Read Komrem ṬŌNTLOHEI 9 Bible Online

ṬŌNTLOHEI 9 - Komrem bible

ṬŌNTLOHEI 9

¹Khava laitak nôk khan Rōngpu kajuihei kha Saul in that manram sik a rahnak a aleimaṭhit hei. Thempu Kalen hneng kasea

²Rōngpu Chônhlam kajuihei ahmu pou he’nchu, nuhmei-pase ṭhenloa asur heia Jerusalemting aheikei male theina sik, Damascus a intûpna innpuia hnōm pekna lekha amazet pek roh tia avader.

³Saul in Damascus khōpui kha aheiphâk tingvet, manhret manloa thangvâna inphut vâr inkhat in akimve kha aheikakho jo.

⁴Khava pha raleia katlua, rasa inkhat in, “Saul, Saul! Heisa mo nasuk manrim eng,” tia ahri kha aleithei.

⁵Ama’n, “Tu che mo, Rōngpu?” tia aleider. Rasa khan, “Nasuk manrim Jesu eng kha kae,

⁶tâk thōi roh khana khōpui shunga son se roh, sova hmun a son heimo natlo sik kha anhri pek sik jo che,” tia aleihri pek.

⁷Saul ta’nṭhōipui mihei kha ṭongtet loa leikangir hei, anmani’n rasa chu anthei, tâk tûte chu leihmu mak hei.

⁸Saul kha raleia inphut hongkathōia ahmit ahei mahlâng pha, khō heite leihmu mak jo! Khava jâra Damascus shung katlung kha akut a anleikei jo.

⁹Ni 3 kha khō heite leihmu mak, khana khava pha shung senga khan heite leisâk lei-in mak.

¹⁰Damascus a khan arahming, Ananias inti taksenna kanei inkhat leika-om. Ama’n hmangtalâr inkhat aleinei, khava hmangtalâra khan Rōngpu’n, “Ananias!” tia aleibek. Ama’n, “Hin ka-om eng, Rōngpu,” tia aleimasôn.

¹¹Rōngpu’n ahnenga, “Intluk inna Hlam Intlunting se roh, khana Judah intipa inn naphâk pha leh Tarsus a inphut arahming, Saul intipa kha aka-om mo tia der roh. Ama derna aneia ka-om,

¹²khana ama’n Ananias inti pase inkhat aheikahlut a khō ahmu thei nôkna sik a achunga akut adapek kha hmangtalâra ahmudek jo,” aleitipek.

¹³Ananias in amasôn, “Rōngpu, hiva mipa chungchâng leh Jerusalema namipuihei chunga ṭit ka-om tak aṭōnse tlohei chungchânga mi katamtak in anhri pek jo eng.

¹⁴Khana Thempu Kalen hnenga inphut, na’nmuk hei surna sik ratha neina ahe’nchoia Damascus a akahong kae.”

¹⁵Rōngpu’n ahnenga, “Se roh, ajârchu ama hi Jât-hlop hei leh renghei khana Israel mipui he’n karahming anmanhretna sik, kei inzen sik a kakadeisōt jo kae.

¹⁶Khana kei khet in kei sik jâra khōdeng theina athōk sik rakip hei hi kamanhmu sik kae,” aleiti.

¹⁷Khava pha Ananias kasea, Saul omna inna khan leikahlut, khana achunga akut aleidapek. “Sōpui Saul, najōngna hlam a nahnenga ajo’nlâr, Jesu ama khet in, Rōngpu khan ajōngtir eng kae. Avea khō nahmu nôkna sik leh Rathla Intheng nasipna sik a ama’n nahnenga ajōngtir eng kae,” atipek.

¹⁸Khava phatak a khan Saul hmit a inphut ngahlip kapō heimo khat heikatla a, khō ahmu nôk jo. Jōng kangirsōt a tui hlutna achen jo;

¹⁹khana thlai leh tui ahei sâk sō pha aratha hong kangar nôk jo. Saul kha takkasenhei kâra kanikhō ṭhahrep leika-om.

²⁰Ama intûpna innpuia kasehrek a Jesu hi Pathen sapa kae ti hi aphông manphut jo.

²¹Aṭong hri kathei rakip in det-hlatak a, “Jerusalema Jesu intipa inmuk hei kathatpa kha ama hi changmak mo? Khang khava mihei kha sura thempu kalenhei hneng ṭhōimale nôk sik hei kae tia ama hiva hmun a akajōng changmak mo?” tia le’nder hei.

