Read Komrem ṬŌNTLOHEI 11 Bible Online

ṬŌNTLOHEI 11 - Komrem bible

ṬŌNTLOHEI 11

¹Jât-hlop he’num Pathen ṭong hi anchen jo ti hi Judea ram pumpuia ka-om Sonlehei leh alak takkasen he’num anleithei jo.

²Peter kha Jerusalema avase pha, Jât-hlop hei sik a’m vuntan arangei tia akahnōmloi he’n anmaset a anti,

³“Nang hi vun katanmak hei inna akatlung che rōk changloa thlai katlung um nalei sâkpui hei!”

⁴Khava jâra Peter in omchen kasōk rakip kha akunga inphut aleihri pek jo hei.

⁵“Joppa khōpuia ke’n derna kaleineilai, hmangtalâr inkhat kaleinei. Ke’n arakir 4 a a’nkhit apheng kalentak kapō, heimo inkhat hi marvâna inphut ahe’nkhei inthla kahnengtak a a’nhnga kaleihmu.

⁶Ashunga ka-en manchên pha, inna ranhei, ramshahei, bok a kalôn hei leh vahei kaleihmu hei.

⁷Khava pha rasa inkhat in kahnenga, ‘Thōi roh, Peter; that hei inna sâk roh!’ aleiti eng.

⁸Tâk-kha ke’n, ‘Changthei mak ning, Rōngpu! Bek ngaia a’nthengmak leh akabōk him-him hei hi kabeia thlai lahlut phungmak,’ kalei ti.

⁹Rasa khan marvâna inphut avea, ‘Hei-hei achang inum Pathen in intheng jo ati jo kha a’nthengmak a mandon mak roh’ aheiti nôk.

¹⁰Hivahi vōi 3 atisōa akhenga marvânting ṭhōisōt a leika-om jo.

¹¹Khava phatak a khan Caesarea a inphut kei hnenga sik a anta heitir mi 3 hei kha kalei omna inn heikatlung jo hei.

¹²Malung inkei-chiona kasea kajuina sik heia Rathla khan aleihri pek eng. Hiva takkasen sōpui 6 hei hin Joppa inphut anjui unga Caesarea a ka-om Cornelius inna leikase ung.

¹³Ama’n ‘Joppa a ka-om arahming kaseia Simon Peter intipa hneng mi tir roh,’ tia akahri pek ngeva kha a-innshunga kahonga ajōng kangir aleihmuna kha ahri pek ung.

¹⁴‘Ama’n ahri pek sik chei ṭong vâng khan nang leh na-innshung nankhenga hukmanhring nanchen sik,’ tia aleihrina kha’m ahri peksa ung.

¹⁵Khana ke’n ṭonghri kahei phut pha, aphutna pet a eini chunga ajōng katlung kapōa, anmani chunga’m Rathla Intheng kha jōng kaṭum jo.

¹⁶Khava pha Rōngpu’n, ‘John inchu tui vâng tui hlutna atlo chei, tâk nangni chu Rathla Intheng vânga manhlut akachang sik chei kae,’ aleiti kha kamandonsōt jo.

¹⁷Rōngpu Jesu nitaksen jâra apek me khava kutchoi leh in-anghrep kha tûnchu Pathen in Jât-hlop he’m apek jo hei ti hi inchên jo; kei hi tu mo akae enga, Pathen kha kakhâm tor sik!” ati.

¹⁸Hivahi anthei pha anṭong masetna kha kahai jo hei khana Pathen anchoi ka-âna, “Pathen in Jât-hlop hei hneng kapha malung thlengna leh hringna pha apek jo hei,” anti jo.

¹⁹Stephen anthat lai suk man-rimna’n amanchek chai takkasen ṭhahrep hei kha Phoenicia, Cyprus, khana Antioch katlunga leikase heia Jehudihei hneng rōk ṭong anleihri.

²⁰Tâk-kha Cyprus leh Cyrenea inphut akava takkasen alak-hei khan chu, Antioch a kase heia Rōngpu Jesu chungchâng leh ṭong hi Jât-hlop hei hneng um anleiphôngle jo.

²¹Rōngpu ratha hratna’n a’nthloppui heia, mi katamtak in taksenna anleinei khana Rōngpu langting he’nhe jo hei.

²²Khava ṭong kha Jerusalema ka-om Bekrup atlung jo pha, Barnabas kha Antioch a anleitir.

²³Avatlung jo pha mipuihei chunga Pathen in mahâmṭhat abukna hei avahmu sōt a inpâk hêr jo, khava jâra anmalung pumpui vâng Rōngpu sik a hlamrinthei leh akadik anchangna sik a aleimathok hei.

²⁴Barnabas kha Rathla Intheng leh taksenna kasip mikaṭha inkhat kae, khana ama’n mi hingja Rōngpu hneng aheiṭhōi manhlut heia kae.

²⁵Khava sōa Barnabas kha Saul kajōnga Tarsusting kase jo.

²⁶Ama’n avahmu pha, Antioch ting aleiṭhōia kum khat katluk set a an-inhnia Bekrup mipuihei anle’nhmupui hei khana rup kalen he’m anleimanthei hei. Takkasenhei kha Christian tia bekna masa pen hei hi Antioch a inphut kae.

²⁷Khava pha shunga khan sânkathem ṭhahrep Jerusalema inphut Antioch a leikase hei.

²⁸Ankâra inkhat Agaba intipa kha, hong kangira raleichung pumpuia ṭâmpui inhnaktak ajōng kasōk sik kae tia Rathla hratna inphut aleisânsōt. (Hivahi Claudius in Caesar achang shunga aleikasōk kae).

²⁹Khava pha Sonlehei khan Judea a ka-om ansōpui, takkasenhei inthōpuina sik a antator kakham manrônna nei sik a inhnōmtō et jo hei.

³⁰Khang’khan antlosōa, khava sêr kha Bekrup upahei sik Barnabas leh Saul kut a anleimanrôn jo hei.