Read Komrem ṬŌNTLOHEI 28 Bible Online

ṬŌNTLOHEI 28 - Komrem bible

ṬŌNTLOHEI 28

¹Insuksetna neiloa tuire kanke pha, khava tuikekhum kha Malta kae ti kanmanhret sōt jo.

²Khava ram a mihei khan kaṭhatak a anleirahlâng ung, khōsûr ahei phut a leikadai hêr, khava jâra hmei anleimansûk a kankhenga aniratō unga kae.

³Paul inum hmeia ti sik a thingpun khat aheikhôm in mari inkhat hmei kalum kha aheithei pha heikasōk a akut kha amachuk a akaze tlit pek joa kae.

⁴Aram a mihei khan Paul kut a mari inkhei kha anhmu pha, “Hiva mipa hi mikathat leikachang nger sik, tuipuia inphut ahei hringsōt jo ravâng avângset in akahring sik a phemak jo ning,” tia inkhat leh inkhat le’nbe hei.

⁵Tâk-kha Paul khachu heite tiloa mari kha hmeishunga aleikathing mathlâk a kae.

⁶Anmani’n chu heitik leh mo ahe’n thling sik a-emak leh sōkphutrōia aheikapura akathi sik tia anleihngâk a kae. Tâk-kha phat kasôttak an-en jo katlunga heite ati mak jo pha, anmandonna kha anthlenga, “Ama hi Pathen inkhat kae!” anti jo.

⁷Khava hmun a inphut inhlarei loa khan, khava tuikekhuma ṭōnkarôn savong, Publius intipa hlei ṭhahrep leika-om. Marittak a ama’n aleirahlâng unga, ni 3 set khōhme inkhat a a-inna leikatlung ung.

⁸Publius pa kha eksen leh hritluna kana a, rakhuma leikajea kae. Paul kha a-inn den shunga kahlut a achunga akut abōkpek a derna aneipek pha leikadam jo.

⁹Hiva omchen hi asōk jo pha, khava tuikekhuma ka-om aralak akadam mak rakip um kahong jo hei khana leikadam jo hei.

¹⁰Kutchoi hingja anpek ung, khana kan-intôrsōt sik jo pha kanhlam hrona kantarangei sik neinâk-hei rakōnga anthōnpek unga kae.

¹¹Thla 3 sōa Alexandria a inphut rakōng inkhat khava tuikekhuma khan phebi aleikahmang jo arahming, “A’npher Pathenhei”, intia khan intôr unga kae.

¹²Syracuse inti khōpui vakatlung ung khana khan ni 3 leika-om ung.

¹³Khava hmun a inphut khanga intôr nôk unga Rhegium khōpui kha leikatlung ung. Ajîng kania chu thli khan thlang tinga inphut asêm manphut unga khana ni 2 sōa Puteoli khōpui kha kanphâk a kae.

¹⁴Khava hmun a khan takkasen ṭhahrep leh inhmutō unga anmani leh kani vekhat aka-omsōm sik a anleingek ung. Khang’khan Rome a kahong jo ung.

¹⁵Kanṭong kha Rome a takkasen he’n anthei pha Appia Keithe leh Tlung-inn Inthum inti katlunga kahong heia anhong ratō ung. Paul in ahmu hei pha, Pathen amanpâk a khana rahnak a malung ngamna aleineia kae.

¹⁶Rome kantlung jo pha, Paul kha-chu sepei inkhat in ahngâk a abinga a-omna sik a anleihnōm pek a kae.

¹⁷Ni 3 sōa Paul in akhō kanei Jehu-di hlamkakei senghei kha intûpna sik a aleibek hei. Anhe’ntûp pha, ama’n anhnenga ati, “Kasōpui, Israelhei, nimipuihei leh nipusōn heia inphut nihongchen jo Dân kadōia tloset heite kaneimak ravâng, kei hi Jerusalema kurkhum mi anleimanchang eng khana Romanhei kut a anleipek sōt eng.

¹⁸Ṭongderna hei anneisō eng pha thinatuk tloṭhe kaneimak kha anhmusōt pha, Rome mihei khan anmasō hnōm eng.

¹⁹Tâk-kha Jehudi he’n anhnōm mak pha, kamipuihei chunga maset pek sik heite kaneimak jen ravâng, rumhrat a Caesar hneng thang anleimankōi jo eng.

²⁰Khava jâra nangni leh inhmua inbektō sik hi ngekna kanei kae. Kadik a nihri’nchu, Israel mipuihei inhōrnapa, ama sik jâra thirke hruia hing’hin a’nkhōp eng kae.”

²¹Anmani’n ahnenga anti, “Keini’n Judea a inphut nang chunga lekha manrôn heite leihmu mak ung, khana sona inphut nang chunga ṭong heikhat a-emak leh ṭong kaṭhamak karôn nimi tûte’m hongmak hei.

²²Tâk-kha namalung mandon kha kanthei hnōm ajârchu hmun rakip a mihe’n hiva nang loiruphei chunga hin dōina ṭong anhria kae.”

²³Khava jâra Paul leh kanikhō inkhat intep jo hei, khana kanikhō ajōng tluk pha Paul omna hmun a khan mi hingja kahong jo hei. Jîngkâra inphut jân katlung Pathen Rengram ṭong kha ahri manchên pek jo hei, khana Moses Dânrabu leh Sânkathemhei ṭong mazet hei aleipan a Jesu chungchânga anrahlâng theina sik le’nṭanga kae.

²⁴Aṭong hri hei khan mi ṭhahrep chu aleimanhnōm hei, tâk alak he’nchu leitaksen mak hei.

²⁵Khava jâra, ankâra inhnōmtōna omloa, Paul in hiva inkhat hi ahrisō pha anleidahlon jo: “Nanpu sōnhei hneng Isaiah Sânkathema inphut Rathla Intheng in heituk kaṭha a ṭong aleihri mo!

²⁶Ajârchu ama’n ahri, ‘Se ina hiva mihei hneng hri roh: Nangni’n arangei chu nanrangei sik, tâk manhret mak tinnei; a-enchu nan-en sik, tâk hmumak tinnei,

²⁷ajârchu hiva mihei malung hi kamo jo, khana ankōrhei ansing, khana anhmit hei ankathima kae. Kha achangmak inchu, anhmit he’n anleihmu sik ankōr he’n anleithei sik, anmalung in anleimanhret sik, khana kei langting he’nhe sik hei, khana ke’n kaleimandam sik jo hei,’ Pathen in ati.”

²⁸Khana Paul in ṭongchaina aneia: “Nangni’n tuna nantamanhret sik khachu, Pathen huk manhringna ṭong hi Jât-hlop hei hneng intirsōt jo. Anmani’n chu anrangei sik!”

²⁹Paul in hivahi ahrisōa, ankâra rahnak a inkhe heia Jehudihei kha kasesōt jo hei.

³⁰Paul in inn inkhat bongkhat sik a aloa khana khan kum 2 leika-om, khana khan ama inhmupui sik akahong rakip aleiralam hei.

³¹Ning leh hnōmtak a leh kangamtak a Rōngpu Jesu chungchânga mantheina leh Pathen Rengram chungchânga hrilena aleineia kae.