Read Komrem ṬŌNTLOHEI 5 Bible Online

ṬŌNTLOHEI 5 - Komrem bible

ṬŌNTLOHEI 5

¹Mi inkhat arahming Ananias inti leika-om alômnu Sapphira leh ankarōi ahlek anleijōr.

²Tâk-kha alômnu leh inhnōmtōna sêr ahlek an indasōt a alakseng kha sonlehei kut a anleipek sōt.

³Peter in, “Ananias, nakarōia inphut nahmu sêr ahlek naṭhensōt a heisa mo Rathla Intheng hneng maleisei tlona naneia Seitan a’ncheo che?

⁴Nakarōi kha naleijōr mak lai kha’num, natâ kae; khana najōrsō katlunga’m asêr kha natâ kae. Achang inchu, heisik a mo hivahi tlo sik a a’nrei che? Nang in mihring hnenga maleisei natlo changmak Pathen hnenga natlo kae!” aleitipek.

⁵Hiva ṭong hi Ananias in atheilim leh kapûra kathi jo; khana hiva ṭong katheiphâk rakip leikaṭi hêr jo hei.

⁶Khang’khan rether heikahlut heia, akalōng kha ankatōmsōa ankajonsōt a, anvahre jo.

⁷Pung 3 kapō sōa, omchen leikasōk kha heite manhret phâkloa, alômnu heikahlut.

⁸“Nansanghrama nankarōi jōrman nantahmu sêrja kha akhenga hiseng môngmo, ahri pek roh?” tia Peter in aleider. Amanu’n, “Ôk, akhenga jo kae,” tia aleimasôn.

⁹Khava pha Peter in amanu hneng, “Nansanghrama heisik a mo Rōngpu Rathla hi enmansin sik a a’nrei chei? Napuise vakahre hei tûnhin kot khâr anheiphâk jo, khana nang um antakajonsōt sik jo che kae!” atipek.

¹⁰Khavatak a akekunga kapura kathi jo. Aheikahlut retherhei khan amanu athi jo kha anhmu pha, ankajonsōt a apuise anhrena hnenga anvahre jo.

¹¹Bekrup pumpui leh alak akathei phâk rakip leikaṭi hêr jo hei.

¹²Sonlehei khan det-hla leh ṭōn-inlak katamtak mipuihei kâra anleitlo. Takkasen rakip hei kha Solomon Sumpuk a le’ntûp ri hei.

¹³Mihe’n anleihri manṭhat hêr hei ravâng, vânga milak inkhatbek in ankâra invei sik kha leingam mak hei.

¹⁴Achang ravâng Rōngpua taksenna kanei nuhmei, pase kakhea heikahlut chet jo hei.

¹⁵Sonlehei ṭōntlo inlak jâra khan akana, akadam mak hei kha anhei kadomsōt heia Peter rahle kha anchunga ahei tlâkna sik a aheilônlena sik hlamdunga rakhum leh kapher chunga anleimanje hei.

¹⁶Jerusalem kimvea ka-om khōpui heia inphut mipui katamtak in akadam mak leh ṭai karôn anheiṭhōi hei, khang’khan ankhenga leikadam pet hei.

¹⁷Khava sōa Thempu Kalen leh aloi rakip khana akhō-khōa Sadducee rup kachang hei khan sonlehei chunga rahnak a thangsetna annei jo hei jâra anchunga karâkna nei sik heia inhnōm jo hei.

¹⁸Khang’khan sonlehei kha ansur manphut heia mipui khumna ankhum jo hei.

¹⁹Tâk-kha khava jânbât a khan Rōngpu ngeva’n kur kekot kha amahlânga, sonlehei kha amasō heia, hing’hin aleihri pek hei.

²⁰“Nangni se una Bek-inna vangir ruh, khana hringkhōther chungchânga mipuihei vahri pek hei ruh.”

²¹Sonlehei khan aṭong kha anjuia, khō avâr pha Bek-inna kahlut heia mihei anmanthei manphut jo. Thempu Kalen leh aloihei khan pui katluktak Sehmang-pachong intûpna a-omtheina sik Jehudi hlamkakei rakip anleibek hei, khava sōa kurkhum a sura antada sonle rakip an-ângkunga anheiṭhōina sik a ṭong anleipek hei.

²²Tâk-kha ṭōnkarônhei anvatlung pha khan chu, kur shunga khan sonle tûte vahmu mak jo hei, khava jâra he’nle heia Sehmang-pachonghei hneng hing’hin thang anleikōi.

²³“Kurkhum kha kanvatlung pha kahnet a a’nkirtlit khana kekot kahngâk he’n kaṭhatak a antahngâk kanvahmu, tâk kekot kanmahlâng jo leh chu, ashunga tûte anleiom mak jo kha kanva hmusōt jo!”