²²Tâk-kha Saul ṭonghrile kha ratha leikahrat chet jo, khana Jesu hi Messiah kae tia manchênna aleipekna kha amanhnōm heia Damascus a ka-om Jehudi he’n leimasôn tor mak jo hei.

²³Kanikhō hingja athlengsōa, Jehudihei intûp heia Saul thatna sik ṭōn mantlukna anleinei jo,

²⁴amirōkchu khava anṭōn mantluk kha mihe’n anleihri pek a kae. Ama thatna sik a sûn leh jân khōpui sōngkot heia anleihlō.

²⁵Tâk-kha jân khat, akahnung kajui he’n Saul kha anṭhōia hraithuk vâng bang kave inkhat a anleimakhei mathlâk jo.

²⁶Jerusalema Saul kasea sonlehei kâra vatlâk sik a aleirei. Tâk-kha sonle inkhat achang jo kha anleitaksen mak jâra anleiṭit.

²⁷Khava pha a’nthōpui Barnabas kahonga sonlehei hneng aleiṭhōi manhlut jo. Saul in Rōngpu kha hlamlena aleihmu khana Rōngpu’n heimo aleihri pek tihei kha aleimanthei hei. Khana Damascus a Saul in heituk kangamtak a Jesu rahminga mihei mantheina aleinei hei mo ti kha’m aleihri pek hei.

²⁸Khang’khan Saul kha anmani leh ka-oma, Jerusalem pumpuia kaselea, kangamtak a Rōngpu rahminga ṭong aleiphông jo.

²⁹Khana Greek ṭong kajôm Jehudihei kha’m a’nbekpui heia ale’nkhepui hei, tâk anmani’n that sik macheng anleirei.

³⁰Takkasen he’n hivahi anhmusōt pha, Saul kha Caesarea ting anṭhōia Tarsusting anleitirsōt jo.

³¹Khang’khan Judea, Galilee khana Samaria pumpuia bekrup-hei chunga mōngna leikaleng. Rōngpu kajana’n vai arôn leh inṭhōia Rathla Intheng inthōpuina jâra anratha leikahrat khana anja um leikapung jo.

³²Hmun rakip a Peter in aleichōn, khana phat inkhat a khan Lydda a ka-om Pathen mihei kaphâk sik a leikase.

³³Khava hmun a khan lang kathi kum 8 arakhuma inphut ale’nṭhang tor mak, Aeneas inti mipa inkhat leh le’nhmu hei.

³⁴Peter in ahnenga, “Aeneas, Jesu Christa’n amandam jo che. Thōi inna narakhum inhre jo roh” aleiti. Khava phatak a Aeneas kha kathōi jo.

³⁵Lydda leh Sharona ka-om mi rakip in ama anhmu pha, Rōngpu langa he’nhe jo hei.

³⁶Joppa hmun a khan Tabitha inti, takkasen nuhmei inkhat leika-om. (Greek ṭonga arahming hi Dorcas kae, “Shakhi” tina kae). Amanu’n aphat nei rakip hi ṭōn kaṭha tlona leh sara khōdeng katheihei inthōpuina aleihmang.

³⁷Khava phatak a khan hongkana joa, leikathi jo. Akalōng kha anleirasia inn chungden a anleimanje.

³⁸Joppa kha Lydda a inphut hlarei mak, khana takkasen he’n Peter kha Lydda a ka-om ti ṭong anthei pha, pase 2 ahnenga antir heia, “Lungset a kanhnenga heihongloi roh” anva manti hei.

³⁹Khava jâra Peter kha intluk a anmani leh he’nṭhōi thang jo hei. Aheitlung pha inn chung denting anleiṭhōi, khava hmun a khan, renghmeinu he’n anṭap pum a ama kha anhei ûma Dorcas in ahring laia zakkō leh zakkō kalen aleisyem hei kha anleimalârpek.

⁴⁰Peter in innden shunga inphut ankhenga aleitirsōt hei, khana amarkhup athlep a derna aleinei; khava sōa akalōng langting khan inheia, “Tabitha, thōi roh!” ati. Ahmit ahei mahlânga, Peter kha ahmu pha, hong in-ong jo.

⁴¹Peter in arahlânga akei manngir jo. Khava sōa renghmeihei inveina takkasen rakip abek heia, amanu kha kahringa apek jo hei.

⁴²Hiva ṭong hi Joppa pumpuia inthang joa, mi katamtak in Rōngpu antaksen jo.

⁴³Joppa a shavun inṭhui, Simon intipa inna khan Peter kha kanikhō ṭhahrep leika-om.