Read Komrem ṬŌNTLOHEI 15 Bible Online

ṬŌNTLOHEI 15 - Komrem bible

ṬŌNTLOHEI 15

¹Judea a inphut mi ṭhahrep Antioch a kahong heia, “Moses Dân dungjuia nanvun nantan mak inchu hukmanhringna chenmak tin chei,” tia takkasenhei hneng anleimanthei hei.

²Hiva ṭong chunga Paul leh Barnabas in rahnak a inkhe puina anleinei hei, khava jâra Paul leh Barnabas khana Antioch a takkasen ṭhahrep hei, sonlehei leh upahei inhmupui sik a Jerusalema avakase sik a le’nhnōm hei.

³Khang’khan Bekrup in anleitir hei; khanga Phoenicia leh Samaria anhlut pha, heikhong mo Jât-hlop hei hi Pathen langa ahe’nhe hei ti ṭong hi thang anleikōi; hiva ṭong hin takkasen rakip hei inpâk hêrna leikachang.

⁴Jerusalem antlung pha khana ka-om Bekrup leh sonlehei khana Sehmang-pachong he’n rahlângna anleinei hei, khang’khan anmania inphut Pathen in atlo ṭōn heirakip kha anleihri pek hei.

⁵Tâk-kha takkasenhei kâra Pharisee rup a invei mi ṭhahrep hong kangirsōt heia, “Jât-hlop hei kha’m anvun antatan nger sik khana Moses Dân anjuina sik a’m nihri pek nger sik hei kae” anleiti.

⁶Hiva ṭongder chunga mandon sōmna kanei sik a sonlehei leh upahei le’nbe hei.

⁷Pha kasôttak inhmutōna anneisōa Peter kangirsōt a ahri, “Sōpuihei, Jât-hlop he’n Ṭong kaṭha hi antheia antaksenna sik, anhnenga ṭong kaphông sik a nankâra inphut Pathen in akadeisōt eng hi nanmanhret pet.

⁸Khana mi rakip malung mandon inhretsō Pathen khan eini apek me kapōa anmani chunga’m Rathla Intheng ajōng pek hei hin ahnōm pekna hei kha amanchên jo kae.

⁹Ama’n einihei leh anmani anikhōi ṭhenna heite damak jo, ajârchu anmani’m antaksenna jâra ansetnahei arangei mandam pek jo hei.

¹⁰Kha achang inchu, heisa mo tûnhin pi leh pu he’num, eini’num nileirôn tor mak jo phur kahrik kha anmani khōn chunga manrôn heia Pathen hi enmansin sik nantala madu mo?

¹¹Changthei mak ning! Anmani kapōa, eini’n nitaksena khana Reng Jesu maritna me khan ahuksōt jo me kae.”

¹²Pathen in Jât-hlop hei chunga det-hla leh ṭōn-inlak Paul leh Barnabas heia inphut atlona thangkōi kha anthei pha a’ntûp ankhenga kadai hnger jo hei.

¹³Anṭonghri a’nchai pha, James kha heikaṭong, “Rangei ruh kasōpuihei!

¹⁴Ama ta kachang sik mihei kha ankâra inphut alosōt heia, heituk-hrep mo Pathen in Jât-hlop hei kha amankhôk sak hei ti kha tuna khan Simon in ahri manchên jo.

¹⁵Hivahi sânkathemhei ṭong inum ahnōma kae. Ṭong intheng in ahri kapōa:

¹⁶‘Hivasō leh kei he’nle sik eng, Rōngpu’n ati, khana David rengram kha kamatung ther sik. Akaṭetsa kha kasakther sik khana kamanngar nôk sik.

¹⁷Mihring phung leh jât rakip kahnenga kahong sik hei, kata kachang sik a kabek Jât-hlop rakip hei kha’m.

¹⁸Hmalaia inphut manhretna anikapek Rōngpu’n hinga ati.’

¹⁹James in aleihrisa, “Hivahi kei mandonna kae, Pathen langa ahe’nhe jo Jât-hlop hei hi bōina pek mak hei rih.

²⁰Khava kanek a, anhnenga chithi mazet jôk me sona bek chônngaia akabōk bu leh thlai ansâk makna sik, ajârchu khahei kha limsyem hnenga tōknahei kae; jông leh kîk a inphut anbinga an-inkhâmna sik; khana karâk-hlon ranhring leh thisen ansâk makna sik a manthei hei rih.

