Read Komrem ROMANHEI 1 Bible Online

ROMANHEI 1 - Komrem bible

ROMANHEI 1

¹Ṭong kaṭha kahri sik a Pathen tabek, sonle inkhat kachang sik a akadei, Christa Jesu sōk Paul in kaheimazet kae.

²Ṭong intheng rabu shunga ale’nzet kapōa, Ṭong kaṭha khachu hmalai khan sânkathem heia inphut Pathen in aleitepsa jo kae.

³Khava khachu asapa ni-Rōngpu Jesu Christa chungchânga kae; amihring changna dungjuia David sōna jōng inte jo;

⁴khana a’ntheng Rathla achangna dungjuia thina inphut keimathōina leh Pathen Sapa achangna kha ratha kahrattak a amalâr jo.

⁵Jât rakip he’n antaksenna sik leh anjuina sik a hlamkei theina, Christa sik a sonle inkhat changna intōk-hrepna kha Pathen in ama a inphut kei apek jo eng.

⁶Christa ta kachang sik a Pathen tabek Rome a ka-om nangni’m hivahin ahōmsa chei kae.

⁷Khava jâra Pathen talungset, ami kachang sik a abek Rome a ka-om nangnihei seng hnenga kaheimazet kae: Nipa Pathen leh Rōngpu Jesu Christa’n maritna leh lung mōngna kha pek chei rasoh.

⁸Ahma kakei pena nangni nankhenga sik a Jesu Christa jâra ka-Pathen kamanpâk, ajârchu vânhnōi pumpui in nantaksenna ṭong antheia kae.

⁹Asapa Ṭong kaṭha kahrilea kamalung pumpui vâng karazen Pathen, Pathen kha kaṭong hri kadik tina sâkhi kae. Kamandon ṭhakna chei hi Pathen in amanhret,

¹⁰khana nangni sik a kader ṭhak a kae. Pathen manṭhatna a-om inchu, tûn achaina pena hin nanhnenga kahong theina sik, Pathen hneng kader a kae.

¹¹Ajârchu nanngarna sik a ke’n rathla langa vâng kha ka’nsempui theina sik chei ka’nhmupui hnōmhêr chei.

¹²Ti chu nangni taksenna leh kei taksenna chunga inkhat leh inkhat malung ni’nthoktō theina sik kati kae.

¹³Kasōpuihei, pha katamtak nanhnenga hong sik a le’ntluk ṭhak eng, tâk kahong thei makna sik heimo inkhat in ahei tik a ating ṭhak eng ti hi nantamandon nger sik kae.

¹⁴Ajârchu mi rakip hneng ṭōn tlo-nger sik a kanei, akakhang hei hneng leh akakhangmak hei hneng, lekha kathem leh akathemmak hei hneng kalabat a kae.

¹⁵Khava jâra Rome a ka-om nangni hneng um Ṭong kaṭha hri sik hi karatha akahrok kae.

¹⁶Kei Christa ṭong kaṭha sik a inzak mak eng; hivahi ahma inkeipena Jehudihei, khana Jât-hlop he’m akataksen rakip hukmanhringna sik Pathen rathahrat kha kae.

¹⁷Ajârchu Pathen in heikhong mo ama khet leh inṭhōia mi amandik ti hi ṭong kaṭha hin amalâr: hivahi a’nphutbia inphut a’nchaina katlung taksen jâra kae. Ṭong intheng in hinga ahri, “Taksen jâra Pathen ângshunga dikna kachen mi kha kahring sik,” ati.

¹⁸Ṭong kadik mi’n antamanhret sik kha anhlam kadikmak khan akhâr hei, khava mihei ṭhatmak leh setna rakip chunga Pathen hnuk natna kha marvâna inphut jōng inlâra kae.

¹⁹Pathen in akarâk hei, ajârchu Pathen chungchânga manhret torna kha anhnenga inlâr sengsong jo, ajârchu Pathen khet in amanlârsenga kae.

²⁰Pathen in vânhnōi asyem bia inphut, hmit a hmutheilo atorna, ahei tik a aratha neina leh apathen changna arachak kha inthengtak a inhmua kae; khahei kha Pathen kutsyem neinâk heia inphut inhret tor heia kae. Khava jâra khava mihei kha an-inphesōtna sik heite neimak hei!

²¹Anmani’n Pathen anmanhret, tâk ama chen, kajana kha pek mak hei, manpâk um manpâk mak hei. Khava kanek a anmalung pui katluk a kamoa, anmandona akarōksai kha inthim in amakhusi jo.

²²Anmani’n kasing ung anti tâk kamohei;

²³Anmani’n thitik neilo Pathen antakamuk sik kanek a akathithei hei: mihring, va, sha, a-emak leh bok a kalôn hei ansyema ankamuk hei.

²⁴Khava jâra anmalung tarangei tamadu akanimak ṭōnse katlo sik a khava mihei kha aleihnōm pek jo hei. Khana anmani’n inzakpui ka-omtatak omchen inkhat leh inkhat kâra antlo jo.

²⁵Anmani’n akadik Pathen chungchâng ṭong kha malei kasei inkhat leh anthleng jo; anmani’n ahei tik a choi manshâng sik Ankasyempa kanek a akutsyem neinâk-hei jôk kha ankamuk a anrazen hei! Amen.

²⁶Anmani’n hihei antlo jâra inzakpui ka-om tak madu rangeina kha apek hei. Nuhmeihei kapha’num angaia taksa inchun sik kha angai kachangmak a antlo.

²⁷Khava kapōa khan pase he’num angaia nuhmei leh an-inthlop sik kha andahlona, anmani khat leh khat indu heia kae. Mihe’n inzakpui ka-om omchen hi inkhat leh inkhat antlo, khana anṭhena chendôr kasōk karâkna kha anbing chunga antajōngrôn sōt kae.

²⁸Khava mihei khan akadik Pathen manhretna kha anmalung shunga andahnōm mak jâra, antatlo mak sik kha antlona sik Pathen in malung kaṭhamak kha apek jo hei kae.

²⁹Anmani hi ṭhatmak inti rakip kha kasip phet hei, malung dikmak, akaṭhamak, phâmrai kase, in-enkada; anmani hi thangset, mithat, indōi, mikahōn, akaṭhamakpen mandonna khan kasip hei. Anmani mitheiloa inbek hei

³⁰inkhat leh inkhat inhri inset hei; anmani’n Pathen anhōt hêr, mi inzakna antlo, inlensak hei, khana in-ortettôt hei; ṭhatmak tlona sik a ahlam katamtak anmandon; annu anpa ṭong juimak hei;

³¹anmani mandon ṭhen theina neimak hei; anṭong tepna juimak hei, khana milak tûte chunga lungset leh lungkham neimak hei.

³²Hinghiva omchen katlo mihei khachu anthi sik rahōi kasōk tia Pathen Dân tahri kha anmani’n amanhret. Achang ravâng anmani’n khava omchen kha antatlo manjōm rōk changloa khava omchen katlo milak-hei kha’m an-inteipui heia kae.