Read Komrem ROMANHEI 11 Bible Online

ROMANHEI 11 - Komrem bible

ROMANHEI 11

¹Khava sōa ke’n kader: Pathen in amihei ahnōm mak jo kha heimo kae? Changmak! Kei khet um Israel inkhat eng kae, Abraham sōn, Benjamin phung mi inkhat eng kae.

²Pathen in a’nphutbia akadeisōtsa amihei kha hnōmpek mak tlomak, Elijah in Israelhei dōina Pathen hneng ahri ṭong intheng kha nangni’n nanmanhret:

³“Rōngpu, anmani’n nasânkathem anthat hei khana namaichâm anmansetsō hei; kei rōk hi ka-om jo eng, that sik a anrei eng.”

⁴Pathen in heikhong mo amasôn, “Malei kasei Baal Pathen inmukmak kei sik a mi 7,000 kalada hei.”

⁵Tûn kha leh in-anghrep a, alungset maritna jâra Pathen takadeisōt mi katlômtek inhleia ka-om hei.

⁶Pathen kadeisōtna hei khachu, anṭōntlo jâra changloa, amaritna jâra kae. Ajârchu Pathen kadeisōtna kha anṭōntlo jâra achang inchu, amaritna kha maritna kadiktak changmak jo ning.

⁷Khan chu heimo? Israel mihe’n anta-enpen kha leihmu tor mak hei. Akahmu sōt hei, Pathen in akadeisōt hei kha, rup katlômtek rōk hei kae; alakseng chu Pathen bekna heia khan ankōr kasak a kae.

⁸Ṭong intheng in ahri, “Pathen in anlungri leh anmandonna amanmo jo hei; tuning katlung anmani hmutor mak hei khana rangei tor mak hei.”

⁹Khana David in ati, “Anrevei rehōi khan sur hei sona chânga man-ôk hei rasoh; anmani tlû hei rasoh, karâkna chen hei rasoh!

¹⁰Khō anhmuthei makna sik anhmit cho jo rasoh; khana pha rakip a an-inreng jâra inkun hei rasoh.”

¹¹Khava sōa ke’n kader: Jehudihei an-inpai inthlûk pha, inhmangna shunga akatla inhlut thang jo hei mo? Kha changmak! Anmani setna antlo jâra, Jât-hlop hei hneng hukmanhringna kha kajōng jo, khavakha Jehudihei thangsetna sik a kae.

¹²Jehudihei setna khan vânhnōia mahâmṭhat katamtak ajōng rôn, khana anmani rathla langa antlâksamna khan Jât-hlop hei mahâmṭhat katamtak ajōng rônna kha kachang jo. Khana khan Jehudi ankhenga an-inveisa inchu mahâmṭhatna kha heituk-hrep akalen sik mo!

¹³Tûnchu Jât-hlop nangnihei hneng kahri kae: Jât-hlop hei hneng kei sonle inkhat kachanglai seng, kaṭōn chunga inlensak sik eng.

¹⁴Ka-jât-hei ṭhahrepbek kahuk manhring theina sik, khana kajât-hei thangsetna heikhat katlo theina sik a kae.

¹⁵Heijâra mo niti’nchu, anmani hlonsōt anchang pha, jât-hlop hei hi Pathen indōipui anchanga inphut ṭhōn hongkachang jo heia kae. Khan chu, anmani hnōmpek anchang pha khan chu, khavakha heihmen kachang sik jo? Thina kha hringna hongkachang sik jo.

¹⁶Hmakakei buhlom har kha Pathen hneng a’npe achang inchu, ahlom pumpui kha’m ama ta kae; khana thing rajunghei kha Pathen hneng tōksōt achang inchu, abâk-hei kha’m ama ta jo hei kae.

¹⁷Rahōna Olive bâk ṭhahrep khat anmathlek jo hei, khana ram a Olive bâk-hei anmanjōm jo. Nangni Jât-hlop chei, khava ram a Olive bâk a’njōm inmat kapō chei kha kae, tûnchu nangni’n akahnet Jehudihei rathla hringkhō kha nantachenpui hei kae.

¹⁸Khava jâra anmani thing bâk katlek kapō hei kha nangni’n nantahnōise mak sik hei kae. Heikhonga mo a’nlensak tor sik chei? Nangni chu abâk hrep chei kae; nangni’n arajung kha thlop mak chei, arajung khan nangni athlop chei kae.

