Read Komrem ROMANHEI 14 Bible Online

ROMANHEI 14 - Komrem bible

ROMANHEI 14

¹Taksenna akatlasam hei kha rahlâng hei ruh, tâk anmani mandonna chunga khan maherset mak hei ruh.

²Mi ṭhahrep taksenna khan heirakip amansâk thei hei, tâk taksenna katlâksam mi inkhat chu anse-hleina rōk asâk a kae.

³Heirakip kasâk thei mi khan anse-hleina rōk kasâk mi kha hmumasi mak rasoh; anse-hleina rōk kasâk hei khan heirakip kasâk hei chunga khan ṭong tanmak rasoh, ajârchu Pathen in ahnōm jo hei kae.

⁴Milak inkhat sōk chunga ṭong katan sik nang tu che mo? Anmani hmesō sik leh hmesō mak sik kha an-Kapupa rōk in ṭong atan sik kae. Khana hme’m ansō sik ajârchu Rōngpu khan hme amansōtor heia kae.

⁵Mi ṭhahrep in kanikhō inkhat hi alak-hei kanek a amankhôk chet a kae, alak he’nchu kani rakip hei hi anman-ang pet hei. Eini inkhat et in nimandonna hei hi nimanhnet sik kasōk.

⁶Kani inkhat kalûra indon mi khan Rōngpu kajana a atlo kae; heirakip kasâk sik mi kha’num Rōngpu kajana atlo kae; ajârchu anmani’n anthlaisâk jâra Pathen anmanpâk a kae. Heikhat kahngōi hei khan Rōngpu kajana antatlo kae, khana Pathen anmanpâk a kae.

⁷Eini tu inkhat in abing rōk sik a hringmak me, eini tu inkhat in abing rōk sik a thimak me.

⁸Eini nihring inchu, Rōngpu sik a akahring me kae, khana nithi’num Rōngpu sik a akathi sik me kae. Khava jâra eini nithi’num, nihring inum, Rōngpu ta me kae.

⁹Khava jâra Christa kha akahring leh akathi Rōngpu achangna sik aleikathia aleikathōisōt jo kae.

¹⁰Kha achang inchu anse-hleina rōk kasâk nang in heisa mo nasōpui chunga ṭong natan? Khan chu heirakip kasâk nang in heisa mo taksenna kanei alak-hei kha nahnōise hei? Eini nikhenga Pathen ṭong tanna hma a alakangir et sik me kae.

¹¹Ajârchu ṭong intheng in ahri: “Rōngpu’n ati, kei akahring khet kachang jâra, mi rakip kahma anmarkhup anlathlep sik, mi rakip in kei Rōngpu antalati sik eng kae.”

¹²Khava jâra eini mi rakip in nibing et omchen tintana kha Pathen hneng nilapek sik kae.

¹³Khava jâra eini khat leh khat ṭong intan bâng jo rih. Khava kanek a milak inkhat inpaina sik leh mathlûkna sik tlo hêrmakna sik a mandon ruh.

¹⁴Thlaisâk hi kamukna langa abinga intheng makna om mak ti hi Rōngpu Jesu leh kan-inchunna shunga inchêntak a manhretna animannei eng; tâk mi inkhat in heikhat kha intheng mak tia ataksen inchu, khavakha ama sik a a’nthengmak hong kachanga kae.

¹⁵Nangni’n heikhat sâk jâra nansōpui malung nanmantôn inchu, nangni’n lungset omchen nantatlo changmak jo. Christa’n athipek jo mi inkhat kha nangni’n thlaisâk vâng sukset mak ruh.

¹⁶Nangni’n akaṭha inkhat a nanta lo kha rahming setna manchen mak ruh.

¹⁷Heijâra mo niti’nchu, Pathen rengram kha sâk leh in langting khan changmak, tâk Rathla Intheng tapek dikna, intōk inchamna, inpâkna hei hi kae.

¹⁸Khana mihe’n Christa kha hinga anrazen pha Pathen kha anmantlai khana milak he’n anhnōm heia kae.

¹⁹Khava jâra inkhat leh inkhat inbômtōa ratha ngarna leh intōk inchamna ahei karôn sōt neinâk-hei kha chenna sik ahei tik a niradin nger sik kae.

²⁰Pathen tatlo ṭōn kha sâk leh in vâng suk manset mak ruh. Sâk rakip nisâk thei, tâk hei-achang inum nithlâisâk khan mi inkhat mathlûkna sik achang inchu khava sâk sik kha dikmak a kae.

²¹Nasōpui inpai inthlûkna sik achang inchu, hme achanga, ju-in achanga khana hei-hei achang inum sâk mak inmak hi akadikpen kae.

²²Khava jâra Pathen leh nang kâra hiva chungchânga nataksenna kha jui jo roh. Akadik heimo inkhat antlo pha, ṭhena malung karônmak hei kha mikahōihei kae!

²³Tâk-kha ansâkna chunga malung inkei-chiona annei inchu Pathen in amaset hei, ajârchu aṭōntlo kha taksenna chunga inhnga mak a kae. Khana taksenna chunga a’nhnga mak rakip kha setna kae.