Read Komrem ṬŌNTLOHEI 23 Bible Online

ṬŌNTLOHEI 23 - Komrem bible

ṬŌNTLOHEI 23

¹Sehmang-pachonghei kha Paul in kasang kanga a-en heia ahri, “Eh kasōpui Israelhei! Pathen hmit-hmua tuning katlunga kahringna hlam hro chungchânga kamalunga dik leh dikmak ṭhen theina hi pui katluk a la’ntlam senga kae.”

²Thempu Kalen Ananias khan Paul hnengtak a akangir hei hneng abei kha ankaben pekna sik ṭong aleipek hei.

³Paul in ahnenga atipek hei, “Pathen in arachâk nger sik che, nang, alâr kabang inno bang! Dân dungjuia kei ṭong katan sik a khava hmun a khan in-ong che, tâk kei kabenna sik ṭong napek hei jâra nang jôk in dân nasuk khōi jo!”

⁴Paul hnengtak a ka-ompa khan ahnenga ati, “Pathen Thempu Kalen hi nang in nateitôm kae!”

⁵Paul in amasôn, “Kasōpui Israelhei, ama hi Thempu Kalen achang ke’n manhret mak enga kae. Ṭong intheng in hing’hin ahri, ‘Namipui vaikarônhei chunga ṭongse nahri hêrmak sik kae.’”

⁶Mipuihei kha ṭhahrep Sadduceehei khana ahlop khat in Phariseehei anchang kha Paul in ahmu sōt pha, Sehmang-pachong intûpna kâra khan ka-ônga ati, “Kasōpui Israelhei! Kei hi Phariseehei sapa Pharisee eng kae. Akathi kathōi nôk sik tia inhōrna kanei jâra hiva hmun a hin kaṭong antan eng hi kae!”

⁷Hivahi ahrisō tak leh, Phariseehei leh Sadduceehei kha inkhe inphut jo hei, khana mipui kha rup hnia inṭhen jo hei.

⁸(Ajârchu Sadducee he’nchu mi kathi hi thōi nôk mak ning, ngeva a-emak leh rathla hi om mak anti, tâk Pharisee he’nchu an-inthum bât a hin antaksen.)

⁹Anrasa inshâng det-det joa Pharisee rup kâra ka-om dân oja ṭhahrep kangirsōt heia anhnōm makna hing’hin rahnak a anleiphông: “Hiva mipa chunga ṭhena heite hmutor mak ung! Rathla a-emak leh ngeva inkhat in amanṭong khet um kachang thei!”

¹⁰An-inkhena kha ahong inhnak jo pha akinlamchu Paul kha ahar-ahak a ankeirachen sik tia rehlam kakeipa kha leikaṭi jo. Khava jâra sepeihei kha khava rup kâra anhlut leh Paul kha anvaṭhōina sik leh rekur shunga anṭhōi manhlutna sik a ṭong apek jo hei.

¹¹Khava jân a khan Paul hneng Rōngpu jōng kangira, “Ṭitmak roh! Hiva Jerusalem hmun a hin kasâkhi napek jo, khana hiva kapō tlit a Rome a’m nalatlo sik kae,” aleitipek.

¹²Ajîng kania Jehudi ṭhahrep intluk heia marûk a ṭōn inkhat anmantluk jo. Anmani’n Paul hi anthatsōt mak kârseng chu heitete sâk mak ning khana inmak ning tia intepna anleinei jo.

¹³Khava ṭōn intluk hei kha ankhenga mihring 40 kakhe hei kae.

¹⁴Khang’khan anmani thempu kalenhei leh upahei hneng kase heia anleiti, “Paul hi kanthatsōt mak kârseng chu heite sâk mak ning tia inhnaktak a intepna kannei jo.

¹⁵Tûnchu nangni Sehmang-pachong in a’nchênchet ṭong kajongsōt hnōm tia manhlem-una Paul kha sepei hlamkakei pa’n aheiṭhōisōtna sik a ṭong manrôn ruh. Tâk-kha hiva hmun aheitlung pha a, hlam kâra akathat sik a le’ntluk dek sik ung.”

