Read Komrem ṬŌNTLOHEI 25 Bible Online

ṬŌNTLOHEI 25 - Komrem bible

ṬŌNTLOHEI 25

¹Festus in khava ramṭhen ajōng tlung ni 3 sōa, Caesarea a inphut Jerusalema leikase,

²khava hmun a khan thempu kalenhei leh Jehudi hlamkakei he’n Paul chunga maherna ṭong anheirônsōt a kae. Festus hnenga khan

³Paul kha Jerusalema aheiṭhōi pekna sik heia ngekna anleinei, ajârchu anmani’n ama kha hlam a thatna sik anleimantluk a kae.

⁴Festus in amasôn hei, “Paul hi Caesarea a kurkhum a a’nkhum kae, khana kei um inranga son a’nle nôk sik eng kae.

⁵Nanhlam kakeihei kha kei leh Caesarea a sesap rung khana tloṭhe heikhat anei inchu hongmaher hei rasoh.”

⁶Festus khan kanikhō 8 a-emak leh 10 anmani leh ahmangsōm sōa Caesarea a inle jo. Ajîng kania ṭongtan hmun a in-onga Paul kha anheiṭhōi manhlutna sik a ṭong aleipek hei.

⁷Paul kha aheitlung pha Jerusalema inphut a akava Jehudihei kha akimvea kangir heia, manchênna antamalâr tor mak ṭong kakhôk hingja vâng maherna anleiphut jo.

⁸Tâk-kha Paul in inhrungna anei: “Ke’n Jehudihei dân a-emak leh Bek-inn a-emak leh Rome Caesar dōina tlosetna heite neimak eng.”

⁹Tâk-kha Festus khan Jehudihei malung tlaina sik ajong jâra Paul hneng ader, “Jerusalema sea sova hmun a kei ângkunga hiva maherna hei che hi ṭong tan sik akahnōm che mo?”

¹⁰Paul in ati, “Kaṭong antanna sik hmun, Rengkalen Caesar ama khet ṭong tanna karôt a khan akangir sik jo eng kae. Nangkhet inum kaṭhatak a namanhret kapōa, ke’n Jehudihei hneng tloṭhe heite neimak eng.

¹¹Ke’n dân kha kasuk khōia, khana thina karâkna kachen sik rahōi heimo khat tloṭhena kanei jo achang inchu, inphesōtna sik dermak eng. Tâk-kha kachunga maherna antapek hei hi ṭongtak achangmak inchu ankut chunga tûte’n apek sōt tor mak ning. Ke’n Rengkalen Caesar hneng thangkōina kanei jo.”

¹²Khava pha aṭong inse hei leh intōkna anneisōa Festus khan amasôn, “Caesar hneng thangkōina namathlung jo’ne Caesar hneng akase sik jo che e-nâng.”

¹³Pha ṭhahrep sōa Festus ralamna chibei katlo sik a Reng Agrippa leh Bernice kha Caesarea a kahong hei.

¹⁴Kanikhō ṭhahrep an-omsōa Festus khan Rengpa hneng Paul omdân hing’hin ahri pek: “Felix in kurkhum a akhuma aleidahlon mi inkhat ka-om.

¹⁵Khana Jerusalema kavase pha, Jehudihei thempu kalenhei leh an-upahe’n anmaherna hei kahnenga anjōng mathlung khana maset kapekna sik a anleider eng.

¹⁶Tâk-kha ke’n keini Rome mi ung hichu tu mo inkhat tloṭhe kanei kha ama inher hei leh hmai leh hmai intōna annei mak a khana anmaherna hei jâra abinga a’nhrungmak kârseng chu tûte kut chunga pesōt phungmak ung tia kaleihri pek hei.

¹⁷Anmani hin anheihong pha ke’n phat manhmang loa, ajîng kanibât a ṭong tanna hmun kahlōa amipa kha anheiṭhōina sik a ṭong kaleipek hei.

¹⁸A’nher hei kha kangirsōt hei, tâk anmani’n aṭōnse leitlo jâra anjōng maher sik tia kaleihlamrin kapōtak vânga inkhatbek leimaher mak hei.

¹⁹Anṭong khachu anmani bek chungchâng leh akathi jo, tâk Paul inchu kahring tia ahri Jesu inti mi inkhat chungchânga inkhe beitam ṭhahrep hnâm kae.

²⁰Hiva chunga heikhong mo manhretna kaneisa sik ti leimandon phakmak eng, khava jâra Paul hneng hiva anmaherna hei che chunga hin Jerusalema sea, son ṭong tanna vanei sik akahnōm che mo tia kaleider.

²¹Tâk-kha Paul inchu Rometing thang aleikōiping joa kae; sepei he’n kaṭha anhrungna sik leh Rengkalen Caesar in aṭong hi mandonna anei theina sik angek eng. Khava jâra Rengkalen Caesar hneng katirsōt mak kârseng chu hrung sik a ṭong pekna kanei jo.”

²²Agrippa khan Festus hneng ati, “Kei khet inum chuva mipa ṭonghri kathei hnōma kae.” Festus in amasôn, “Jîng leh nathei sik.”

²³Ajîng kania Agrippa leh Bernice kha kahōi leh kalûrtak a sepei hlamka keihei leh khōpuia akalen akahrânghei leh inkhômna innpui shunga heikahlut hei. Festus in ṭong apek a, Paul kha anheiṭhōi manhlut jo.

²⁴Khava pha Festus khan hing’hin ahri: “Reng Agrippa leh tuninga hiva hmun a aka-om mi rakip: enruh hiva mipa hi, hina aka-om hei leh Jerusalema ka-om Jehudi rakip in achunga maherna kahnenga anleimathlung. Anmani’n ama hi akasôt hringmak jo rasoh tia’m an-ôna kae.

²⁵Tâk-kha thinatuk rahōi kasōk karâkna pekna sik tlosetna atlotak khachu ke’n hmusōt tor mak eng. Khana ama atak-khet in Rengkalen Caesar hneng thangkōina aleinei jo jâra, tir sik a kamandon jo.

²⁶Tâk-kha Rengkalen Caesar hnenga hi kae tia ama chunga ṭong inchênkhet mazet sik heite manhret mak eng. Khava jâra tuning ama hi nan-ângkunga kaheiṭhōisōt kae, adek a Reng Agrippa nang ângkunga kae! ama chunga jōng manchênna a-omsō leh mazet thei heimo khatbek chu kaneina sik a kae.

²⁷Ajârchu kurkhum a mi inkhat achunga maherna hei kha inthengtak a malârna neiloa tir sik hi kei sik a ajâr kadik changmak a kae.”