²⁴Hiva ṭong hi thempu kalenhei leh Bek-inn kahngâk a nganse, ṭōnkarônpa’n athei pha sonlehei chunga khan hei omchen mo aleikasōk jo tâk tia aleidet-hla hêr jo!

²⁵Khava laitak khan pase inkhat heikahlut a, “Rangei ruh! Nanmisur hei khan tûntûn hin Bek-inna mihei anmanthei hei!” atipek hei.

²⁶Khava pha Bek-inn kahngâk, ṭōnkarônpa kha amihei leh kasesōt heia sonlehei kha anvaṭhōi male hei. Amirōkchu, mipui he’n hlung vâng anideng sik ti ṭit jâra anchunga rumhrat tak a leitlo mak hei.

²⁷Anmani’n sonlehei kha anheiṭhōi manhlut heia Sehmang-pachong a’ntûp hei hmaikunga anman ngir heia, khana Thempu Kalen khan anmani ṭong ader jo hei.

²⁸“Hiva mipa rahminga mihei mantheina nannei makna sik a ṭong inhnaktak kanpek jo chei, tâk enruh heimo nantatlo! Nanṭong hri hi Jerusalem pumpuia nanmanthanga, ama leithina rahno hi kanchunga mathlung sik nanrei jo” aleiti.

²⁹“Mihring ṭong changloa Pathen ṭong jôk kantajui nger sik kasōk” tia Peter leh sonlelak he’n anmasôn hei.

³⁰Jesu kha thirkir vâng thingrakea nanhembek a nanleithat, tâk kanpi leh kanpuhei Pathen in thina inphut akei mathōi jo.

³¹Israel mipuihei hi an-insira ansetnahei rangei mandam anchen theina sik a tûnchu hlamkakei leh huksōtpa inkhat a Pathen in akut changting a’n-ong sik a amatungsōt jo.

³²Aṭong kajuihei sik a Pathen kutchoi pek, Rathla Intheng leh keini hi hiva rakip sik a sâkhi ung kae.”

³³Intûpna a’ntûp mihe’n hiva ṭong hi anthei pha anhnuk kana hêr joa sonlehei kha anthat hnōm jo hei.

³⁴Tâk-kha ankâra Pharisee mi inkhat, arahming Gamaliel, Dân oja leh mi rakip in inshângtak a kajana antaneipa kha intûpna kâra heikangirsōt. Ama’n sonlehei kha pha bongkhat vânga anṭhōisōtna sik heia ṭong aleipek hei.

³⁵Khana ama’n intûpna a’ntûp mihei hneng, “Eh ka-Israel changpui hei, hiva mihei chunga nanṭōn tlo kha insing thei ruh.

³⁶Pha ṭhahrep mak hma khan abinga mikalen inkhat eng tia a’ndon arahming Theudas intipa kha hong inthoksōt, khana mi 400 kapō in akahnung anleijui. Tâk-kha ama kha anthat jo pha khan chu, akahnung leikajui rakip hei kha inchek heia, aṭōn mantluk rakip akabâng jo kha mandonsōt ruh.

³⁷Khava sō nôk a’m, mija teina pha shunga khan, Galileea inphut Judas intipa kha hong kasōk nôk a, mi hingja’n akahnung anleijui, tâk ama’m anleithat nôk khana akahnung kajui rakip um inchek nôk jo hei.

³⁸Amirōkchu tuna chunga hinchu, anmani hei hi heite manloloa anbinga masō hei ruh tia kahri pek chei kae! Ajârchu tûntûna tlo sik a anṭōn mantluk hei hi mihringa inphut ajōng kakōn achang inchu, abinga hong kabâng sik,

³⁹tâk Pathena inphut ajōng kakōn aleichang inchu, manbâng sik hei hi akabei changmak ning. Achai chainating chu nanbinga Pathen dōina re katlo akachang sik chei kae!” Gamaliel ṭong kha intûpna a’ntûp mihe’n anleilo.

⁴⁰Sonlehei kha anbek manhlut heia anleivōk hei, khana Jesu rahming him-hima ṭong anhrimakna sik a ṭong pekna annei heia anmasō jo hei.

⁴¹Sonlehei kha Sehmang-pachong inn andahlona, Pathen in Jesu sik jâra hinghiva hmumasitak a suk manrimna kachen sik rahōi kasōk inkhat a anihnōmpek jo ung antia, le’npâk hêr hei.

⁴²Khang’khan ani tina Bek-inna leh inn-inna Messiah Jesu ṭong kaṭha chungchânga mi mantheina leh phôngsōtna kha abân anlei manjōm a kae.