Read Komrem ṬŌNTLOHEI 18 Bible Online

ṬŌNTLOHEI 18 - Komrem bible

ṬŌNTLOHEI 18

¹Hivasōa Paul in Athen kha adahlona Corinthting kase jo.

²Khava hmun a khan Pontus a a’nte arahming Aquila inti Jehudi mi inkhat leh le’nhmu hei, lasôt lolaia Italy a inphut a nuhmei Priscilla leh inṭhōia akahong hei kae, ajârchu Caesar Claudius khan Jehudi rakip in Rome andahlonna sik ṭong aleipek hei. Anmani inhmupui sik a Paul kha leikase,

³khana anmani leh ka-omsap heia ṭōn um aleitlosap pui hei, ajârchu ama’m anmani kapōa pōn-inn kaṭhuina vânga a’nvei mi kae.

⁴Jehudihei leh Greek-hei malung surna sik a Châmhngat kani akaia kamukna inna kasea houlim aleineipui hei.

⁵Macedonia a inphut Silas leh Timothy anheitlung pha khan chu, Jehudihei hneng Jesu hi Messiah kae tia ṭong phôngsōtna leh sâkhi pekna Paul in apha nei rakip aleipek sōt a kae.

⁶Anmani’n achunga dōina leh ṭongse anhri pha ama’n atheikada a apōna vaiphin kha akathing thlōn heia hing’hin ahri pek hei, “Nangni nan-inhmang inchu, nanbinga maset nanta’nrôn sik kae! Ke’n mô kha rônmak ning. Tûna inphut chu Jât-hlop hei hneng kase sik jo eng.”

⁷Khava jâra anmani kha adahlon heia, Pathen inmuk Jât-hlop mi inkhat, Titius Justus intipa inna vaka-om jo; ama inn kha intûpna innpui hnengbât a aka-om kae.

⁸Intûpna inna hlamkakei Crispus intipa leh a-innshung mi rakip in Rōngpu antaksen jo; khava ṭong kha Corinth a ka-om milak he’num antheia, antaksena, tui kahlut jo hei.

⁹Jân khat hin Paul in hmangtalâr inkhat aneia, ahnenga Rōngpu’n hing’hin aleihri pek, “Ṭitna neimak roh, khang’khan bângloa ṭong kha hri ṭhak roh,

¹⁰ajârchu ke’n ka-ompui che. Tûte’n nang sukset tor mak hei tin, ajârchu hiva khōpuia hin kami hingja ka-om hei.”

¹¹Khang’khan Paul kha khava hmun a khan kum khat leh aher leika-oma mipuihei kha Pathen ṭong aleimanthei heia kae.

¹²Gallio kha Achaia ram a Rome vai karôna matungsōt aheichang pha, khana ka-om Jehudihei kha intûp heia, Paul kha ansura, ṭongtan hmun a anleiṭhōi.

¹³“Hiva mipa hin dân dōina hlam a Pathen ankamukna sik mipui mathlem mathlâkna sik arei!” anleiti.

¹⁴Paul kha heiṭong rong atilaitak Gallio khan Jehudihei hneng, “Hivahi ṭōnse a-emak leh a’nṭhe intlona chungchânga achang inchu Jehudi nangni ṭong karangei sik hi ahlam akasōktak kae.

¹⁵Tâk-kha hiva hichu nanṭong, nanrahming khana nandân chungchânga inkhena akachang khan-e nanbinga intlo jo ruh. Hinghiva kapō hei ṭongkatan kha changmak eng!” atipek hei.

¹⁶Khana ṭongtan hmun a inphut ahnong sōt jo hei.

¹⁷Anmani’n intûpna innpui hlamkakei, Sosthenes kha ansura, ṭongtan hmun hma a khan anleirachâk jo. Tâk-kha khavakha Gallio khan chu heite’m leingeisak mak a kae.

¹⁸Corinth a khan Paul kha takkasenhei leh kanikhō katamtak leika-omsap hei, khava sōa Priscilla leh Aquila a’nṭhōi heia Syria kajōn sik a rakōnga le’ntôr jo hei. Cenchreae a inphut a’ntôr mak hma intepna inkhat aleinei jâra asam aleivoa kae.

¹⁹Ephesus katlung heia, khava hmun a khan Paul in Priscilla leh Aquila aleidahlon hei. Ama chu intûpna inna vakahlut a Jehudihei leh inbektōna avaneia kae.

²⁰Mipuihei khan a-omsôt detna sik anleingek, tâk leihnōm pek mak hei.

²¹Khava kanek a, ama’n, “Pathen lungdo achang inchu nanhnenga kahong nôk sik eng,” atia adahlon jo hei. Khang’khan Ephesus a inphut le’ntôrsōt jo.

²²Caesarea atlung pha, Jerusalema kasea bekrup kha chibei avapek khana, Antioch ting kase jo.

²³Khana khan phat ṭhahrep a-omsōa, adahlona Galatia leh Phrigia ramṭhen aleihroa takkasenhei ratha alei manngar pek hei.

²⁴Khava pha Alexandria a a’nte, Apollos inti Jehudi mi inkhat Ephesus a kahong. Ama kha ṭonghri kathemtak leh ṭong intheng kaṭha nenga manhretna kanei mi kae.

²⁵Rōngpu hlam kha anta hongmanthei jo kae, khana Jesu chungchânga ratha kahroktak a aleiphôngsōt a kadik a mi aleimanthei heia kae. Kha achang inum, John tui manhlutna rōk kha aleimanhret a kae.

²⁶Kangamtak a intûpna inna ṭonghri aleiphut jo. Khavakha Priscilla leh Aquila he’n anthei pha, inna anṭhōia, Pathen hlam kha kadiktak a anleihri manchên peksa jo.

²⁷Khang’khan Apollos khan Achaia ting se sik a mandonna aleinei, khava jâra Ephesus a ka-om takkasen he’n Achaia a takkasenhei hneng ama kha anleiralamna sik a lekha anleimazet pek a kae. Ama avatlung pha, Pathen maritna jâra takkasenhei sik a khan inṭangpui kaṭhatak hongkachang jo.

²⁸Ajârchu mi makhe athemna vâng Jesu’n Messiah achangna kha ṭong inthenga inphut malârna apek a tlângpui inkhena shunga Jehudihei kha aleitor heia kae.