Read Komrem ROMANHEI 12 Bible Online

ROMANHEI 12 - Komrem bible

ROMANHEI 12

¹Khava jâra kasōpuihei, Pathen maritna me alen jâra ke’n nanhnenga hivahi kangek chei kae. Pathen malung tlaina leh aṭōn tlona khan inthenga inpek sōtna sik, nangni Pathen hneng hringpuma intōksōt ruh. Hivahi nantatōk sik kamukna kadiktak kha kae.

²Hiva raleichung chônngaia om mak ruh, tâk pui katluk malung inthenga khan Pathen in nanshunga thleng chei rasoh. Khava sōa heimo akaṭha, malung tlaina khana pui katluk, Pathen lungdo hei kha nanmanhret tor sik.

³Khana Pathen in marittak a apek eng kutchoi jâra, ke’n nangni inkha-khat hnenga kahri kae; nan-mi changhrep kakhea inshângtak a indonmak ruh. Khava kanek a nanmalung mannem jôk ruh, Pathen tapek chei taksenna dungjui hrep a nanbinga indon ruh.

⁴Eini’n taksa pumkhat chunga taksa bâk katamtak ninei, khana taksa bâk rakip anhmangje ahlop et ka-om.

⁵Kha leh in-anghrep a, eini nitam inum, Christa leh inchunna shunga taksa inkhat me kae, taksa bâk hlop-hlop kapōa eini nikhenga khat leh khat a’nchun et me kae.

⁶Khava jâra Pathen tapek me maritna jâra kutchoi pek ahlop-hlop nichen et kha nihmang et sik kae. Pathen kutchoi pek me kha aṭong kahri inthangle sik achang inchu, eini’n taksenna ninei dungjuitak a nihri sik kae;

⁷mi razenna sik achang inchu, nirazen sik kae. Manthei sik achang inchu, nimanthei sik kae;

⁸milak-hei mathokna sik achang inchu, mathok sik hei kae. Tu achang inum milak chen aneipui hei kha, malung kalentak a chenpui hei rasoh, tu achang inum ratha kaneihei khan ṭōntlo hrat rasoh; tu achang inum milak chunga lungsetna kanei sik khan katlai senga lungset rasoh.

⁹Lungsetna kha pui katluk a malung intheng chang rasoh. Akadik mak mater ruh, akaṭha kha matutlit ruh.

¹⁰Christa a inkhat leh inkhat sōpui kapōa marittak a inlungset ruh, khana inkhat leh inkhat injatō chetna sik malung manhlut ruh.

¹¹Ṭōntlo hrat ruh, nanratha semak rasoh. Malung kahluttak a Rōngpu kha razen ruh.

¹²Nan-inhōrna khan nanmalung mantlai rasoh, khōdeng theina kha dehrat ruh, pha rakip a derṭhak ruh.

¹³Nannei kha Christian sōpui akatlasam hei insempui hei ruh, nan-inn kha khōhmehei sik mahlâng ruh.

¹⁴Inrimna nankapek hei kha Pathen in mahâmṭhat apekna sik derpek hei ruh, kadik, ahâksêr makna sik, mahâmṭhat apekna sik hei der ruh.

¹⁵A’npâk hei kha inpâkpui hei ruh, akaṭap hei kha ṭappui hei ruh.

¹⁶Mi rakip sik in-ang et a mandonna nei ruh. Inlensak mak ruh, tâk insinsakna ṭōn kha rahlâng ruh. Nanbinga insingsak mak ruh.

¹⁷Mi inkhat in nanchunga ṭōnse atlo’nchu, ama kha ṭōnse vâng male mak ruh. Mi rakip in kaṭha tia antamandon ṭōna khan inṭang ruh.

¹⁸Mi rakip leh intōk inchama omtheina sik heirakip nantor chenna tlo ruh.

¹⁹Kaṭhōnhei, phu inhlōhêr mak ruh, khava kanek a Pathen hnuknat jôk inlo rasoh. Ajârchu ṭong intheng in, “Ke’n phu kahlō sik, ke’n kapek male sik hei, Rōngpu’n ati.”

²⁰Khava kanek a ṭong intheng in ahri, “Na’nrepui he’n anvon aṭâm inchu vei hei roh, antui ahre’nchu, in sik pek hei roh; khanga tlo khan namanzak hlon sik kae,”

²¹Ṭhatmak khan tor mak chei rasoh, khava kanek a ṭhatmak kha akaṭha vâng tor jôk ruh.