Read Komrem ṬŌNTLOHEI 13 Bible Online

ṬŌNTLOHEI 13 - Komrem bible

ṬŌNTLOHEI 13

¹Antioch Bekrup a khan sânkathem leh oja ṭhahrep leika-om hei; khahei khachu: Barnabas, Simeon (Akadum intipa). Lucius (Cyrenea inphut), Manaen (Herod leh sei kalensōm), khana Saul hei hi kae.

²Anmani’n thlai anhngōia Rōngpu anleirazenlai, Rathla Intheng in hing’hin aleihri pek hei: “Kabekna hei ajârpen kha antlona sik a, Barnabas leh Saul kha aṭhensōt pek hei ruh.”

³Anmani’n thlai anhngōia, anchunga ankut anda a derna anneipek heia, antirsōt jo hei.

⁴Barnabas leh Saul kha Rathla Intheng in atir hei anchang leh inṭhōia Seleuciating kase heia khana inphut Cyprus tuikekhum kajōna rakōnga le’ntôr jo hei.

⁵Salami inti hmun antlung pha, intûpna innpuia Pathen ṭong anleihri. John Mark kha anṭōn kabôm sik a anle’nṭhōi.

⁶Paphos tlungna sik a khava tui takake khum ram kha katlung bit a anleihroa antlung jo pha, Jehudi mi abinga sânkathem eng kati, dôi kachoi, arahming Bar-Jesu inti mi inkhat leh le’nhmutō hei.

⁷Ama kha khava tui takake khum ram vaikarônpa, Sergius Paulus inti mikasing takpa ṭhōn inkhat leikachanga kae. Ram vaikarônpa khan Pathen ṭong hi arangeihnōm jâra Barnabas leh Saul hei 2 kha ahnenga aleibek hei.

⁸Tâk-kha Elimas (Greek ṭonga Bar-Jesu intipa rahming) inti dôi kachoipa khan aleihōt a khava ram a vaikarôn in taksen hnōmna malung aheineina inphut keisōt sik aleirei.

⁹Khava pha Paul ti’m a’nhret, Saul kha Rathla Intheng kasip phet a; khava dôi kachoipa kha a-enhrek a

¹⁰khana ati, “Nang Diabol sapa! Ṭōn kaṭha rakip kadōi che kae; akaṭhamak lungthim rakip kasip che khana Rōngpu ṭongtak rakip maleisei manchang sik nareiṭhak!

¹¹Rōngpu kut hi tûnchu nachunga aheikatla sik jo kae; nahmit heikacho sik khan sûn khōvâr nahmu mak sik jo kae!” Khava laitak khan akajingpak inkhat in ahmit ahei makhu joa inhmei hmeia akut a akakei sik mi a’njong jo.

¹²Omchen kasōk kha ram a vaikarôn in ahmu pha taksenna anei jo; ajârchu Rōngpu chunga intheina kha inlak aleisak hêra kae.

¹³Paul leh aloihei kha Paphos a inphut intôr heia; Pamphiliah ram shunga Perga khōpui katlung jo hei; khava hmun a khan John Mark in a’nṭhenpui heia Jerusalemting le’nle jo.

¹⁴Anmani Perga a inphut kase thang heia Pisidia ram a Antioch katlung jo hei; khana Châmhngat kani ning intûpna innpuia kase heia le’n ong hei.

¹⁵Moses dân a inphut leh sânkathemhei tamazet heia inphut teisōtna anneisō pha; intûpna innpuia vaikarônhei khan: “Sōpuihei, mathokna ṭonghri sik nannei inchu nanta hripek sik ung kanmadu,” tia ṭong anleimanthei hei.

¹⁶Paul kangirsōt a, akut akalânga, hing’hin ṭong aleihri manphut jo: “Ka-Israel changpui hei leh hina ka-om Pathen inmuk Jât-hlop rakip in eirangei ruh!

¹⁷Israel mipuihei Pathen khan kanpi leh puhei kha alei kadeisōt heia khōhme inkhat a Egypt ram a anleiom shunga jât kalentak a aleisyem hei. Aratha hratna vâng Egypt a inphut Pathen in aleiṭhōisōt hei,

¹⁸khana kum 40 nêrdiram a aleithōkpui hei

¹⁹Canaan ram a ka-om phung leh jât 7 hei kha asuk manhmang heia amipuihei kha aram kapua aleimatung hei.

²⁰Hiva rakip a hin kum 450 kapō leikahlut a kae. “Khava sōa sânkathem Samuel khang katlunga ṭongkatan aleipek hei.

²¹Khana reng neina sik a anleider pha, Pathen in Benjamin phunga Kish sapa Saul kha kum 40 anreng kachang sik a aleipek hei.

²²Ama kha alosōt sōa, Pathen in David kha reng amanchang. Ama chungchânga Pathen in hing’hin aleihri: ‘Kamantlo hnōm kalungdo rakip akatlo sik, Jesse sapa David kha kami madutak kae,!’

²³David khanghruia inphut Jesu hi Pathen in aṭong intepsa dungjuia Israel mipuihei huksōtpa amanchang jo.

²⁴Aṭōn tlo sik kha Jesu’n aleiphut mak hma, Israel mipui he’n ansetna inphut anhe’nhea tuihlut anchenna sik a John in ahri le pek hei.

²⁵Khana John in ngansena ṭōnhei kha achai sik ting, hing’hin mipuihei hneng aleihri, ‘Kei hi tu mo kachang sik tia nanmandon eng? Nantahngâk mipa kha kei changmak eng. Tâk-kha rangei ruh! Kei kahnunga ama kahong jo, khana kei chu akea inphut akekōk kasōtpek sik bek um karahōi changmak.’

