan, “Italy Regiment” tia inhret Rome sepei Captain, arahming Cornelius inti mi inkhat leika-om.

²Ama kha beklang tinga malung kahluttak inkhat kae; ama leh a-innshung mi pumpui in Pathen anleikamuk. Sara khōdeng kathei Jehudihei kha atlo theina chenna ale’nthōpui hei khana Pathen hneng um aleider ṭhak.

³Ni khat khōhlei pung 3 radona hin hmangtalâr inkhat aleinei, khava hmangtalâra khan Pathen ngeva jōng kahlut a, “Cornelius” tia aleibek kha inchêntak a aleithei.

⁴Ṭitpum a ngeva kha a-en kanga, “Heimo kae, apu?” aleiti. Ngeva khan ati, “Naderna leh nami bômna ṭōn chunga Pathen malung katlai jo, khana masôn sik chea intluk jo.

⁵Khana tûnhin Joppa khōa ka-om, mi inkhat, arahming kaseia Simon Peter intipa kabek sik a mi tir hei roh.

⁶Ama hi tui-ôngpui panga ka-om shavun kasyempa, Simon intipa inna khōhmea akatlung kae.”

⁷Khava sōa chu ngeva kha kasesōt jo, khava pha Cornelius in akahngâk sepeihei kâra bektinga malung kahlut mi inkhat leh asōk 2 aleibek hei.

⁸Ṭōn kasōk hei kha ahri pek hei khana Joppa kajōn sik a aleitirsōt jo hei.

⁹Ajîng kania khanga anselai Joppa lang anhnai jo, sûnṭim radona Peter kha derna kanei sik a innphu chunga leikake.

¹⁰Avon hongkaṭâm joa heikhat aleisâk hnōm jo; bu leh thlai ansōng laitak hmangtalâr inkhat aleinei.

¹¹Ama’n marvân ahe’n hlânga arakir manlia a’nkhit apheng kalentak kapō heimo inkhat hi raleia ahe’nkhei inthla aleihmu.

¹²Khava shunga khan ranhring rakip, bok a insôn rakip khana va rakip leika-om hei.

¹³Rasa inkhat in, “Thōi roh, Peter, that hei inna sâk roh!” ati.

¹⁴Tâk-kha Peter in, “Changmak, Rōngpu! Bek ngaia a’nthengmak a-emak leh akabōk hei sâkphung mak eng,” ati.

¹⁵Rasa khan avea, “Hei-hei achang inum Pathen in intheng jo tia aphôngsōt jo hei kha a’nthengmak a mandon mak jo roh,” ati.

¹⁶Khang’khan vōi 3 inlâra khava sōa chu marvânting le’nlotou jo.

¹⁷Hiva hmangtalâr hi heitina jo mo tia Peter in amandonhla laitak, Cornelius tahei tir mihei khan Simon inn kha anhei jongsōt joa, kekot kunga leikangir jo hei.

¹⁸Anmani ka-ông heia, “Simon Peter inti khōhmepa kha hin aka-om mo?” tia ander.

¹⁹Hmangtalâr kha heitina tâk mo akachang sik tia Peter in amandon laitak Rathla khan, “Rangei roh! Nakajong mi 3 hin ka-om jo hei.

²⁰Khava jâra intluk ina ṭumsuk roh, khana anmani leh sesap sik hi inkei-chio mak roh, ajârchu anmani hei hi kei tahei tir hei kae,” atipek.

²¹Khava pha Peter kaṭumsuk a mihei hneng khan, “Nanta jongpa kha kei eng kae. Heisik a mo akahong chei?” ati.

²²Anmani’n anmasôn, “Captain Cornelius tahei tir ung kae. Ama hi Pathen inmuk leh mikaṭha khana Jehudi mipui in inshângtak a kajana antanei mi inkhat kae. Naṭong hri arangeina sik nang hi a-inna abekna sik che Pathen ngeva’n aleihri pek kae.”

²³Peter in abek manhlut heia khava jân khachu khava hmun a anrek sapna sik a aleikhâm jo hei. Ajîng kania intluk a kasesap jo hei. Khana Joppa a ka-om takkasen ṭhahrep inum akahnung anleijuia kae.

²⁴Abân kania Caesarea katlung jo hei, Cornelius khan a-innkōhei seng leh aṭhōn marit hei seng aleibek mantûp heia aleihngâk ṭhak heia kae.

²⁵Peter kha aheihlut sik ting Cornelius in avaratōa, akekunga inkuna kajana chibei aleipek.

²⁶Tâk-kha Peter in akei mathōia, “Inding roh, ke’m mihring inkhat-hrep eng kae” ati.

²⁷Peter in Cornelius kha khanga a’nbekpuia innshunga aheihlut pha, mi katamtak anle’nkhôm kha ahmu jo hei.