¹⁹Tâk-kha nangni’n, “Kadik, kei sik hmun syemna sik a abâk-hei kha mathlek jo hei kae,” nanti thei.

²⁰Khavakha kadik; anmani antaksen mak jâra akatlek hei kae; khana nangni’n nantaksen jâra anhmun kha nantaleihlō kae. Khava jâra inlensak mak ruh, khava kanek a ṭit jôk ruh.

²¹Heijâra mo niti’nchu Pathen in abâk takkhet kachang Jehudihei kha hmen aṭhenmak hei achang inchu, nangni aṭhen sik ung tia nantamandon mo?

²²Hinahin eini’n Pathen kha heituk a lungsetna anei khana heituk a kakhôk mo ti nihmusōt a kae. A’npai inthlûk hei chunga khôk sakna anei; tâk nangni alungsetna shunga nan-om ṭhak inchu, alungset ṭhak sik chei. Tâk-kha khanga achangmak inchu, nangni’m amathlek sik cheia kae.

²³Khana Jehudi he’n anleitaksen makna kha anjōng dahlon jo’nchu, Pathen in anmani hma anleiomna hmun a khan aman om male sik hei, ajârchu Pathen in kha atlo tor a kae.

²⁴Nangni Jât-hlop chei, ram a olive akatlek kapō chei kha kae, rahōn olive tlekna hmun a khan angai changloa manjōm chei kha kae. Jehudihei hi rahōnna olive kapō hei kae; Pathen in akatlek bâk-hei kha antlekna thingkung mama khan amanjōm sik hi kabeichet a kae.

²⁵Kasōpuihei, nangni’n nantamanhret sik a kamadu akadik a’n-ip inkhat ka-om, ajârchu khava khan nan-insingsakna khana inphut ahrung sik chei. Khachu hi kae: Israel mihei malung kasak kha akasakthang sik changmak; tâk Pathen hneng Jât-hlop hei kakip a anhonghlut sō mak kârseng rōk sik kha kae.

²⁶Khana Israel rakip hukmanhringna sik kha hi kae. ṭong intheng in ahri: “Ziona inphut mi kahuk inhringpa kha akajōng sik kae. Ama’n Jacob sōn heia inphut ṭhatmakna rakip alosōt sik.

²⁷Ke’n ansetnahei seng kalosōt sō pha leh, hiva ṭong intepna hi anmani leh kannei sik.”

²⁸Anmani’n ṭong kaṭha kha anlei-hnōm mak jâra, Jehudihei kha nangni Jât-hlop hei jâra, Pathen inrepui kachang jo hei. Achang ravâng anmani Pathen takadeisōt hei anchang dungjuia, anpu sōnhei jâra aṭhōnhei kha kae.

²⁹Ajârchu Pathen in akadeisa leh mahâmṭhat apeksa hei chunga amalung thlengmak.

³⁰Nangni Jât-hlop sik a chu, hmalai khan Pathen ṭong leijui mak chei, tâk tûnchu Jehudi mihe’n Pathen ṭong anrangei mak jâra, nangni’n Pathen maritna kha nanchen jo.

³¹Kha leh in-anghrep a, nangni’n nantachen jo maritna jâra khan, tûnhin Jehudi he’n Pathen kha juimak jo hei, tûnhin khavakha Pathen maritna anhmu theina sik a kae.

³²Ajârchu anmani rakip chunga Pathen in maritna amalârna sik, mi rakip ṭong kajuimak khum mi amanchang jo hei.

³³Pathen nei leh haoje hi heituk a jo mo! Asingna leh amanhretna hi heituk a’nthuk mo! Ama ṭong mathlâkna tu’n mo ahri manchên tor sik? Tu mo ama hlam inhret tor sik?

³⁴Ṭong intheng in ahri kapōa: “Tu mo Rōngpu malung inhret? Tu mo ama inse tor sik?

³⁵Ama’n ahongpek kha malena sik a tu’n mo ama hneng heikhat apek jo.”

³⁶Ajârchu heirakip ama tasyem kae, khana heirakip ama jâra khana ama sik a aka-om hei kae. Ahei tik a Pathen kha lûrṭhak rasoh! Amen.