²⁶“Abraham sōn, Israel kasōpuihei leh Pathen inmuk sik a hiva hmun a ka-om Jât-hlop hei: hiva hukmanhringna ṭong hi eini sik mônga ajōng-intir jo kae!

²⁷Ajârchu Jerusalema ka-om mihei leh anhlam kakeihei khan Jesu hi Huk inhringpa kae ti hi leimanhret mak hei, khana serning akaia antateisōt sânkathemhei ṭonghei kha’m manhret mak hei. Kha’num Jesu anlei masetna vâng khan sânkathemhei ṭong leihri hei kha hui anmathlunga kae.

²⁸Khana anmani’n ama anthatna sik ajâr heite anhmumak inum athatna sik a Pilate hneng ngekna anleinei.

²⁹Khang’khan ama chungchânga ṭong intheng taleihri rakip kha a’ntlosōa, thingrakea inphut anlo mathlâk a thlân inkhat a anleihre jo.

³⁰Tâk-kha thina inphut Pathen in aleikei mathōia,

³¹Galilee leh Jerusalem kâra hlam a akase hei hneng a’nṭhōipui heia kanikhō katamtak le’nlâra kae. Khava akahmu mihei khan tûnhin Israel mipuihei hneng sâkhi antloa kae.

³²Hiva ṭong kaṭha hi kantaheirôna nanhnenga akahong ung kae. Pathen in katlo sik tia nipi leh nipuhei hnenga ale’ntepna kha tûnchu Jesu hi amathōi manhringa, ansōn leh anpâr einihei sik a atlo jo. Inhni tlukna Hlarabu a hinga ale’nzet kapōa: ‘Nang kasapa che kae; tuning chu kei hi napa kachang jo eng.’

³³

³⁴Khana thlân shunga aṭop hêrmakna sik, thina inphut akei mathōina chunga Pathen taleihri kha hi kae: ‘David hnenga kale’ntepna dungjuia, a’ntheng leh akasôimak mahâmṭhatna kha kapek sik chei.’

³⁵Ṭonghmun inkhat a’m aleihri khet kapōa: ‘Taksenthei nasōkpa kha thlân shunga aṭop sik hnōmpek mak tin che.’

³⁶Ajârchu David khan ahring shunga Pathen lungdo kha aleitlo, khang’khan kathia, apu apahei thlâna anleihre, khana ataksa kha thlân shunga leikaṭop jo.

³⁷Tâk-kha Pathen in thina inphut amathōipa chunga chu khang’khan leichang mak.

³⁸Kasōpui Israelhei, nanhnenga setna rangei mandamna ṭong kantahrile hi Jesua inphut kae ti hi nantamanhret sik a kanmadu; khana tu achang inum ama kataksen rakip hei khachu Moses Dân in amasōtor mak jo setna inphut masō akachang sik hei kae.

³⁹

⁴⁰Khava jâra sânkathem he’n anta leihri kha nanchunga atlung makna sik, insing thei ruh:

⁴¹‘Mi innuisō kahrat hei, Enruh! mandonhla una thi jo ruh! Ajârchu tuninga katlo ṭōn hi tu mo inkhat in ahri manchên pek chei inum, nanta taksen mak sik kha kae!’”

⁴²Paul leh Barnabas khan khava intûpna inn kha dahlon sik ting, mipui he’n anôk a Châmhngat kani ning a’m khava kakhea mantheina anneina sik anleibek hei.

⁴³Mipui he’n khava inkhômna a inphut ansōksōt pha, Jehudi katamtak hei leh Jehudihei bek ka-ôi Jât-hlop katamtak he’n Paul leh Barnabas kha anleijui jo hei. Sonlehei khan Pathen maritna shunga akahring anchang ṭhakna sik a mathokna anleinei hei.

⁴⁴Abâna Châmhngat kani ning khan chu khōpuia ka-om mihring rakip hei Rōngpu ṭong inngei sik kahong hei.

⁴⁵Mipui intûp kha Jehudi he’n anhmu hei pha, thangsetna leikasip jo heia Paul ṭonghri hei kha andema inzakna anleipek jo.

⁴⁶Achang ravâng kangam chet a Paul leh Barnabas in kaṭongsōt jo hei: “Nangni hnenga Pathen ṭong hi hri masa pen sik arangei. Tâk-kha nanrahlâng mak jâra leh kumsôt hringna kachen sik a nanbinga rahōi kasōkmak a nan indon jâra, kantadahlon cheia Jât-hlop hei hnengting jôk akase sik jo ung kae.

⁴⁷Ajârchu hivahi Rōngpu tapek ung ṭongpek kha kae: ‘Vânhnōi pumpui huksōt achangna sik, Jât-hlop hei sik vâr inkhat a kasyem jo che kae.’”

⁴⁸Khava ṭong kha Jât-hlop he’n anthei pha, inpâk heia Rōngpu ṭong kha anchoi ka-ân jo; khana kumsôt hringna kachen sik a kadeisōt hei khan atakkasen kachang jo hei.

⁴⁹Khava rajeia hmun rakip a Rōngpu ṭong kha inthanga inzer jo.

⁵⁰Tâk-kha Jehudihei khan Pathen inmuk khava khōpuia hlamkakeihei leh omje inshâng Jât-hlop nuhmeihei kha anleikachok heia kae. Anmani’n Paul leh Barnabas chunga suk manrimna ṭōnse anphut a anrama inphut anleihnongsōt jo hei.

⁵¹Anchunga malung tlaimak jâra sonlehei khan ankea vaiphin kha ankathing mathlâk khum heia Iconiumting kase jo hei.

⁵²Antioch a taksenna kaneihei kha inpâkna leh Rathla Intheng leikasiptak heia kae.