²¹Ajârchu hmalaia inphut Moses Dân hi Châmhngat kani ning akaia intûpna inna ale’ntei ṭhak jo kae, khana aṭonghei hi’m khōpui rakip a ale’nhrile ṭhak jo kae.”

²²Khava pha Sonlehei khana upahei leh Bekrup pumpui khan Paul khana Barnabas leh inṭhōia Antioch a avakase sik a ankâra inphut mi ṭhahrep kadei sik le’nhnōm jo hei. Anmani’n takkasen he’n inshângtak a kajana antanei mi 2, Barsabbas inti Judah leh Silas kha anleikadei hei.

²³khana hiva ṭong hi anleimanrôn hei: “Nansōpui, Sonle leh upa, keini seng in, Antioch, Syria leh Cilicia a ka-om, Jât-hlop a a’njōr kansōpui nankhenga kanhei chibei chei.

²⁴Kanrup kâra inphut mi ṭhahrep aleikase he’n anṭong hri vâng anmanbōi jo chei ti ṭong kanthei, kha achang inum anmani kha keinia inphut mansena heikhat antahmu changmak.

²⁵Khava jâra ṭongkarôn ahlek kadei heia nanhnenga heitir sik a kankhenga intûp unga inhnōmtō jo ung. Anmani kha kanṭhōn marit Paul khana Barnabas leh he’nṭhōi sik hei.

²⁶Anmani hi Rōngpu Jesu ṭōn sik a anhringkhō kaphesōt jo hei kae.

²⁷Khan chu hiva kanlekha heimazet hi antakkhet a ṭong mathlungna kanei sik a Judas leh Silas kanheitir hei.

²⁸Hiva juimak kaṭhamak dânhei teilochu aralak phur hrikna pek mak sik cheia Rathla Intheng leh inhnōmtō jo ung:

²⁹Lim inthoi insânna thlai sâk mak ruh: thisen sâk mak ruh, karâk-hlon ran sâk mak ruh, khana jông leh kîk a inphut nanbinga inting ruh. Hivahei senga inphut nan-inhrungthei inchu akaṭha katlo kha kachang sik chei. Maritna chibei kanhei pek et chei.”

³⁰Ṭongkarônhei kha Antioch kajōn sik a antir jo hei, ahmun antlung pha takkasenhei seng kha anmantûp heia anlekha heirôn kha anpek jo hei.

³¹Mipuihei khan aṭong kha antei pha, anta heimazet mathokna ṭong khan inpâkna amansip jo hei.

³²Judah leh Silas, sânkathem he’n phat kasôttak inbektōna anneipui heia malung ngamna leh ngarna anleipek hei.

³³Khana khan pha bongkhat anhmang sōa, takkasenhei khan kamōng leh katlai senga anmathla heia, anheikatir hei hnenga sik inle nôk jo hei.

³⁴Tâk-kha Silas chu khava hmun a aleika-om sik a le’ntluk jo.

³⁵Antioch a khan Paul leh Barnabas kha pha bongkhat leika-om heia, mi ralak katamtak leh inṭhōia Rōngpu ṭong kha anphônga anleimanthei hei.

³⁶Pha bongkhat sōa Paul in Barnabas hneng ati, “Rōngpu ṭong nileiphôngna khōpui rakip kha vachōn male me sona khana ka-om sōpui rakip hei vaphâk hei rih, khana heikhonga alaka-om hei mo ti kha’m vamanhret sōt rih.”

³⁷Barnabas in John Mark kha inṭhōipui sik a aleimadu,

³⁸tâk Paul inchu ama ṭhōi nôk sik hi kadik tia leimandon mak, ajârchu ankhōhme leisena khan achaina katlunga anmani leiompui mak hei, Pamphiliah a inphut akahnung amalea aleidahlon heia kae.

³⁹Khana khan rahnak a le’nkhe heia, le’nṭhen jo hei: Barnabas khan Mark a’nṭhōia Cyprus ting rakōnga le’ntôr jo.

⁴⁰Paul in Silas kha akadeia ansesōt pha, takkasenhei khan Rōngpu maritna ensuina shunga an-omna sik anleipek sōt jo hei.

⁴¹Syria leh Cilicia ahroa kasea, Bekrup-hei kha aleisuk manhnet heia kae.