Read Komrem ṬŌNTLOHEI 20 Bible Online

ṬŌNTLOHEI 20 - Komrem bible

ṬŌNTLOHEI 20

¹Ṭong inhnok kha adaisō pha, takkasenhei kha Paul in aleibek mantûp hei khana mathokna ṭong leh inṭhōia ale’n thlâpui jo hei. Khava sōa adahlon heia Macedonia ting kase jo.

²Khava ramṭhenhei kha ahroa mipuihei kha ṭong katamtak vâng mathokna aleinei hei. Khava sōa Achaia a kahonga,

³khava hmun a khan thla 3 leika-om. Syria ting se sik a a’ntluksō jo ravâng khana ka-om Jehudi he’n that sik a anṭōn mantluk kha amanhretsōt pha Macedonia hroa a’nle sik a amandon jo.

⁴Berea a inphut Pyrrhus sapa Sopater kha ama leh inṭhōia leikase sap hei; khang’khan Thessalonica a inphut Aristarchus leh Secundus, Derbea inphut Gaius, Asia ramṭhen a inphut Tychicus leh Trophimus khana Timothy hei seng leh leikase sap heia kae.

⁵Kanhma a leikase heia Troas a anleihngâk ung.

⁶Che philo buhlom rehōisōa Philippia inphut intôr unga, ni 5 sōa Troas a inhmutō jo ung, khana khava hmun a khan kani vekhat leikachōng ung.

⁷Châmhngat kani ning khōhleia lenkhôm thlai kasasōm sik a le’ntûp ung. Ajing kani leh chu akase sik jo ung achang jâra mihei hneng khan jân ṭhangṭim katlung Paul in ṭong aleihri.

⁸Kan-inkhômna chunga innden shunga khan thaihmei katamtak le’ndet invâra kae.

⁹Eutychus inti rether inkhat kha thlikot a le’n ong, khana Paul in ṭong ahri shunga khan ama chu inngui-nguia, achai-chaina chu kaje hnger joa, inn chung thō 3 a inphut raleia jōngkatla joa kae. Anmani’n anvaphon pha leikathi jo.

¹⁰Tâk-kha Paul jōng kaṭuma kakhup a akakōa, “Nanmalung mandong mak ruh, ama lakahring!” ati.

¹¹Khava sōa chungting kaketoua buhlom akhōia ansâk jo. Kani ahong sōk katlunga a’nbekpuisō heia, Paul in adahlon jo hei.

¹²Rether naipang kha kahringa innting anṭhōia anmalung leikamōng hrânghra a kae.

¹³Assos hmun a khan Paul kha rakōng kanta manchōng sik achang jâra keini chu rakōnga le’ntôr masa ung. Ama chu kehlama akajōng sik achang jâra hinghina kantatlo sik a aleihri pek ung.

¹⁴Assos hmun a kan inhmutō pha, rakōnga kanman chōnga Mitilen ting kase jo ung.

¹⁵Khana inphut intôr unga ajîng kania Chios katlung jo ung, nikhatsōa Samos katlung ung khana abân kania khan Miletus katlung jo ung.

¹⁶Asia ramṭhen shunga oma phat manhmang makna sik, Ephesus khehlona intôrthang sik Paul in aleimandon. Achangthei sik a a-enchu Pentecost kani mak hma det a Jerusalem tlungtor ngerna sik a le’nhnot hêra kae.

¹⁷Ephesus a Bekrup upahe’n anlei ratōna sik a Miletus a inphut Paul in ngekna ṭong aleimanrôn hei.

¹⁸Anmani anheitlung pha hing’hin aleihri pek hei, “Asia ramṭhen kahei tlung ninga inphut ka-ompui cheia kaphât rakip kahmang kha nangni’n nanmanhret.

¹⁹Jehudi ṭhahrep he’n ṭōnse anmantluk jâra kachunga phat intak aleikatlung shung heia khan malung innem leh hmit-rathli pum a Rōngpu sōk changna kaṭōn kha kaleitlo.

