Read Komrem ṬŌNTLOHEI 4 Bible Online

ṬŌNTLOHEI 4 - Komrem bible

ṬŌNTLOHEI 4

¹Peter leh John in mipuihei hneng khanga ṭong anhrilai, Bek-inn kahngâk a ngansepa, ṭōnkarônpa leh thempu ṭhahrep leh Sadducee ṭhahrep heikatlung hei.

²Sonle 2 hei khan Jesu kha thina’nphut kaṭhōisōt jo tia mi hnenga anmantheina khan akathisa hi kahring nôk sik ti kha amanchên jo jâra anhnuk leikana.

³Khava jâra anleisur hei tâk apha kha asôtdet jo jâra jîng kani katlunga sik kurkhum a anleikhum hei.

⁴Tâk-kha anṭonghri kathei mi hingja’n antaksena mihring 5,000 kapō leikapungsa hei.

⁵Ajîng kania Jehudi hlamkakeihei, upahei khana Dân ojahei kha Jerusalema le’ntûp hei.

⁶Anmani Thempu Kalen Annas leh Caiaphas, John, Alexander, khana alak Thempu Kalen innshung mihei leh le’nhmu hei.

⁷Anmani’n Sonlehei kha anhma anman ngir heia, “Heikhong mo hivahi nantatlo? Heiratha hratna mo nantachen khana tu rahming mo nantahmang?” tia anleider hei.

⁸Rathla Intheng kasip phet a Peter in aleimasôn hei, “Eh mipui hlamkakeihei leh upahei,

⁹tuning hin hiva ke-kangōipa chunga ṭōn kaṭha a’ntlo leh adamna chen chungchânga ṭong nantader ung achang jo’nchu,

¹⁰nankhenga manhret ruh, khana Israel mipui rakip inum manhret ruh, ajârchu hiva nanhma akangirpa hi, nantalei makhei hlon jo tâk thia inphut Pathen in akei mathōi, Nazareth Jesu Christa rahming ratha hratna vânga akadam seng jo kae.

¹¹Ṭong intheng taleihri kha Jesu ama hi kae: ‘Inn kasak nangni’n nantalei madu mak hlung kha apui karônpen hongkachang jo.’

¹²Ama inphut rōk hukmanhringna nihmu sik; ajârchu vânhnōi pumpuia ani kahuksōt tor Pathen tapek hichu ama teilo alak him-him om mak.”

¹³Themna-singna kaneimak anchang ravâng Peter leh John in khang hrep a inngamna antanei kha Sehmang-pachong he’n anmanhret pha anlei mandonhla hêr hei. Khantō khan Jesu leh ale’nloisōm anchang kha anhei mandonsōt jo.

¹⁴Tâk-kha heite chu leihri tor mak jo hei, ajârchu Peter leh John hnenga khan antamandampa angir kha anhmua kae.

¹⁵Khava jâra Sehmang-pachonghei intûpna innden kha pha bongkhat lim andahlonna sik ṭong anpek hei, khava sōa anbibinga ṭong le’nbektō heia kae.

¹⁶Anmani indertō hei, “Hiva mihei hi heimo nimanlo sik hei? Ajârchu anmani’n ṭōn inralak antatlosōt hi Jerusalema ka-om mi rakip in anmanhret jo, khana eini’um hivahi changmak chu titor mak jo me.

¹⁷Achang inum hiva ṭong hi mihei hneng abân a’nthangsa makna sik, tuna inphut chu tûte hneng Jesu rahminga ṭonghrina annei makna sik maṭhit hei rih,” anti jo.

¹⁸Khava jâra anbek male heia, hei-hei achang inum Jesu rahming inti him-hima ṭonghrina leh mantheina antanei mak sik a anleihri pek jo hei.

¹⁹Tâk-kha Peter leh John in anmasôn hei, “Nangni ṭong kantajui sik a-emak leh Pathen ṭong kantajui sik khahei kâra khō jôk mo Pathen hmit-hmua akadik nanbinga ṭong intan ruh.

²⁰Ajârchu kantahmu leh kantathei hei kha hrilothei changmak ung.”

²¹Khava pha Sehmang-pachonghei khan alerchet a maṭhitna anneisa heia anleimasō jo hei. Ajârchu omchen kasōk chungchânga khan mi rakip in Pathen anleimanpâk jâra karâkna pek sik hei kha akabei changmak ti kha anleihmusōt a kae.

²²Hiva ṭōn-inlak a’ntloa akadampa kha kum 40 a’nhlei jo mi kae.

²³Peter leh John kha anmasōlim hei pha, inrangtak a anloihei hneng inle jo hei, khana thempu kalenhei leh Sehmang-pachonghei tahri kha anloihei hneng anvahri pek jo hei.

²⁴Takkasen he’n khavakha anthei pha, ankhenga inkhôm heia Pathen hneng anleider: “Eh marvân ralei leh tui-ôngpui khana ashunga rakip hei Akapu leh Akasyempa!

²⁵Kanpu sōn, David beia inphut Rathla Intheng vâng hing’hin nalei manhrisōt: ‘Heisik a mo Jât-hlop hei anhnuk aleikana; heisik a mo akahnem mak ṭōn mipui he’n antamantluk?

²⁶Rōngpu leh ama Messiah kadōia, raleichung renghei anbinga intluk hei, khana vaikarônhei le’nhmutō hei.’

²⁷Atakbak a nang in Messiah namatungsōt, Nasōk intheng, Jesu kadōia Herod leh Pontius Pilate in Jât-hlop hei leh Israel mipuihei kha hiva khōpuia anle’ntûp pui hei.

²⁸Naratha neina vânga tlosōt sik a naleimantluk ṭōn rakip kha tlosōtna sik a le’nkhôm hei.

²⁹Tûnhin Rōngpu, keini anmaṭhitna ung hi amanhret pek roh, khana nasōk keini’n naṭong hi kangamtak a kanhri torna sik ahnōm pek roh.

³⁰Nasōk Intheng Jesu rahminga det-hla leh ṭōn-inlak kantlo theina sik ahnōm pek ina, mi indam sik a nakut kha aheizer pek roh.”

³¹Anderna nei kha anchaichai leh an-intûpna hmun kha hong innok jo. Khang’khan Rathla Intheng kasip phet jo heia, Pathen ṭong kha kangamtak a anleiphông manphut jo.

³²Takkasen rup-hei kha mandonna leh malunga inkhat rōk leikachang hei. Tûte inkhat inum anei kha atâ rōk sik kae tia leihri mak hei. Tâk-kha antanei rakip kha khat leh khat le’nsem sōm hei.

³³Rōngpu Jesu thōi nôkna sâkhi kha ratha kaneitak a Sonle he’n anleipek, khana ankhenga chunga Pathen in mahâmṭhat katamtak aleibun mathlâk pek hei.

³⁴Anrup shunga akatlasam tûte leiom mak. Ankâra inn leh hlei kanei he’n anjōra, aman antahmu sêr hei kha,

³⁵sonlehei kut a anleipek manhlut; khana khava sêr hei kha ama ama khôkna dungjuia ankhenga le’nsem ri hei.

³⁶Khang’khan Cyprus hmun a a’nte Levi phunga Joseph, Sonle he’nchu Barnabas (tina chu, “Mathokna kapepa”) khan

³⁷ahlei ajōra, khava sêr kha, sonlehei kut a aleipek manhlut a kae.