²⁸Ama’n anhnenga ati, “Jehudi inkhat in Jât-hlop hei avaphak sik hei a-emak leh a’nthloppui sik hei hi apathen ôi dân in phemak ti hi nanmanhret pet. Tâk-kha tu inkhat hi beklanga a’nthengmak a-emak leh akabōk kae tia kamandon makna sik a Pathen in animanhmu jo eng.

²⁹Khava jâra kakabek a nantahei tir hei kha makheloa kahei jui jo hei kae. Khan chu, kader chei, heisik a mo kakabek nantahei tir hei?”

³⁰Cornelius in ati, “Ni 3 kathleng jo, tûn pha radona, khōhlei pung 3 a hiva ka-inna hin derna kaleinei. Sōkphutrōia pōn kavâr kasi pase inkhat kahmai kunga hong kangira,

³¹‘Cornelius! Naderna kha Pathen in athei pek jo che khana nami bômna hei kha’m amanhret pek jo che.

³²Joppa hmun a ka-om arahming kaseia Simon Peter inti mi inkhat hnenga sik tu mo inkhat tir roh. Ama kha tui-ôngpui panga ka-om Simon mama anti, Savun kasyempa inna khōhmea akatlung kae.

³³Khava jâra inrangtak a nakajong kahei tir hei kae, khana mankhôksak tak a najōng pek jo eng. Tûnchu Rōngpu’n nahri sik a amanthei che rakip inngei sik a Pathen ângshunga kankhenga ka-om jo ung.”

³⁴Peter in hing’hin aṭong hri aphut jo: “Pathen in mi rakip hi in-ang et a a-en me ti hi adikje tûnchu inchêna kamanhret sōt jo.

³⁵Tu jât-jât um chang rasoh ama inmuk leh akadik katlo rakip kha ama sik a rahlângthei kae.

³⁶Heirakip Rōngpu, Jesu Christa a inphut mōngna ṭong kaṭha Israelhei hnenga a’nphôngsōt kha nangni’n nanmanhret jo.

³⁷Tuihlut chungchânga John mantheina a’nchaisōa Galileea inphut ahe’nphut a Israel ram pumpui chunga ṭōn kalentak aleikasōk kha’m nanmanhret jo.

³⁸Nangni’n Nazareth Jesu chungchâng khana heikhong mo achunga Pathen in Rathla Intheng leh ratha neina aheibun mathlâk pek ti hi’m nanmanhret jo. Hmun rakip a ama kasea ṭōn kaṭha aleitlo khana Seitan ratha neina thōia ka-om rakip aleimandam hei, ajârchu ama kha Pathen in aleiompui.

³⁹Jerusalem leh Israel ram pumpui shunga aṭōn leitlo inhret inchênkhet hi keini ung kae. Khang’khan ama kha thingrakea anhem mankop a anleithat jo.

⁴⁰Tâk-kha ni 3 sōa Pathen in thina inphut aleikei mathōi,

⁴¹amirōkchu mi rakip hneng changloa asâkhi kachang sik a Pathen in akadeisōt, keini hei hneng aleimalâr, thina inphut athōisōt sōa khan bu leh thlai kanleisâksap pui jo.

⁴²Mi rakip hnenga ṭong kaṭha kaphông sik khana akathi leh akahring hei ṭong katan sik kha Pathen in ama hi amanṭang jo tina sâkhi akachang sik a ṭong pekna anei ung.

⁴³Tu achang inum ama taksenna kanei rakip hei setnahei kha arahming ratha neina jâra rangei mandam anchen sik tia ama chungchânga sânkathem rakip in anta leihridek jo kae.”

⁴⁴Khang’khan Peter in ṭong ahrilai, aṭong hri inngeia ka-om mi rakip chunga Rathla Intheng jōng kaṭum jo.

⁴⁵Jât-hlop hei chunga’m Pathen kutchoi pek, Rathla Intheng ajōng bun mathlâk kha Joppa inphut Peter leh ale’nṭhōipui takkasen, Jehudi he’n anhmu pha inlak anleisak hêr jo.

⁴⁶Ajârchu ṭonghlop a akaṭong heia Pathen lenna antachoi ka-ân kha anmani’n anleitheia kae. Khang’khan Peter in:

⁴⁷“Eini chunga ajōng katlung kapōa, hiva mihei hinum Rathla Intheng hi anchen jo. Tuihlut sik a inphut tu inkhat in akhâmtor sik hei mo?” aleiti.

⁴⁸Khava jâra ama’n anmani kha Jesu Christa rahminga tuihlut anchenna sik ṭong apek jo hei. Khava jâra kanikhō ṭhahrep ala-ompuina sik heia ngekna anleineia kae.