Read Komrem ṬŌNTLOHEI 8 Bible Online

ṬŌNTLOHEI 8 - Komrem bible

ṬŌNTLOHEI 8

¹Khana Saul um antathat kha leikahnōm. Khava ning tak a inphut Jerusalema ka-om Bekrup-hei chunga êngset a tlo manrimna inphut jo. Sonlehei teilo takkasen rakip kha Judea leh Samaria pumpuia inthekchek jo hei.

²Malung kahluttak a Pathen ka-ôi pase ṭhahrep in Stephen kha anleihrea, ṭajai sui pum a aralum anleide.

³Tâk-kha Saul khan Bekrup suk manhmangna sik a rahnak a inṭanghmun aleilo, inn-inna kahlut a, takkasen intipou kha nuhmei leh pase aleikeisō heia kurkhum a aleikhum hei.

⁴Takkasen a’nthekchek rakip hei khan anselena rakip a ṭong kha anleiphông.

⁵Samaria khōpui pena Philip kasea khana ka-om mihei hneng Messiah chungchâng ṭong hi aleimanthei hei.

⁶Mipuihei khan Philip tahri kha malung kahluttak a anleirangei, khana aṭōn inlak tlohei kha anleihmu.

⁷Mi katamtak heia inphut rahnak a ông pum a ṭai leikasōk hei, khana lang kangōi leh ke inkhôi leikadam hei.

⁸Khang’khan khava khōpuia khan inpâkna kalentak leika-om jo.

⁹Dôi kachoi, arahming Simon intipa’n pha ṭhahrep kha adôi vâng khava Samaria mihei kha amandet-hla hei, khana tlotorna kaneitak inkhat a le’nhri,

¹⁰khana khava khōpui shunga ka-om kasin-kalen, mi rakip in anleikatōma anlei-um. “Ama hichu ‘Ratha kahratpen’ inti Pathen ratha kha kae,” anleiti.

¹¹Khava adôi vâng khan pha khaseng kha anhmit aleiphe pek heia anmalung amanhmak pek hei jâra khan aṭong anleijui.

¹²Achang ravâng Pathen Rengram ṭong leh Jesu Christa chungchânga Philip ṭonghri anthei pha antaksena nuhmei um, pase um tui hlutna anleitlo jo.

¹³Simon amatak inum ataksen jo; tuihlut atlosōa khan Philip kha a’nthlop puia aṭōn inlak tlohei ahmu pha aleidet-hla hêr jo.

¹⁴Jerusalema ka-om Sonle he’n Pathen ṭong hi Samaria ka-om mihe’n anrahlâng jo ti ṭong anthei pha, Peter leh John anleitir hei.

¹⁵Anmani antlung pha, takkasen he’n Rathla Intheng anchenna sik a anleiderpek hei.

¹⁶Ajârchu anmani tûte inkhat chunga Rathla Intheng kha lajōng chumak; anmani kha Rōngpu Jesu rahminga tuimanhlut rōk alakachen hei kae.

¹⁷Khava sōa Peter leh John in anchunga ankut andapek hei pha, Rathla Intheng anleichen jo.

¹⁸Takkasenhei chunga sonle he’n ankut anda pha Rathla Intheng ajōng inpek hei kha Simon in ahmu pha, Peter leh John kha sêr aleipek heia,

¹⁹“Tu mo inkhat chunga kakut kabōk pha leh Rathla Intheng anchen theina sik hiva nanratha neina hi ke’m apek ruh” aleiti hei.

²⁰Tâk-kha Peter in aleimasôn, “Pathen kutchoi hi sêr vânga rachôk thei sik a namandon jâra nasêr leh nang hmeikhura hlutsap ruh.

²¹Pathen hmit-hmua namalung rôn dikmak, khava jâra kanṭōn chunga hin nakin heite om mak khana chen’um neimak che.

²²Hinghiva akanimak ṭōnmantluk naneina chunga insir roh, khana hinghiva mandonna naneina inphut arangei mandamna sik che Rōngpu hneng inder roh.