¹⁶Amirōkchu khava anṭōn mantluk kha Paul unu sapa, atupa’n marûk a aleithei jo; khava jâra rekur shunga kahlut a Paul hneng ahri pek a kae.

¹⁷Khava pha Paul in sepei ṭōnpui karôn inkhat abek a ati, “Hiva rether naipangpa hi rehlam kakeipa hneng ṭhōi ruh, ama’n heimo khat hripek hnōm anei.”

¹⁸Ṭōnpui karônpa khan rehlam kakeipa hneng aṭhōia ati, “Nimi khumpa Paul in abek enga hiva rether naipangpa hin nahnenga hrihnōm anei, ṭhōi manhlut roh, tia ngekna aninei eng.”

¹⁹Rehlam kakeipa khan akut a akeia, ahlopdet a aṭhōisōt a ader, “Heimo hripek sik enga nahong rôn?”

²⁰Ama’n ati, “Jehudi vaikarôn he’n ṭong manhlemna anneia achungchânga a’nchênchet manhretsa hnōm Sehmang-pachong he’n anlanei, nang in Paul hi ajîng kania aheiṭhōisōt pek roh tia nahnenga ani kader sik a inhnōmtō jo hei.

²¹Tâk-kha anṭong rangei pek mak hei roh, ajârchu hlam kâklak a ale’nthup a aleikahlō sik pase 40 inhleia ka-om hei. Anmani khan ama hi anthatmak kârsenga bu um sâk mak sik khana tui um inmak sik tia intep jo hei. Tûnhin anmani intlukdek a ka-om jo hei khana nang ṭong mathlâk sik rōk antahngâk jo kae.”

²²Sepei rehlam kakeipa khan, “Hiva kahnenga naṭong thangkōi hi tûte hneng hrisōt mak roh,” atipek. Khana rether naipangpa kha atirsōt jo.

²³Khava sōa rehlam kakeipa khan sepei ṭōnpui karôn 2 abek heia ati, “Caesarea a kase sik a sepei 200, shakor remi 70 leh kasei remi 200 mantluk una tûnjân pungkōa ke kathonsōt sik a mantluk hei ruh.

²⁴Ram vaikarôn Felix hneng kadam senga mantlungna sik Paul tachōng sik shakor ṭhahrep pek ruh.”

²⁵Khava sōa rehlam kakeipa khan lekha manrôn sik hing’hin aleimazet a kae:

²⁶“Claudius Lysias in Lulenpui ka-om, ram vaikarôn Felix hneng: Chibei kahei pek che.

²⁷Hiva mipa hi Jehudi he’n ansura that sik anleirei. Rome mi achang kamanhret sōt jâra kasepeihei leh kase unga kanva sansōt.

²⁸Maset antapekna kha kamanhret hnōm jâra an-uparup intûpna kaleiṭhōi jo.

²⁹Kurkhum a da sik leh thina sik a rahōi kasōk tloṭhe heite neimak ti kha kaleihmusōt; ama anmasetna hichu anbing dân chunga kae.

³⁰Khana ama kadōia ṭōnmantluk annei jo tina ṭongmarûk kathei lim leh nahnenga heitir sik a kamandon jo kae. Ama chunga masetna kapek hei hneng na-ângkunga anva maherna sik a kahri pek jo hei.”

³¹Ṭong a’npek hei kapōa sepei he’n antlosōt jo. Khava ning jânbât a khan Paul kha anṭhōia Antipatri katlung anmathlung jo.

³²Ajîng kania ke-remihei kha rekurting hong inle jo hei khana shakor remihei khachu ama kasepui sik a anhei dahlon jo hei.

³³Anmani’n Caesarea katlung anleiṭhōi, lekha manrôn kha ram vaikarôn hneng anpek, khana Paul kha’m akut chunga anmanngan jo.

³⁴Lekha manrôn kha ram vaikarôn in ateia khana Paul kha hei ramṭhen a che mo tia aleider. Ama kha Cilicia ram a inphut kae ti kha amanhretsōt pha,

³⁵ama’n atipek, “Maset nakapek hei anheitlung pha leh naṭong hri karangei sik jo.” Khava sōa ram vaikarôn innpuia Paul kha antahngâk a antada sik a ṭong apek jo hei.