Read Komrem ṬŌNTLOHEI 24 Bible Online

ṬŌNTLOHEI 24 - Komrem bible

ṬŌNTLOHEI 24

¹Ni 5 sōa Thempu Kalen Ananias leh inṭhōia upa ṭhahrep khana Tertullas inti dân oja inkhat leh Caesarea a leikase hei. Felix ângkunga kangir heia Paul chunga anmaherna ṭong anleipek.

²Khava sōa Paul kha anbek manhlut a, khana Tertullas khan hing’hin amaherna ṭong aleihria kae: “Akalûrpen nang! Kasing tak a navairônna hin phat kasôttak kankâra mōngna najōng rôn sōt jo, khana kanrama ṭhatna sik a syemsōt ther hingja natlo jo.

³Hivahi hmun rakip leh phat rakip a marit a kanralam, khana nachunga lungri tak a inpâk ung.

⁴Naphat hingja chu manhmang hnōm mak eng, khava jâra kantahri sik ṭong katôi hi lungsettak a narangei pek sik unga kangek che.

⁵Hiva mipa hi ṭit ka-om tak chokchi katlo mi kae; ama hin raleichung pumpuia Jehudihei kâra inchok inhângna amasō khana Nazarene inti rup-hei hlamkakei kae.

⁶Bek-inn katlung um ama’n manbōk sik a arei, khava jâra keini’n ama hi kantasur kae. Aṭong hi kandân dungjuia tan sik a intluk ung,

⁷tâk rehlam kakei Lysias kha hongkahlut a, hnuk kana tak a ama hi keinia inphut athōisōt joa kae.

⁸Khava sōa Lysias in nang ângkunga a-inher kankahong sik a ṭong apek unga kae. Nang in hiva mipa hi ṭong nader inchu ama hnenga inphut keini maherna rakip kha namanhret tor sik jo.”

⁹Jehudi rakip inum maherna kha anlei manjoma khahei rakip kha kadikpet anleiti.

¹⁰Khava sōa ram vaikarôn khan Paul kha aṭongna sik a akut ahei kalânga, khava pha Paul in hing’hin ahri, “Hiva jât-hei chunga kum katamtak ṭongkatan inkhat hongkachang jo che ti hi kamanhret, khana na-ângkunga kabing inhrungna kahri sik jâra hin inpâk eng.

¹¹Nang in namanhretsōt kapōa, Pathen inmuk sik a Jerusalema kavase kha ni 12 lakhe reimak.

¹²Bek-inna mi inkhatbek leh kan-inkhena a-emak leh intûpna innpuia achanga khōpui shung hmun khatbek a achang inum mipuihei manbōina inkhatbek Jehudi he’n hmusōt mak hei.

¹³Khana tûntûna anmaherna eng ajâr inchênkhet nahmai kunga malâr sik heite neimak hei.

¹⁴Hiva inkhat hichu katlo tia nahnenga kahnōm eng: kanpu sōnhei Pathen hi anmani’n dikmak antati Hlam kha kajuia kakamuk a kae. Tâk-kha Moses Dânrabu leh Sânkathemhei lekharabua a’nzet rakip ke’num kataksen.

¹⁵Anmani’n Pathena inhōrna antanei kha leh in-anghrep a ke’num kanei, khachu, mikaṭha leh mikase rakip thia inphut lakathōi sik hei.

¹⁶Khana Pathen leh mihring hmit-hmua dik leh dikmak ṭhen theina malung inthengseng kha kanei torna sik torchena a’nṭang eng kae.

¹⁷“Kum kasôtjap Jerusalem kaleidahlon sōa, kamihei hneng sêr kalo sik leh inthoina tōkna sik a leikase eng.

¹⁸Hivahi insuk inthengna rōi katorsōa Bek-inna ka-omlai anmani hin anvahmu enga kae. Khava khan mipui leichōrmak hei khana chokchi kaina leiom mak.

¹⁹Tâk-kha sova hmun a son Asia ramṭhen a inphut Jehudi ṭhahrep um ka-om hei; anmani he’num kachunga hnōmmakna annei inchu na-ângkunga akahong sik hei kasōk.

²⁰Achangmak leh hiva mihei hin khava Sehmang-pachonghei kâra kangirlai heitlo setna mo kanei ti kha ahri pek hei rasoh,

²¹an-ângkunga kangir shunga kahrisōt inkhat lim khachu: ‘Nangni he’n tuninga kaṭong nantanna ajâr hichu akathi hi akahringa kathōi nôk sik ti hi kataksen jâra kae,’ kalei ti.”

²²Khava sōa Felix khan aṭong omdân kha aleitheidek jo achang jâra khava inherna ṭong rangeina pha kha amanbâng jo. Ama’n, “Rehlam kakeipa Lysias ajōng tlung phat leh, nanṭong hi mathlâkna kanei sik jo,” tia aleimanthei hei.

²³Nganse sepei ṭōnkarônpa hneng Paul kha kaṭha ahngâkna sik, tâk aṭhōn are he’n amadu arangei hei anpek theina sik leh ning leh hnōm ajing apekna sik a ṭong aleipek.

²⁴Kanikhō ṭhahrep sōa Felix kha anuhmei Jehudi jōr, Drusilla leh kahong hei. Ama’n Paul kha ava manbek heia Jesu Christa taksen sik chungchânga aṭong hri kha aleirangei pek.

²⁵Amirōkchu, Paul in ṭhatna leh binga inche-ona khana Ṭong tanna kani ajōng katlung sik chunga aṭong hri kha athei pha Felix kha kaṭi joa, “Tûnchu kasethei sik jo che. Hnunga phat kaṭha kaneitâk leh kahei bek nôk sik jo che,” aleitipek.

²⁶Hi leh inthoia Paul in sêr ahlek anipek sik mo tia’m le’nhōrthima kae; khana hiva mandonna jâra hin aleibek ṭhak a ale’nbek puiri.

²⁷Kum 2 athlengsō pha Felix kha Porcius Festus in ram vaikarôn inkhat a ajōng thleng jo. Felix khan Jehudihei malung tlaina ajong jâra Paul kha kurkhum shunga akhuma aleidahlon joa kae.