Read Komrem ṬŌNTLOHEI 27 Bible Online

ṬŌNTLOHEI 27 - Komrem bible

ṬŌNTLOHEI 27

¹Italy kajōn sik a rakōnga kan-in tôr sik kha ṭong anmathlâk jo pha, Paul leh alak kurkhum a aka-om ṭhahrep hei kha “Rengkalen Regiment” tia inhret Rome sepei rup-hei hlamkakei, Julius kut a anpek sōt jo.

²Asia ramṭhen a ṭhumhmun hei kajōn sik a a’ntluk rakōng inkhat a Adramittium inphut a kanchōnga intôr jo ung. Kankâra khan Thessalonica a inphut Aristarchus inti Macedonia mi inkhat um le’nveia kae.

³Ajîng kania Sidon leikatlung ung. Julius khan Paul kha aleilungset a, amadu arangei anpek theina sik, aṭhōn-arehei a’nhmu puina sik aleihnōm pek.

⁴Khava hmun a inphut leikase nôk ung, khana thli kahrâng khan anisêm malet ung jâra in-ungna thei Cyprus tuikekhum pang khat langting le’ntôr ung.

⁵Cilicia leh Pamphylia tuipui panghei kha kanrakan a Lycia ram a Myra a leikatlung ung.

⁶Khana khan ṭōnpui karônpa khan Alexandria a inphut Italy kajōna tôr sik rakōng inkhat ahmua, amanchōng jo ung.

⁷In-êngtak a kanikhō katamtak intôr unga kachâmtak a, nâknâk a Cnida inti khōpui kha leikatlung ung. Thli kahrâng khan kanhma amansong theimak ung jâra Kape Salmone rakanna Crete tuikekhum pang in-ungna thei langting le’ntôrsuk unga kae

⁸Tuipang leh inhnairet unga intaktak a kahong unga Lasea khōpuia inphut a’nhlarei mak, Inhukna Ṭhumhmun inti hmun kha leikatlung ung.

⁹Tui chunga hlam hro sik a’ntaklai seng khava hmun a khan pha kasôttak leika-om ung, khava kan-om shunga khan Set manthengna Kani rōi kha le’nchai joa kae. Khava jâra Paul in hing’hin mansena aleinei hei:

¹⁰“Mihringhei, tuna hiva hmun a inphut nihlam hro sik hichu inrengna ka-om sik; rakōng leh neinâk khana hringkhō katlung inhmangna niratōset sik a kahmu.”

¹¹Tâk-kha sepei ṭōnkarônpa khan Paul tahri kha changloa rakōng katôr hlamkakei leh rakōng kapupa tahri jôk kha aleiloa kae

¹²Khava rakōng kehmun kha phebi hmangna sik a hmun kaṭha alei changmak jâra; mi rakip inum tuipuia intôra torchena Phoenix tlung nger sik, khana khan phebi kha hmang sik kha anleimadu jôk a kae. Phoenix hmun hi thlang-tlaitlâk leh sak-tlaitlâk ting kahnget Cretea rakōng ṭhumhmun inkhat kae.

¹³Thlang tinga inphut thli kadaineng kha heikahrânga, mihei khan anmantlukna kha antlosōt tor sik jo tia anleimandon, anthirchak-ai kha ankeisōt a Crete tuipui pang leh inhnaitak a intôr jo ung.

¹⁴Tâk-kha inrangtak a “Sak-sim kahnget” inti thlipui kahrattak inkhat in tuikekhuma inphut khan atlensuk jo ung.

¹⁵Thli khan rakōng kha asuk jo, thli kâra rakōng tôr sik kha a-ethei mak jo jâra, rahnak a inṭang sik kha kahai jo unga khang’khan thli kanmantlen jo.

¹⁶Kauda inti tuikekhum kasintek thlâng intongting kanhro pha in-ungna ahlek kanlei hmua kae. Khava hmun a khan rakōng shunga inhukna rakōngtehei kha nâknâk a kanleikim tor heia kae.

¹⁷Khahei kha rakōng chunga ankeitou heia, hrui vâng rakōng leh kahnet a anleikhōp hei. Anmani’n Libya tuipui panga nêrdi khama insuk sik ung ti ṭit jâra intôrna pindenhei kha ankeimathlâk heia rakōng kha thli anleimantlen jo.

¹⁸Thlipui thlihrem kha khanga kahrânga, ajîng kania chu rakōng tahei rôn neinâk ṭhahrep anhlon mathlâk jo,

¹⁹khana abân kani nôk a khan rakōng hmangchâk ahlek um anhlon mathlâk a kae.

²⁰Kanikhō katamtak kha kani a-emak leh ârsi inkhatbek hmuloa, thli kahrâng in rahnak a aleisêm unga kae. Achai-chaina chu kahring sik ung ti inhōrna him-him neimak jo ung.

²¹Pha kasôttak rakōnga kachōng rakip kha thlai sâk loa kanleiom kahnunga, Paul kha an-ângkunga indinga anhnenga ahri pek hei, “Mihringhei, kaṭong nanta leirangei sik kae khana Cretea inphut ale’ntôrsōt mak sik me kae; kha aleichang inchu hiseng suksetna leh inhmangna hi’m leisōk mak ning.

