Read Komrem ROMANHEI 10 Bible Online

ROMANHEI 10 - Komrem bible

ROMANHEI 10

¹Kasōpuihei, kami khet hei hi hukmanhring anchang sik kha ke’n heituk-hrep kamalung pumpuia kamadu jo mo! Ke’n heituk-hrep a anmani sik Pathen kader jo mo.

²Anmani Pathena anmalung kahlut hrânghra ti hi ke’n nanhnenga kahri manchên tor; tâk-kha manhretna kadiktak chunga anmalung akahlut khachu changmak.

³Pathen in ama leh kadik a dasapna sik hlam asyem kha anmani’n leimanhret mak hei, khava kahlânga anmani’n anbing tamaduhrep hlam an-insyema insaler hei; khava jâra mihring mandikna sik a Pathen hlam syema khan inpek inhlutmak heia kae.

⁴Ajârchu akataksen rakip kha Pathen leh kadik a dasapna sik a, Christa khan Dân inchaina kha atlosōt jo.

⁵Dân juia inphut Pathen leh kadik a omsapna sik Moses’n hivahi amazet kae: “Tu achang inum Dân ṭongpek-hei kajui kha kahring sik.”

⁶Tâk-kha taksen jâra Pathen leh kadik a omsapna chunga Ṭong intheng tahri kha hi kae: “Marvâna tu mo akake sik? tia nanbinga a’nder sik chei changmak.” (Khachu Christa nikei mathlâk kae).

⁷“Khan nôk chu, ralei thōia tu mo akahlut sik? tia nanbinga a’nder sik chei changmak.” (Khachu Christa thina inphut nikei mathō kae).

⁸A’nhri kha hi kae: “Pathen ṭong kha nanhnenga ka-om, nanmalung shunga leh nanbeia ka-om,” inti kha keini tahrile, taksenna ṭong kha kae.

⁹Nanbei in Jesu kha Rōngpu kae tia nanhri sōt a khana ama thina inphut Pathen in akei mathōi jo tia nanmalung shunga nantaksen inchu, nangni hukmanhring kachang sik chei.

¹⁰Eini Pathen leh kadik a adasap me hi eini taksenna jâra kae; eini hukmanhring nichen hi nibeia niphôngsōt jâra kae.

¹¹Ṭong intheng in, “Tu achang inum ama kataksen mi kha malung tlâksam mak ning,” ati.

¹²Hinahin mi rakip invei jo, ajârchu Jehudi leh Jât-hlop inkhetna heite om mak. Pathen chu mi rakip Rōngpu inkhat rōk kha kae khana akabek rakip hneng katluk a vâng apek hei.

¹³Ṭong intheng in, “Tu achang inum Rōngpu rahming kabek rakip inhuk sik hei,” ati.

¹⁴Tâk-kha anmani’n antaksen mak inchu heikhong mo a’nthōpuina sik antabek sik? Khana aṭong kha anthei mak inchu heikhong mo antataksen sik? Khana aṭong kha anva hrile mak inchu heikhong mo antathei sik?

¹⁵Tirlehei kha antirmak he’nchu heikhong mo ṭong kha antavahrile sik? Ṭong intheng in hing’hin ahri: “Ṭong kaṭha karôn tirlehei kethon hi heituk-hrep a’nlak jo mo?”

¹⁶Tâk-kha Ṭong kaṭha kha mi rakip in rahlâng mak hei. Isaiah khet in hing’hin ahri: “Rōngpu, tu’n mo kanṭong hri kha ataksen?”

¹⁷Khava jâra ṭong kha antheia inphut taksenna hi kahong, khana Christa kha hrilelena inphut ṭong kha kahong.

¹⁸Tâk-kha ke’n kader: ṭong hi antathei mak mo kae? Anmani’n antheikhet jo ajârchu Ṭong intheng in ahri: “Anṭonghri karesō raleichung pumpuia kase sō jo; anṭong rahme raleichung inchaina katlung sō jo.”

¹⁹Avea kader: Israel mihe’n leimanhret mak hei mo? Moses kha ahma kakei ani insôn kae: “Kamihei thangsetna sik Jât-hlop hei kha kahmang sik hei kae. akamo jât-heia inphut kamihei anhnuk natna kha katlo sik kae.”

²⁰Khana Isaiah khan kangam chet a hinga ahri: “Kei kajong mak mihei khan anhmu eng; Kei intōpui sik a akadermak mihei hnenga kei inlâr eng.”

²¹Tâk-kha Israelhei chunga ama’n ahri, “Ke’n ṭong kajuimak leh he kajong mihei chunga sûn nilun kakut kakalânga kae.”