Read Komrem ṬŌNTLOHEI 12 Bible Online

ṬŌNTLOHEI 12 - Komrem bible

ṬŌNTLOHEI 12

¹Khava lai khan Reng Herod inum Bekrup mi ṭhahrep chunga suk manrimna ṭōn kha aleitlo manphut a kae.

²John sōpuipa James kha chemjâm vâng aleithat a kae.

³Khava atlo khan Jehudihei amantlai hei ti ahmu sōt pha, abân tlo manjōmna inkhat a Peter kha aleisur jo. (Hivahi Che philo Buhlom Revei laitak a akasōk kae).

⁴Peter kha sur achang jo pha, sepei 4 sâma rup 4 tahngâk kurkhum a aleikhum. Herod khan Rakan Kût a’nchaisō leh mipui ângshunga keisōa aṭong tan sik tia aleimantluk kae.

⁵Khava jâra Peter kha kurkhum a akhuma aleida, tâk Bekrup mihe’n ama sik a malung kahluttak a Pathen hneng derna anleinei.

⁶Herod in Peter kha mipui ângshunga ṭhōisōt sik tia atep ning amak hma jân a khan, Peter kha akahngâk sepei 2 hei kâra leikaje. Ama kha thirhrui 2 vâng anleikhit, khana kur kot kha’m sepei he’n kaṭhatak a anleihngâk.

⁷Manhret manloa Rōngpu ngeva jōng kangira, kurshung kha vâr in ara-âng jo. Ngeva khan Peter dâr kha akanok a aleimathō, “Inrang roh! Thōi roh!” aleiti. Khava laitak a khan a’nkhitna thirkehrui hei kha akut a inphut insōt a katla jo.

⁸Khava pha ngeva khan, “Nakhōnkir inkir ina, nakekōk inchōng roh,” atipek. Aleihri pek kapōa Peter in atloa, ngeva khan avea, “Nazakkō inse kha inkō ina kakahnung heijui roh,” aleiti.

⁹Anleikhumna kura inphut Peter in ajuisōt jo, kha’num ngeva tatlo kha takkhet a akasōk kae ti chu manhret mak; hmangtalâr ahmua aleimandon.

¹⁰Anmani’n akahngâk hma-inkeihei kha anhei rakansōt jo, khang’khan abân 2 tlukna’m anhei rakansōt nôk, achaina pena chu khōpui jōnna thir sōngkot kung kha heikatlung jo hei. Anmani sik a sōngkot kha abinga he’nhlânga, heikasōk jo hei. Hlampui inkhat anheitlâk, manhret manloa ngeva khan Peter kha aleidahlon jo.

¹¹Khantō khan Peter in ṭōn kasōk kha atak-khet achang kha aleimanhret jo. Khava pha ama’n, “Tûnchu takkhet a achang hi kamanhret jo! Herod ratha neina inphut leh Jehudi he’n tlosōt sik a antarei khana inphut anikasen sik Rōngpu’n angeva ajōngtir pek eng kae,” ati.

¹²Aomdân kha amanhret a, John Mark nu, Mary innting kase jo, khava hmun khan mi katamtak inkhôm heia derna anneia leika-om hei.

¹³Peter in vâng intong kot khâr kha aleiraki, khana Rhoda inti sōk nuhngâk kha a’nsôn sik a leikase.

¹⁴Peter karesō achang kha amanhret pha inpâk reia kot mahlângloa katlân inlea, kot kunga Peter angir kha ava manthei hei.

¹⁵Anmani’n, “Invet jo che!” anleiti. Tâk-kha amanu’n akadiktak kae aleiti. Khava pha anmani’n, “Ama rathla mo kachang sik,” tia anleimasôn nôk.

¹⁶Khanga anti shunga kha’num Peter inchu kot kha aleiraki kakeng. Achai-chaina chu kot anva mahlanga, anhmu joa inlak ansak jo!

¹⁷Anrasa adaina sik akut vâng ajâp heia khana kurkhum a inphut heikhong mo Rōngpu’n aheiṭhōisōt ti kha aleihri manchên pek hei. “Hivahi James leh takkasen alakseng um manthei hei ruh,” tia ahri pek hei; khava sōa ama chu hmunhlop tinga sik a adahlon jo hei.

¹⁸Jîngkhō ajōngvâr pha Peter chunga omchen leikasōk khan akahngâk hei kâra inhmakna inhnaktak amasō jo.

¹⁹Anva jōngna sik Herod in ṭong pekna aleinei hei, tâk hmuchu hmuphâk mak jo hei. Khava jâra akahngâk-hei kha ṭongderna anei heia khana thatna sik heia ṭong pekna anei jo hei. Hivasōa Herod in Judea kha adahlona, Caesarea hmun a phat ṭhahrep aleimanhmanga kae.

²⁰Herod kha Tyre leh Sidona ka-om mipuihei chunga ahnuk leikana hêr, khava jâra ama inhmupui sik kha arup a leikase hei. Ahma inkeitak a, reng khōpui kahngâk a nganse, Blasta intipa khan abômna sik heia anleijôr manhnōma kae. Khava sōa Herod hneng kahlut heia intōk inchamna sik ngekna anleinei, ajârchu anrama sâk leh in hi rengpa ram a inphut antahmu kae.

²¹Kadeisōt kani inkhat ning Herod khan areng lûrpōn kha a’nsia, alen in-ongna chunga mipuihei hneng ṭong aleihri.

²²Mipuihei khan, “Akaṭongpa so mihring changmak, pathen kae!” tia leika-ông hei.

²³Herod khan Pathen kajana leh lulenna apek mak jâra, khavatak a Rōngpu ngeva’n avōk mathlûk a khang’khan rahlung in asâk a kathi jo.

²⁴Khava shung heia khan Pathen ṭong kha inzersōt a kakhang joa kae.

²⁵Barnabas leh Saul khan ankhōhme chōn ṭōn kha anheitora, John Mark anheiṭhōia Jerusalema inphut he’nle jo hei.