Read Komrem ṬŌNTLOHEI 17 Bible Online

ṬŌNTLOHEI 17 - Komrem bible

ṬŌNTLOHEI 17

¹Paul leh Silas khan Amphipolis leh Apollonia anpetana Thessalonica kahong jo hei, khava hmun a khan intûpna innpui inkhat leika-om.

²Atlo-ngai kapōa Paul kha innpuia leikase. Khana khan Châmhngat kani ni 3 shunga mipuihei kha inhoulimna aneipui hei, ṭong intheng apan a

³ahri manchên pek hei khana Messiah khan inrimna athōk a thina inphut athōisōt sik ṭong kha malârna aleinei pek hei. “Nanhnenga kaphôngsōt hiva Jesu hi Messiah kha kae,” tia Paul in aleihri.

⁴Ankâra mi ṭhahrep anhri manhnōm heia Paul leh Silas kahnung anleijui jo; khang’khan hlamkakei nuhmei katamtak leh Pathen inmuk Greek mi katamtak he’n anleijui jo hei.

⁵Tâk-kha Jehudi ṭhahrep anthang kase joa hnemna kase, hlamlena akalôn lele hei kha anchom heia mipui inchokna anleitlo jo. Anmani’n khōpui pumpui anmanbōicher joa Paul leh Silas jongsōt heia mipui ângkunga keisōna sik a Jason intipa inn kha anleibuhlu jo.

⁶Tâk-kha anhmumak hei pha, Jason leh takkasen alak-hei kha khōpui vaikarônhei ângkunga ankei heia, “Hiva mihei hin ahmun rakip a inchok inhângna anmasō! Tûn nôk hin kankhōpuia kahong heia,

⁷Jason in a-inna amathlung hei. Anmani’n Caesar dân heirakip ansukkhōia, Jesu inti Reng hlop inkhat ka-om anti,” tia ka-ông hei.

⁸Khava anṭonghri khan a’ntûp mipui leh khōpui vaikarônhei kha anmanhrâng jo hei.

⁹Vaikarônhei khan Jason leh aralak-hei kha masō anchangna sik sêr anmantei heia, anmasō jo hei.

¹⁰Jân ahong changlim leh takkasen he’n Paul leh Silas kha Bereating antir jo hei. Anmani antlung pha intûpna innpuia leikase hei.

¹¹Khava hmun a ka-om mihei kha Thessalonica mihei kanek a anmalung le’ntheng. Anmani’n ṭong inhri kha malung kahluttak a anleirangei, khana Paul tahri kha akadik khet mo ti hmusōtna sik a nitina Ṭong intheng anleiteia kae.

¹²Mi katamtak in anleitaksen khana kalen kahrâng Greek nuhmei hingja leh pase katamtak he’num anleitaksena kae.

¹³Tâk-kha Thessalonica a ka-om Jehudi he’n Berea khana’m Paul in Pathen ṭong aphông jo ti ṭong anthei pha kahong heia mipuihei kha anmathok heia anmanchōr jo hei.

¹⁴Inrangtak a takkasen he’n Paul kha tui-ôngpui pangting anvathaksōt jo; tâk Silas leh Timothy chu Berea a khanga leika-om hei.

¹⁵Avakathaksōt mihei khan Paul kha Athen katlung anvajui khana Silas leh Timothy in a’nrangthei chen a antava’n chunpui sik a Paul mansena ṭong leh inṭhōia Bereating he’nle jo hei.

¹⁶Athena Paul in Silas leh Timothy aleihngâk hei lai khan, akhōpui shunga limsyem kasiptak kha ahmu sōt pha amalung leihōi hêrmak.

¹⁷Khava jâra kamukna innpuia Jehudihei leh Pathen inmuk Jât-hlop hei, khana tetlânga ani tina akalônle mihei a’nhoulimpui hei.