²²Tâk-kha tûnchu kangek chei, kangama om ruh! Nangni inkhatbek nanhringkhō inhmang mak jo ning; rakōng rōk hichu inhmang sik jo.

²³Ajârchu tûnjân khan kakapu leh kakamuk Pathen ngeva inkhat kahnenga kajōnga,

²⁴‘Ṭitmak roh, Paul! Reng-kalen Caesar ângkunga akangir nger sik che kae. Khana Pathen in nahnenga aṭhatna shunga khan na’ntôrpui rakip hei hringkhō kapha’m aṭhensōt pek jo hei,’ tia ahri pek eng.

²⁵Khava jâra mihringhei, kangama om ruh! Ajârchu ahri pek eng kapō-pōa akachang sik a Pathena taksenna kanei.

²⁶Tâk-kha eini chu tuikekhum panga atlensōt sik me.”

²⁷Hing’hin Mediterranean chunga thlipui in atlen lele ung hi jân 14 tluk ning jo kae. Jân ṭhangṭim radona hin rakōng katôrhei khan tlâng leh a’nhnai sik jo unga anleimanhōi jo.

²⁸Khava jâra a’nthuk tena hmora akahrik heimo khat ankhit a ante pha metre 40 a’nthuk kha anmanhretsōt jo; pha bongkhat sōa khang tlit khan antlo nôk in metre 30 a ahei dongdet jo kha anleihmusōt.

²⁹Rakōng kha hlung heia a’nsuk sik kha anleiṭit jâra rakōng kahnunga thirchek-ai 4 anmathlâk a khō ajōngvâr sik kahngâk a derna kanneia ka-om jo ung.

³⁰Khava sōa rakōng katôrhei kha rakōnga inphut tlânsōt sik anleirei; anmani’n thirchek-ai ṭhahrep rakōng hmatinga inphut mathlâksa sik inhlem heia, inhukna rakōngtehei kha tuia anlei maṭhuma kae.

³¹Tâk-kha Paul in sepei ṭōnkarônpa leh sepeihei hneng, “Rakōng katôrhei hi rakōng shunga anchōngmak jo’nchu nanhringna sik inhōrna om mak jo,” atipek hei.

³²Khava jâra sepeihei khan inhukna rakōngte anmakhei mathlâkna hrui kha antuktanna khanga abinga anmathlâk jo hei.

³³Jîngkhō ajōngvâr hmadet a Paul in mi rakip hneng thlai ahlek-hlek ansâkna sik aleingek hei: “Tûnchu hinga nanta heihngâk hi ni 14 hong katluk jo, khana hiseng shunga hin heite khatbek hongsâk mak jo chei.

³⁴Khan chu, nanhring theina sik a thlai ahlek bebek chu nantasâk sik a kangek chei. Nanlua nansam rajang inkhatbek um inhmang mak jo ning.”

³⁵Hivahei ahrisō pha Paul in buhlom ṭhahrep aloa, ankhenga hmaikunga Pathen amanpâk a, har akhōia, khana aleisâk manphut jo.

³⁶Anmani’m lungngamna anneia, ankhenga thlai ahlek-hlek anleisâk et jo.

³⁷Keini khava rakōnga akachōng seng kha kankhenga 276 ung kae.

³⁸Mi rakip in ansâk etsō jo pha, rakōng tahei rôn gehu kha tui-ôngpui shunga anhlon mathlâk a rakōng kha anlei manyâng jo.

³⁹Sûn aheichang jo pha, khava tuipui pang rajei kha rakōng katôr he’n leimanhret mak hei, tâk tuibanga sōr a-om khachu anleimanhret sōt a kae; khava jâra a-ethei inchu rakōng kha sōr vena tôr sik a anmandon.

⁴⁰Khava pha thirchek-ai hei kha ahrui an-âttan heia tuipui shunga anmanhlut jo hei, kha leh inṭhōia rakōng hmai mahena hrui hei kha ansōt jo hei. Khang’khan rakōng kha ahmating thli’n asêmna sik rakōng hmatinga thlikhâr pōnzâr hei kha anleizâr jo khana tuibangting kansor jo.

⁴¹Tâk-kha rakōng khan nêrdi bang kha avasuk a aluting seng kha intōk joa inhling theimak jo, akahnung langting seng nôk kha tui in-nông inhnaktak in avōk a ahar-ahak a kakōi jo.

⁴²Kurkhum mihei khan tui anjâp a tuipang re kea antlânsōt makna sik a sepeihei khan thatpet sik heia ṭōn anmantluk jo.

⁴³Tâk-kha sepei ṭōnkarônpa khan Paul kha ahuksōt hnōm jâra khava tlo sik kha aleikhâm heia kae. Khava kahlânga tui kajâpthei rakip in rakōnga inphut an-inchôm inthlâk a tui anjâp masa a re ankena sik ṭong aleipek hei;

⁴⁴alakseng in rakōng kakōi ahar-ahak hei a-emak leh thingpek hei anmatua ankahnung anjuina sik a ṭong aleipek hei. Heikhong mo kankhenga tuire aleikake ung ti kha hi kae.