Read Komrem ṬŌNTLOHEI 22 Bible Online

ṬŌNTLOHEI 22 - Komrem bible

ṬŌNTLOHEI 22

¹“Kasōpui Jehudihei, nan-ângkunga hiva ka’nhrungna ṭong hi arangei pek ruh!”

²Hebrew ṭonga aṭong kha anthei pha, anrasa kadaichet jo; khang’khan Paul in amanjōm:

³“Kei hi Cilicia ram a Tarsus khōpuia a’nte Jehudi eng kae, tâk Gamaliel hnenga them inchu inkhat a hiva Jerusalema hin sei hong kalen eng. Tuninga hiva hmun a aka-om nangnihei seng kapōa Pathena a’npesōt, nipusōnhei dân hi kahnettak a mantheina ahong kachen inkhat eng kae.

⁴Hinghiva Hlam a akase hei kha thina katlunga suk manrimna kaleipek hei. Nuhmei leh pase kasur heia kurkhum shunga kaleikhum hei.

⁵Kahri hi ṭongtak khet kae ti hi Thempu Kalen leh Sehmang-pachong rakip in anhri manchên tor. Damascus a ka-om nisōpuihei hnenga manrôn sik lekha anmania inphut kaleirahlâng, khava jâra khava hmun a ka-om hei kha vasur heia karâkna pek sik heia Jerusalema thirhrui vâng anvakakei inle sik a leikase eng.

⁶“Khang’khan kase enga Damascus kaphâk sik ting, sûnṭim radona manhret manloa thangvâna inphut vâr inhnaktak inkhat in kakimve ajōng kakhōa kae.

⁷Raleia katlu enga karesō inkhat in, ‘Saul, Saul! Heisik a mo nasuk manrim eng?’ ati kha kalei thei.

⁸‘Tu che mo, Rōngpu?’ tia kaleider. ‘Nasuk manrim Nazareth Jesu eng kae,’ kahnenga aleiti.

⁹Ka’nṭhōipui mihei khan vâr khachu anhmu, tâk kahnenga ṭongkahri karesō khachu leithei mak hei.

¹⁰‘Rōngpu, heimo katlo sik jo?’ tia kader pha Rōngpu’n, ‘Inding ina Damascus a se roh, khana khava hmun a khan Pathen in natlo sik amantluk pek che rakip kha anhri pek sik che’ anileiti pek eng.

¹¹Vâr kha a’nhnakrei jâra khō leihmu mak eng, khava jâra kaloihei khan Damascus katlung kakut a anileikei eng.

¹²“Khava khōpuia khan nidân kajui khana inshângtak a kajana antanei bektinga malung kahlut, Ananias inti mi inkhat leika-om.

¹³Ama kha kahonga, kasira kangira, ‘Sōpui Saul, khō hmu nôk jo roh!’ ati. Khava phatak a khan khō kahmu nôk jo khana ama kha kalei-ena kae.

¹⁴Ama’n, ‘Nipusōnhei Pathen khan alungdo inhret sik a, akadik Asōkpa akahmu sik a leh akaresōkhet a aṭong hri kathei sik a akadeisōt jo che kae.

¹⁵Khava jâra nahmu leh nathei rakip hi mi rakip hneng nahria asâkhi akachang sik jo che kae.

¹⁶Achang inchu tûnhin, heisik a mo phat nalahngâk sôt sik? Thōi inna tuihlut jo roh khana ahnenga derna vâng nasetnahei, insuk intheng jo roh.’

¹⁷“Jerusalema inle nôk enga, Bek-inna derna kaneilai, hmangtalâr inkhat kaleihmu,

¹⁸khana khan, ‘Inranga Jerusalem dahlon jo roh, ajârchu hiva hmun a ka-om mihei hin kei chungchânga sâkhi napek hi rahlâng mak hei ning,’ tia Rōngpu’n ahri pek eng.

¹⁹Ke’n kalei masôn, ‘Rōngpu, intûpna innpui heia kase enga natakkasen hei kasura kalei vōk hei kha anmani’n kaṭhadek a anmanhret.

²⁰Khana nasâkhi akapek Stephen anleithat lai khan kei khet um athatna sik kha kaleihnōma khana akathat-hei pōn leh der kha ke’n kalei hngâkpek heia kae.’

²¹Rōngpu’n kahnenga, ‘Se roh, ajârchu ram kahlatak a Jât-hlop hei hneng katir sik jo che kae,’ ati eng.”

²²Paul in hivahi ahri mak hma katlunga khan chu anleirangei; tâk hiva ahei hrisōttak a inphut chu ankare neisûn sûna, “Ṭhōisōt ruh! That ruh! Ama hi akahring sik rahōi changmak jo!” tia ông inphut jo hei.

²³Leikapeng hei, anpōn ankalek khana chungting vuibō ankathek a kae.

²⁴Rome rehlam kakeipa khan amihei hneng Paul kha rekur shunga anṭhōi manhlutna sik ṭong apek hei khana ama kadōia Jehudihei khang’khan anpengna ajâr manhret sōtna sik a vōk ruh tia aleihri pek hei.

²⁵Tâk-kha ama kha vōk sik a anleikhit lai khan ahnenga aka-om ṭōnkarôn hnenga Paul in ader hei, “Rome milai inkhat aṭhena heikhat chunga aṭongbek um ala’ntan mak hma nantavōk sik hi dân mo kae?”

²⁶Hivahi ṭōnkarônpa’n athei pha, rehlam kakeipa hneng kasea, “Heimo natlo jo? Sova mipa so Rome milai kae!” aleitipek.

²⁷Khava pha rehlam kakeipa kha ahnenga kasea ader, “Nang hi Rome milai akachang che mo, ahri pek roh?” “Ôk” tia Paul in aleimasôn.

²⁸Rehlam kakeipa khan ati, “Ke’m sêr katamtak kapek a khava kapō inkhat akachang eng kae.” Paul in amasôn, “Tâk-kha kei chu ka-intet a inphut akachang eng kae.”

²⁹Kha anthei pha Paul ṭong kader sik mihei kha ankahnungting inkâi jo hei; khana thirhruia aleikhōp Paul kha Rome ram mi achang anmanhretsōt pha, rehlam kakeipa kha leikaṭi joa kae.

³⁰Jehudihei khan Paul kha heipena mo antamaher ti kha rehlam kakeipa khan amanhret manchên hnōm; khava jâra ajîng kania Paul inkhōpna thirhrui kha asōt a khana thempu kalenhei leh Sehmang-pachong rakip an-intûpna sik ṭong aleipek hei. Khava sōa Paul kha aṭhōia an-ângkunga aleimanngira kae.