²⁰Nan-innheia leh tlâng kâra ṭong kahrina leh kaman theina chei shunga ṭhatchômna nantaneipui sik inkhatbek hrisōt loa damak eng ti kha nanmanhret.

²¹Jehudihei leh Jât-hlop hei hneng in-angtlinga ansetna inphut Pathen langa anhong inhena sik leh ni-Rōngpu Jesu antaksenna sik a khôk saktak a kaleihri pek hei.

²²Khana khan kachunga heimo akasōk sik ti manhret loa Rathla Intheng ṭong kajuia Jerusalemting tûn kase sik eng.

²³Ke’n hirōk hichu kamanhret khachu kurkhum leh khōdeng theina’n ahngâk eng tia kasena khōpui rakip a Rathla Intheng in aleimanthei eng.

²⁴Tâk-kha ke’nchu kahringkhō hi kei sik a chu heite kahnemmak inkhat a kamandon jo; kahlam hro hi pui mathluk sik khana Pathen maritna chunga ṭong kaṭha phôngsōtna sik Rōngpu Jesu tapek eng ṭōn hi chaihlon sik rōk hi kamadu jo.

²⁵“Pathen rengram ṭong kahrilea nankâra leikaleng eng. Khana tûnchu nangni tu inkhat in avea ahmu nôk mak jo tin chei ti hi kamanhret jo.

²⁶Khava jâra tuning chu kakhôktak a kaphôngsōt jo kae, nankâra tu mo inkhat a’nhmang inchu ke’n rahno rônmak jo eng.

²⁷Ajârchu Pathen ṭōnmantluk rakip kha thup leh ṭhen neiloa kaphôngsōt pek jo chei.

²⁸Khava jâra nanbing et leh Rathla Intheng in nankut chunga anganse jo chei rup-hei hi kaṭhatak a ching jo hei ruh. Asapa thisen jâra atâ amanchang jo, Pathen Bekrup sik akemōng kakhem chang ruh.

²⁹Kadahlon chei kahnunga nankâra kahne kahrâng heikahlut sik hei, khana kemōng rup kha that loa damak hei ning ti hi kamanhret.

³⁰Nanrup shunga kalan a mi ṭhahrep in takkasenhei kha ṭhōisōtna sik a maleisei anhonghrina sik pha kha alakahong sik kae.

³¹Khava jâra insing thei ruh, khana kum 3 katluk set, sûn leh jân tiloa hmit-rathli pum a nangni inkha-khat mantheina kaleinei chei kha mandonsōt ruh.

³²“Khana tûnchu Pathen in ami rakip sik a amantluk, nankasyemsōt tor leh mahâmṭhatna kapek tor Pathen leh ama maritna ṭong ta-ensuina shunga nan-omna sik ṭong pekna kanei jo chei kae.

³³Ke’n tûte inkhat dangka, sana, pōnsi derkei madu mak eng.

³⁴Kei leh kaloihei tamadu tarangei hei kha pekna sik a hiva kakutkhet vâng hin ṭōn katlo hi nangni khet in nanmanhret a kae.

³⁵Rōngpu Jesu atak-khet in aleihri, ‘Rahlâng kanek a pek hin inpâkna ka-om chet,’ ṭong hi mandonsōt pum a ahlam rakip a hinga rahnak a ṭōntlo hin akatlasam hei bômtorna amannei me ti hi kamalârpek jo chei.”

³⁶Paul in ahrisō pha, anmarkhup anthlep a derna anleinei jo.

³⁷Inthlâna sik a ankakōa anleimajôp lai, ankhenga leikaṭap jo hei.

³⁸Avea inhmu nôk mak jo min aleitipek hei jâra anmalung aleitôn hêra kae. Khang’khan rakōng katlunga anvathak jo.