¹⁸Epicure leh Stoic inti hei oja he’num inkhena anleineipui. Ankâra mi ṭhahrep in ander, “Hiva manhretna neiloa inhretsakpa hin heimo hri sik arei?” Alak in anmasôn, “Ramlak Pathenhei chungchânga ahri kachang sik.” Paul in Jesu leh athōisōtna chungchânga mantheina aleinei hei jâra khanga anta leihri kae.

¹⁹Khava jâra Paul kha khōpuia Sehmang-pachong, Areopagus hei ângkunga anheiṭhōia, “Hiva nahri intheina ther chungchâng hi kanmanhret hnōm.

²⁰Nahria kantathei ṭhahrep hei hi keini sik a chu det-hla inkhat alachang jâra heitina mo kanmanhret hnōm,” anleiti.

²¹(Athena ka-om mi rakip leh khava hmun a ka-om ram hlop mi rakip in heite tlo loa tûntûna ṭongther rangeina leh hrisōmna sik a anphat rakip kha hmang sik anleimadu).

²²Khōpui Sehmang-pachonghei hma a Paul kangirsōt a hiva ṭong hi aleihri, “Ahlam rakip a Athena ka-om nangni hi bektinga nanmalung kahlut ti hi kahmu sōt.

²³Nankhōpuia hin kalônle enga nankamukna hmunhei ka-en in, maichâm inkhat chunga, ‘Manhret lo Pathen hneng’ tia a’nzet kahmu sōt. Kamuk chu nantakamuk a, manhret chu manhret lo chei, khava Pathen kha tûnhin nanhnenga kaphôngsōt kae.

²⁴Vânhnōi leh heirakip kasyem Pathen hi marvân leh ralei Rōngpu kae, khana ama chu mihring kutsyem Bek-inna om mak.

²⁵Ama sik tlopekna leh pekna ninei sik heite ama’n rangei mak, ajârchu mi rakip sik a hringna leh kaphuk sânna khana heirakip kapek kha ama kae.

²⁶Mihring inkhat a inphut phung tin jâttin rakip hi asyema raleichung pumpui kadap a aman om hei. Hmapet a inphut aphat hrep atep a an-omna sik ramri tepsa a ada heia kae.

²⁷Hing’hin aleitlodek ajârchu ama rangeina annei pha leh ama anjong theina sik khana anhmu theina sik a kae. Kha’num eini tûte inkhatbek a inphut Pathen hi kahla a om mak;

²⁸tu mo inkhat tahri kapōa, ‘Ama a kahring me, inhling me khana ka-om me.’ Hivahi nanhla kaphō ṭhahrep hei tahri kapōa, ‘Eini hi’m ama sa me kae.’

²⁹Eini hi Pathen sa nichang jâra, ama ara-âng hi mihring kutthem leh tlotheina vâng hlung, dangka khana sana vânga insyem lim kha apō sik tia nimandon mak sik kae.

³⁰Mihring he’n Pathen anleimanhret mak laia pha kha Pathen in-enmak jo, tâk tûnchu hmun rakip a mi rakip hneng anṭhatmakna hlam a inphut anhong inhena sik ṭong pekna anei jo hei.

³¹Ajârchu akadeisōt mi inkhatpa jâra vânhnōi pumpui hi akadik a ṭong atanna sik kanikhō kha atep jo. Amapa kha thina inphut akei mathōi jo jâra khan hivahi mi rakip hneng malâr manchênna anei jo!”

³²Paul in thia inphut thōisōt ṭong ahri kha anthei pha, mi ṭhahrep in anleimanuisō, tâk alak inchu, “Hiva ṭong hi avea nahri pek nôk sik unga kanmadu,” anleiti.

³³Khang’khan inkhômna hmun kha Paul in aleidahlon jo.

³⁴Mi ṭhahrep in anjuia khana taksenna annei jo, ankâra inkhat kha Sehmang-pachonghei kâra Dionysius intipa kha kae; khana alak mi ṭhahrep leh Damaris inti nuhmeinu kha kae.