²³Ajârchu nashunga thangsetna tûr kasiptak khana setna sōk che kae ti hi kamanhret che.”

²⁴Simon in Peter leh John hneng, “Hiva nanta hri rakip hei hi kachunga inkhatbek atlung makna sik, lungsettak a Rōngpu hneng aderpek ruh,” aleiti.

²⁵Rōngpu ṭong anphônga sâkhi anpeksō pha, Peter leh John kha Jerusalemting inle nôk jo hei. Anhlam jōnna Samaria khō katamtak a ṭong kaṭha anleiphông.

²⁶Rōngpu ngeva’n Philip hneng, “Intluk inna Jerusalema inphut Gaza jōnna hlam, thlang intongting son (Hiva hlam hi tûnlai chu senamak jo hei) se roh,” ati.

²⁷Khang’khan Philip kha intluk a leikase. Khava lai khan Ethiopia rengnu nei katintahei kâra ṭōnpui karônpen, Ethiopia ṭōnkarônpa kha a-inn kajōna leikase. Ama kha Jerusalema Pathen inmuk a vakasea ashakor gâria innhlam ahe’nle jo kae. Agâri a’ntôr pum a Isaiah Sânkathem lekha kha aleitei.

²⁹Rathla Intheng in Philip hneng, “Se ina, gâri so vahnai roh,” ati.

³⁰Philip um katlâna avahnaia Isaiah lekha a inphut aleitei kha aleithei. Ama’num, “Nateisōt ṭong kha namanhret nâk mo?” tia aleider.

³¹Ṭōnpui karônpa khan, “Tu mo inkhat in hri manchênna aneipek mak eng inchu heikhong mo kamanhret thei sik?” tia aleimasôn. Khang’khan Philip kha agâri chunga ajōng chōngna sik a aleibek.

³²Khava aleitei ṭong intheng hmun kha hivahi kae: “That sik a a’nkei kemōng kapōa, ahme anvo pek lai a’nhrâmtet mak kemōng kapōa, ṭong beikhatte leisō mak.

³³Ama hnōisetak a anleitlo, khana achunga ṭongdik leitan mak hei. Ama khang hrui chungchâng kha tûte’n hritheimak ning, ajârchu raleichunga ahringkhō inchaina kha hong katlung jo.”

³⁴Ṭōnpui karônpa khan Philip hneng ader, “Sânkathempa khan hivahi tu mo ahrina, ahri pek roh? Ama a’nhrina mo, a-emak leh milak ahrina mo?”

³⁵Khava sōa Philip kaṭong inphut jo; khava aleitei ṭong intheng hmun a inphut, Jesu chungchânga ṭong kaṭha kha aleihri pek jo.

³⁶Anmani khanga ansesuk pum a, tui omna hmun inkhat anphak pha, ṭōnpui karônpa khan, “Hin tui ka-om jo, tuihlut kachenthei makna sik heimo alaka-om?”

³⁷Khava pha Philip in, “Namalung pumpuia nataksen inchu, kachang thei che” aleitipek. Khana ama’n, “Jesu Christa hi Pathen sapa khet kae ti hi kataksen” tia aleimasôn.

³⁸Ṭōnpui karônpa khan shakor gâri inhngana sik ṭong apek a, Philip leh an-inhnibât a tui shunga kaṭum inhlut heia, Philip in tui manhlutna aleitlo jo.

³⁹Tuia inphut anheisōk pha a chu, Rōngpu Rathla’n Philip kha aleiṭhōisōt jo. Ṭōnpui karônpa khan avea leihmu nôk mak jo, tâk inpâktak a, ahlam hro kha abân aleimanjoma kae.

⁴⁰Philip khan Azotas hmun a a-om jo kha amanhretsōt jo. Khang’khan Caesarea ting ajō’nthang joa ahlam hro khōpui rakip a Ṭongrôn Kaṭha kha aleiphônga kae.