Read Komrem ROMANHEI 15 Bible Online

ROMANHEI 15 - Komrem bible

ROMANHEI 15

¹Taksenna tinga akangar eini’n akatlasam hei rônkahrik kha nirônpui heia nibôm sik hei kasōk. Eini’n nibing rōk hōina sik jongmak rih.

²Khava kanek a eini nikhenga nisōpuihei taksenna ting nisyemsōtna sik hei, anbing et ṭhatna sik a, anmalung mantlaipek hei rih.

³Ajârchu Christa khan abing hōina sik tlomak. Khava kanek a, ṭong intheng in ahri, “Nangni hnenga inzakna inpek kha kei chunga katlung jo.”

⁴Ajârchu ṭong intheng in dehratna leh mathokna apek me khana inphut inhōrna nineina sik, ṭong intheng shunga a’nzet rakip kha eini mantheina sik a kae.

⁵Christa tekhing kha juia dehratna leh mathokna kung kachang Pathen khan hiva mandonna leh a’n-anghrep lungtup kha nangni kâra mannei chei rasoh,

⁶hivahi nankhenga inchun et a karesō inkhat rōk a ni-Rōngpu Jesu Christa Pa leh Pathen kha nanmanpâk theina sik a kae.

⁷Khan chu Christa khan nangni alomanhlut chei kapōa, Pathen lûrna sik, nangni khat leh khat inlo inhlut ruh.

⁸Ajârchu, ke’n kamanthei chei hi kae, anpu sōnhei hnenga Pathen ṭongtep hei kha hui ajōng tlungna sik, Pathen hi taksenthei kachang ti malârtheina sik, Christa hringkhō ṭōntlo kha Jehudihei kahlanga kae,

⁹khan chu Pathen lungset maritna jâra Jât-hlop he’num Pathen kha anmanpâk theina sik a kae. Ajârchu ṭong intheng in ahri: “Khava jâra Jât-hlop hei kâra kamanpâk sik che; Nang choi ka-ânna hla kasak sik.”

¹⁰Avea ahri nôk: “Jât-hlop hei, Pathen mihei leh inpâksap ruh.”

¹¹Avea ahri nôk: “Jât-hlop rakip, Rōngpu kha choi ka-ân ruh; mi rakip in ama choi ka-ân ruh!”

¹²Khana avea, Isaiah’n ati, “Jesse sōn inkhat jōng inlâr sik; ama Jât-hlop hei vai karôna kajōng sik, khana ama chunga inhōrna annei sik.”

¹³Rathla Intheng hratna vâng nan-inhōrna kha akhangchet thei ṭhakna sik, ama nantaksenna vâng mōngna leh inpâkna rakip kha inhōrna kung kachang Pathen in mansip chei rasoh.

¹⁴Kasōpuihei, nangni inkhat leh inkhat nan-inthei torna sik manhretna rakip leh ṭhatna rakip kasip jo chei tia kabinga manhret manchênna kanei.

¹⁵Achang inum hiva lekha shunga hin nangni mandonsōtna sik a kamanthei chei ṭongpui ṭhahrep chunga hin kei inlensak eng. Kei inlensak hi Pathen tapek eng mahâmṭhat jâra,

¹⁶kei Jât-hlop hei kâra Jesu Christa sōk inkhat kachang jâra kae. Jât-hlop hei kha Rathla Intheng in atōksōt Pathen tarahlâng inkhat anchangna sik, ke’n Pathena inphut ṭong kaṭha kha thempu inkhat kapōa kahrilea karazen kae.

¹⁷Khava jâra Christa leh inchunna shunga Pathen ṭōn kaleitlo jâra khan a’nlensak tor eng kae.

¹⁸Pathen juina sik a Jât-hlop hei hlamkakeia Christa khan kei ahmang enga aleitlosōt jo hei chung rōk a inlensak sik eng khana kahri sik. Ama’n hivahi ṭonghri leh ṭōn vânga,

¹⁹ṭōn-inlak leh det-hla vânga, khana Pathen Rathla hratna vânga, aleitloa kae. Khava jâra Jerusalema inphut Illiricum katlunga kasena senga Christa chungchânga ṭong pui katluk a kaleiphông jo.

²⁰Kei lungtup khachu, mihlop inkhat in innhmun asyema khava chunga inn kasak kha changmakna sik, Christa ala’nthei makna ram a ṭong kaṭha kha vaphông sik kha kae.

²¹Ṭong intheng in ahri: “Aṭong antahri pek mak hei khan ama anhmu sik, khana aṭong alakathei mak hei khan ama anmanhret sik.”

²²Khava jâra nanhnenga hong sik hi pha katamtak anikating hong ka-om jo.

²³Tâk-kha tûnchu hintinga ramheia kaṭōn kahongchai jo hi leh inṭhōia nangnihei inhmupui sik a kum katamtak kaleimantluk jo jâra,

²⁴tûnhin tlosōt sik a inhōr jo eng. Spain kasorna hlam a nangni ka’nhmupui hnōm chei, nangni leh inhmuna pha bongkhat kahōia kahmangsō leh, sova hmun a kasena sik nanta’nthōpui sik eng kamadu.

²⁵Kha achang inum, tûntak hinchu Jerusalema ka-om Pathen mihei razenna lakase sik eng.

²⁶Ajârchu Jerusalema Pathen mihei kâra sarahei inthōpuina sik Macedonia leh Achaia bekrup he’n mankasea tōkna anneia kae.

²⁷Khava mandonna kha anbinga antanei kae; akadiktak khachu anmani inthōpui sik kha antlohlam kasōk kae. Jehudi he’n rathla langa mahâmṭhatna kha Jât-hlop hei antachenpui hei kapōa Jât-hlop he’n taksa langa mahâmṭhatna kha Jehudihei inthōpuina antahmang sik kasōk.

²⁸Hiva ṭōn hi kachai pha khana anmani sik a ale’nṭhei sêr hi ankut chunga kapek hei leh Spain sik a ke kathon sik khana kahlam jōnna nangni kaheiphâk sik chei.

²⁹Ke’n nanhnenga kahong pha Christa mahâmṭhat kasip phet leh inṭhōia kahong sik eng ti kamanhret.

³⁰Sōpuihei, Rōngpu Jesu Christa leh Rathla tapek eng lungsetna jâra kangek chei: kei sik a Pathen hneng malung kahlut a derna abômṭhak ruh.

³¹Judea ram a taksenna kaneimak heia inphut inhuk a ka-om theina sik khana Jerusalema kaṭōntlo kha khava hmun a ka-om Pathen mihei sik rahlângthei achangna sik der ruh.

³²Khava jâra, Pathen lungdo achang inchu inpâktak a nanhnenga kahong sik eng khana nangni phâkna kha kahōia kahmang sik.

³³Eini mōngna kung Pathen khan nankhenga ompui chei rasoh. Amen.